جەكسەنبى كۇنى الماتى وبلىسىندا استانا قالاسىنىڭ مادەني كۇندەرى اشىلدى. ەلوردانىڭ ارتىستەرى مەن ونەر ۇجىمدارىنىڭ باس قالانىڭ 20 جىلدىعىنا ارنالعان بيىلعى گاسترولدىك تۋرى تالدىقورعان قالاسىندا جالعاسىن تاپتى.
مادەني كۇندەردىڭ شىمىلدىعى ءى.جانسۇگىروۆ اتىنداعى مادەنيەت سارايىندا ع.جۇبانوۆا اتىنداعى مەملەكەتتىك ىشەكتى اسپاپتار كۆارتەتىنىڭ «ۇلى دالا اۋەندەرى» اتتى كونتسەرتىمەن ءتۇرىلدى. وندا ف.شۋبەرتتىڭ, ي.گايدننىڭ, ا.ءبوروديننىڭ, ا.جۇبانوۆتىڭ, ا.جايىموۆتىڭ, تاتتىمبەت پەن قۇرمانعازىنىڭ شىعارمالارى ورىندالدى.
كەشە وسى زالدا استانا قالاسىنىڭ مەملەكەتتىك اكادەميالىق فيلارمونياسى ۇجىمدارىنىڭ قاتىسۋىمەن «استانادان اق تىلەك» كونتسەرتى ءوتتى. كونتسەرتتە «قورقىت» ءداستۇرلى ساز توبى, «شالقىما» بي ءانسامبلى, كلاسسيكالىق جانە ەسترادالىق ۆوكال, حالىق ءانى ءبولىمى سوليستەرى ءوز ونەرلەرىن كورسەتتى.
بۇگىن ەلوردا فيلارمونياسىنىڭ قازاق وركەسترى جانە حالىق ءانى ءبولىمى سوليستەرىنىڭ قاتىسۋىمەن «جىر اتاسى – قابان جىراۋ» اتتى ادەبي-مۋزىكالىق كەش ۇيىمداستىرىلادى.
ب.ريموۆا اتىنداعى تالدىقورعان دراما تەاترىنىڭ ساحناسىندا م.گوركي اتىنداعى مەملەكەتتىك اكادەميالىق ورىس دراما تەاترىنىڭ ارتىستەرى ءوز قويىلىمدارىن كورسەتەدى. رەپەرتۋاردا ەرەسەكتەرگە دە, بالالارعا دا ارنالعان سپەكتاكلدەر بار.
بۇگىن تالدىقورعاندىق كورەرمەندەر قازاق xاندىعىنىڭ قۇرىلۋىنا 550 جىل تولۋىنا ارنالىپ قويىلعان ب.جانداربەكوۆتىڭ «توميريس – ساقتار پاتشايىمى» قويىلىمىن تاماشالايدى. درامانىڭ قويۋشى رەجيسسەرى – قر ەڭبەك سىڭىرگەن قايراتكەرى گۇلسينا مەرعاليەۆا. ال ا.اناتولەۆتىڭ «قار پاتشايىمى» ەرتەگىسى گ.ح.اندەرسەننىڭ شىعارماسى جەلىسىمەن قويىلعان.
بۇعان قوسا, گوركي تەاترى ك.ليۋدۆيگتىڭ «پريمادوننالار» كومەدياسىن ۇسىنادى. قر ەڭبەك سىڭىرگەن ءارتىسى, رەجيسسەر بەكبولات پارمانوۆتىڭ جانە قويۋشى-سۋرەتشى قانات ماقسۇتوۆتىڭ قويىلىمى شىتىرمان وقيعالارعا تولى.
ال «اق تىلەكپەن, استانا» كورمەسى ءۇش كۇن بويى جۇمىس ىستەيدى. ەكسپوزيتسياعا وتاندىق سۋرەتشىلەردىڭ 100-دەن اسا تۋىندىسى شىعارىلعان.
