پرەمەر-ءمينيستردىڭ ورىنباسارى التاي كولگىنوۆ ءتيىستى مينيسترلىك پەن اكىمدىكتەرگە وڭىرلەردەگى پەريناتالدىق ورتالىقتاردىڭ ماتەريالدىق-تەحنيكالىق جاعدايىن جاقسارتۋ تۋرالى تاپسىرما بەردى.
– تاعى ءبىر ماڭىزى ماسەلە – انا مەن بالا دەنساۋلىعىن قورعاۋ. بۇل باعىتتا بوسانۋعا كومەكتەسەتىن ۇيىمدار مەن بالالار اۋرۋحانالارىن قاجەتتى مەديتسينالىق جابدىقتارمەن قامتاماسىز ەتۋ دەڭگەيىن ارتتىرۋ مىندەتى تۇر. ەڭ الدىمەن اكۋشەرلىك, گينەكولوگيا, پەريناتولوگيا ورتالىقتارىنىڭ ينفراقۇرىلىمىن جاقسارتۋ باعىتىنداعى ماسەلەلەردى تەزدەتىپ شەشۋىمىز قاجەت, – دەپ مالىمدەدى ول دەنساۋلىق ساقتاۋ مينيسترلىگىنىڭ القا ماجىلىسىندە.
التاي كولگىنوۆ بۇل ءىستى استانادان باستاۋ قاجەتتىگىن ايتتى. ويتكەنى ەلوردانىڭ وزىندە پەريناتالدىق ورتالىق تاپشى.
«انالاردىڭ قاۋىپسىز بوسانۋىنا جاعداي جاساۋ جانە وڭىرلەردەگى پەريناتالدىق كومەك كورسەتۋ ساپاسىن ارتتىرۋ باعىتىندا كەشەندى ءىس-شارالاردى ىسكە اسىرۋ ماڭىزدى. ونىڭ ىشىندە اكىمدىكتەرمەن بىرلەسىپ پەريناتالدىق ورتالىقتار سالۋدى جانە بوسانۋعا كومەكتەسەتىن, بالالار مەديتسينالىق ۇيىمدارىن قازىرگى زامانعى جابدىقتارمەن قامتۋدى تەزدەتۋ قاجەت. الىسقا بارماي-اق قويايىق, وسى استانانىڭ وزىندە كەمىندە ەكى پەريناتالدىق ورتالىق سالۋ قاجەت. ال وڭىرلەردە قانشاما ماسەلە بار؟! وسىنى نازارعا الۋ كەرەك» دەدى پرەمەر-ءمينيستردىڭ ورىنباسارى.
