سۇلەيمان دەميرەل اتىنداعى ۋنيۆەرسيتەتتە «جۋرناليستيكا جانە اقپارات» دايارلاۋ باعىتى بويىنشا XV رەسپۋبليكالىق پاندىك وليمپيادا ءوتتى. تارتىستى دودادا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى جۇلدەلى 2-ورىنعا قول جەتكىزدى.
وليمپيادادا ەلىمىزدەگى 17 جوعارى وقۋ ورنىنان كەلگەن 51 جاس جۋرناليست باق سىنادى. ءار توپ ءۇش ستۋدەنتتەن قۇرالدى. سايىستا ولار كۇندەلىكتى ساباق بارىسىندا الىپ جۇرگەن ءبىلىمىن ساراپقا سالدى. بولاشاق مامانداردىڭ كاسىبي قابىلەتىن انىقتاۋ جانە تالانتتى ستۋدەنتتەردى قولداۋ ماقساتىندا ۇيىمداستىرىلعان جارىسقا جوعارى وقۋ ورنىنىڭ 2-3 كۋرس ستۋدەنتتەرى قاتىستى.
الماتى وبلىسى قاسكەلەڭ قالاسىندا وتكەن وليمپيادا جاڭا باعىتىمەن ەرەكشە بولدى. ءۇش كەزەڭنەن تۇرعان دودادا جىلداعىداي تەست تاپسىرماسى بولمادى. العاشقى كەزەڭ «كەيس شەشۋ» دەپ اتالدى. ياعني ءبىر بىلىمگەر مەديا ەتيكا, فاكتىلەردى تەكسەرىپ قولدانۋ, مەديا ساۋات پەن جۋرناليستيكاداعى قۇقىق بويىنشا بەرىلگەن جاعداياتتاردى دۇرىس, ناقتى جانە تولىققاندى شەشۋى ءتيىس ەدى. ءار قاتىسۋشىعا بەرىلگەن بەس كەيسكە كەمى 4-5 سويلەمنىڭ كولەمىندە جاۋاپ ۇسىنۋ نەگىزگى تالاپتىڭ ءبىرى بولدى.
ەكىنشى كەزەڭدە ستۋدەنتتەر اقپارات جازۋدان جارىستى. قاتىسۋشىلارعا ءۇش دەرەككوزدەن ءبىر ماسەلەگە قاتىستى اقپارات ۇسىنىلىپ, ولار وسى ءۇش ءتۇرلى اقپاراتتان ءبىر جۋرناليستىك ءماتىن دايىندادى. ءبىر كۇندە وتكەن ەكى كەزەڭدە ستۋدەنتتىڭ ارقايسىسى وتكىر ويى مەن ۇشقىر قيالىن قاعاز بەتىنە ءتۇسىردى.
«مۋلتيمەديالى ءونىم دايىنداۋ» اتتى سوڭعى كەزەڭ وليمپيادانىڭ ەكىنشى كۇنىندە ءوتتى. بۇل كەزەڭدە قاتىسۋشىلار ءموبيلدى قۇرىلعى كومەگىمەن ۆيدەو-ستوري فورماتىندا كونتەنت ازىرلەدى.
بايقاۋ ناتيجەسىندە جۇزدەن جۇيرىكتەر ايقىندالدى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ 3-كۋرس ستۋدەنتتەرى ايگۇل ەرجىگىت, ينديرا بەرجانوۆا جانە قادىر اليەۆ ءۇش كەزەڭنىڭ قورىتىندىسى بويىنشا 2-ورىندى قانجىعاعا بايلادى. «كۇلتەگىن» اتالعان توپ بارلىق كەزەڭنەن سۇرىنبەي, جەڭىمپازداردىڭ قاتارىنان كورىندى. ستۋدەنتتەردىڭ وزگەلەردىڭ ەرەكشەلىگى «ەڭبەك قۇقىعىڭا ەنجار قاراما!» اتتى بەينەونىم ءتۇسىرىپ, جوعارى ۇپايدى يەلەنۋىندە ەدى. سيۋجەتتە جۇمىسسىز جاستاردىڭ قۇقىعىن قورعاۋ, جۇمىسسىزدىقتىڭ سەبەبى مەن سالدارى, ەكى قولعا ءبىر كۇرەك تاپپاي جۇرگەن جاستىڭ بۇگىنگى جاعدايى تۋرالى ايتىلىپ, وعان بىلىكتى پسيحولوگ, زاڭگەر, وقىتۋشى سەكىلدى ماماندارمەن قوسا, جاستاردىڭ دا پىكىرى دالەل بولدى.
ستۋدەنتتەردىڭ ايتۋىنشا, جاۋىر بولعان تاقىرىپتى زاماناۋي فورماتتا كوپشىلىككە كورسەتۋ باستى ماقسات ەدى. وسىلايشا استانالىق ستۋدەنتتەر رەسپۋبليكالىق دودادا ۋنيۆەرسيتەت نامىسىن قورعاپ, جەڭىسپەن ورالدى.
