ەلباسى نۇرسۇلتان نازارباەۆ «استانا باس جوسپارى» عىلىمي-زەرتتەۋ جوبالىق ينستيتۋتىندا بولىپ, ەلوردانىڭ الداعى دامۋ باعدارىن تالقىلادى.
Akorda.kz حابارلاعانداي, مەملەكەت باسشىسىنا استانا قالاسىنىڭ 2030 جىلعا دەيىنگى باس جوسپارىنا ەنگىزىلگەن تۇزەتۋلەر مەن استانالىق اگلومەراتسيانى قالىپتاستىرۋ جوباسى جونىندە جانە ەلوردانىڭ جاڭا كولىك جۇيەسىن قۇرۋ بارىسى باياندالدى.
بۇعان قوسا, جيىندا ورىنبور كوشەسىن, جاڭا تەمىرجول ۆوكزالىن سالۋ تۇجىرىمداماسى مەن «نۇرلى جول» بۋلۆارىنىڭ ەكىنشى كەزەگىنىڭ جوباسى تۋرالى ايتىلدى.
باق وكىلدەرىنە ارنالعان بريفينگتە مەملەكەت باسشىسى ەلوردانىڭ قۇرىلىسى ءىس جۇزىندە 10 جىل ىشىندە جۇزەگە اسقانىن اتاپ ءوتتى.
– قالاعا قاجەتتىنىڭ ءبارى 2008 جىلعا دەيىن سالىندى. وcىدان كەيىنگى كەزەڭدە استانانىڭ دامۋى جەكە ينۆەستورلاردىڭ قاتىسۋىمەن جالعاستى. قازىرگى كەزدە جان باسىنا شاققانداعى ەڭ كوپ ينۆەستيتسيا ەلورداعا تيەسىلى. استانانىڭ ەل ەكونوميكاسىن دامىتۋعا قوسقان ۇلەسى جىل سايىن ءوسىپ كەلەدى. بۇگىندە ەلوردا – بارشا قازاقستاندىقتاردىڭ ماقتانىشى. حالقىنىڭ سانى 900 مىڭ ادامعا جەتتى. بۇرىن مۇنى بولجاۋدىڭ ءوزى قيىن بولاتىن. قالا ەلىمىزدىڭ شىن مانىندەگى اكىمشىلىك, مادەني, ىسكەرلىك, ءبىلىم جانە مەديتسينا ورتالىعىنا اينالدى, – دەدى قازاقستان پرەزيدەنتى.
نۇرسۇلتان نازارباەۆ استانانى سالۋ جانە اباتتاندىرۋ جۇمىستارى ءارى قاراي جالعاساتىنىن جەتكىزدى.
– قانداي كەمشىلىكتەر بار ەكەنىن, سونىڭ ىشىندە كولىكتەر تۇراعىنا بايلانىستى ماسەلەلەر بار ەكەنىن جاقسى بىلەمىز. ونىڭ ءبارى مىندەتتى تۇردە شەشىلەدى. تاياۋداعى مول جاۋىن سۋ سورعى كارىزدەرىنە قاتىستى تۇيتكىلدەردىڭ بار ەكەنىن كورسەتتى. ونىمەن دە جۇمىس جۇرگىزۋ قاجەت. سونىمەن قاتار, بالاباقشالار مەن مەكتەپتەر سالۋ جايىنا دا نازار اۋدارۋ كەرەك. قالانىڭ ءارى قاراي دامۋ كەلەشەگى ەكسپو-2017 اۋماعى مەن ونىڭ اينالاسىنداعى كوشەلەر قۇرىلىسىن, سۋلى-جاسىل جەلەكتى بۋلۆاردى اباتتاندىرۋ, جاڭا ساياباقتار, سونىڭ ىشىندە 100 گەكتار اۋماقتا بوتانيكالىق باق سالۋ جوسپارىن قامتيدى. بۇل جۇمىستاردىڭ بارلىعى ەلىمىزدىڭ تۋرا ورتالىعىندا بوي كوتەرىپ, مۇلدە جاڭا مەگاپوليستىڭ قالىپتاسۋىنا نەگىز قالايدى مۇنىڭ ءبارى قازاقستاندىقتاردىڭ يگىلىگىنە قىزمەت ەتەتىن بولادى, – دەدى مەملەكەت باسشىسى.
