ەلوردامىزدا زاماناۋي ۇلگىدەگى تاعى ءبىر جاعاجاي اشىلدى. استانالىق ساياباق اۋماعىندا ورىن تەپكەن بۇل جاعاجاي كەشەنىندە ءۇش ءتۇرلى اشىق باسسەين, ترامپليندەر, سىرعاناقتار, سۋبۇرقاق جانە جازعى ءدامحانا مەن ۆولەيبول وينايتىن الاڭدار ورنالاسقان.
«كۇردەلى جوندەۋ جۇمىستارىنان كەيىن ەۋروستاندارتتارعا ساي بولىپ قايتا اشىلعان «وازيس» جاعاجاي كلۋبىندا ۋاقىتتى قىزىقتى وتكىزۋگە بارلىق مۇمكىندىكتەر جاسالعان. ينفراقۇرىلىمدىق جاعىنان الەمدىك شيپاجايلارداعى قوناق ۇيلەردەن ەش كەم ەمەس. كەلۋشىلەرگە كەشەنىمىزدەگى, اسىرەسە, ءۇش دەڭگەيلى, ياعني سۋى جىلىتىلاتىن اشىق باسسەين, سپورتتىق حاۋىز بەن SPA-ۆانناسى قاتتى ۇناپ جاتىر», – دەيدى استانالىق ساياباق باسقارۋشىسى عاني حاسەنوۆ.
«وازيس» كەشەنى كۇن سايىن ساعات 11.00-دەن كەشكى 21.00-گە دەيىن جۇمىس ىستەيدى. 3 جاسقا دەيىنگى بالالار ءۇشىن كىرۋ – تەگىن. دۇيسەنبى كۇندەرى حالىقتىڭ الەۋمەتتىك وسال توپتارى كلۋبقا تەگىن كىرە الادى.
