«استانانى» ماراپاتتادى
كەشە قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ «استانا» فك فۋتبولشىلارى مەن جاتتىقتىرۋشىلار شتابىنا التىن مەدال تابىس ەتتى.
«استانا» كومانداسى وسى كۇنگە دەيىن ءوزىنىڭ از عانا تاريحىندا ەكى مارتە قازاقستان كۋبوگىنا, سۋپەركۋبوك پەن كۇمىس جۇلدەگە قول جەتكىزگەن بولاتىن. بىراق, بۇكىل اتاقتىڭ ىشىندە چەمپيون عانا جوق ەدى.
2014 جىلى جاس كلۋب بۇل شىڭدى دا باعىندىردى. ستانيمير ستويلوۆتىڭ تاربيەلەنۋشىلەرى جەڭىسكە دەگەن ىنتاسى مەن شەبەرلىكتەرىن كورسەتتى. ولار باستى قارسىلاسى – «قايرات» كومانداسىن چەمپيوناتتىڭ اياقتالۋىنا ءبىر تۋر قالعاندا جەڭدى.
وتكەن جىلى ەلوردالىق كوماندا مەملەكەت باسشىسى ن.ءا.نازارباەۆتىڭ باستاماسىمەن قۇرىلعان «استانا» پرەزيدەنتتىك كاسىپتىك سپورت كلۋبىنىڭ ءبىر ءبولىگىنە اينالدى. سونىمەن قاتار, بيىل «استانا» ۋەفا ەۋروپا ليگاسىندا دا لايىقتى ونەر كورسەتتى. ارمەنيانىڭ «پيۋنيك», شۆەتسيالىق ايك جانە يسپانيانىڭ «ۆيلياررەال» كوماندالارىمەن كەرەمەت ويىن كورسەتىپ, جانكۇيەرلەرىن قۋانتتى.
سۇبەلى ءسوز
ادىلبەك جاقسىبەكوۆ, قفف پرەزيدەنتى:
– قازاقستان فۋتبول فەدەراتسياسىنىڭ جانە فۋتبول قوعامىنىڭ اتىنان «استانا» فۋتبول كلۋبىن فۋتبولدان قازاقستان رەسپۋبليكاسى چەمپيوناتىنىڭ 2014 جىلعى ماۋسىمىندا مەرزىمىنەن بۇرىن جەڭىسكە جەتۋىمەن قۇتتىقتايمىن!
بۇل – تاباندى كۇرەس ناتيجەسىندە قول جەتكىزگەن جەتىستىك. تۋرنير بارىسىندا «استانا» ءوزىنىڭ شەبەرلىگىن, پسيحولوگيالىق تۇراقتىلىعىن, جەڭىسكە دەگەن ىنتاسىن عانا ەمەس, سونىمەن قاتار, ادەمى ويىن دا كورسەتە الدى.
كوماندانىڭ چەمپيوندىق تيتۋلى – فۋتبول كلۋبى قىزمەتىنىڭ بارلىق سالالارىنداعى ساۋاتتى ءارى دۇرىس جۇرگىزىلگەن جۇمىستىڭ جەمىسى. ءاربىر كوماندا مۇشەسىنىڭ ءوز ىسىندە ۇزدىك بولۋ نيەتى مەن ۇمتىلىسى ۇجىمعا بيىلعى ماۋسىمدا جوعارى ناتيجەگە قول جەتكىزۋگە مۇمكىندىك بەردى. «استانا» فك-نىڭ الداعى ۋاقىتتا دا تابىستى ونەر كورسەتەتىنىنە, جانكۇيەرلەرىن جاقسى ويىنمەن قۋانتىپ, قازاقستاندىق فۋتبولدىڭ يگىلىگىنە ءوزىنىڭ دامۋىن جالعاستىراتىنىنا سەنىمدىمىن.