استانانىڭ ۇزدىك تاۋارى
وتاندىق ءونىمنىڭ ساپاسىن ارتتىرۋدى كوزدەيتىن «قازاقستاننىڭ ۇزدىك تاۋارى» كورمە-بايقاۋىنىڭ وڭىرلىك كەزەڭىندە ەلوردانىڭ ۇزدىك تاۋارى انىقتالدى. استانا قالاسى اكىمىنىڭ ورىنباسارى ماليكا بەكتۇروۆا جەڭىمپازداردى قۇتتىقتاپ, ارنايى ديپلوممەن ماراپاتتادى.
ەلوردادا جىل سايىن شاعىن جانە ورتا كاسىپورىنداردىڭ سانى ارتىپ كەلەدى. ۇزدىك تاۋارلار كورمەسى كاسىپكەرلەردىڭ بەلسەندىلىگىن ارتتىرىپ قانا قويماي, قازاقستاندىق نارىقتى جوعارى ساپالى ءارى باسەكەگە قابىلەتتى ونىممەن قامتاماسىز ەتۋدى كوزدەيدى. ەكىنشىدەن, كاسىپورىندار اراسىندا ساپا مەنەدجمەنتىن دامىتۋعا ىقپال ەتەدى.
بيىلعى بايقاۋدا اۋەجايلار مەن اۆياكومپانيالارعا ارنالعان ونىمدەر, مەديتسينالىق جانە ەلەكتروندى قۇرالدار, زەرگەرلىك بۇيىمدار, جيھاز جانە ازىق-تۇلىك وندىرەتىن كاسىپورىندار باق سىنادى. كونكۋرس قورىتىندىسى بويىنشا «ءۇزدىك وندىرىستىك تاۋار», «تۇرعىندارعا ارنالعان ۇزدىك تاۋار», «ۇزدىك ازىق-تۇلىك تاۋارى» اتالىمدارى بويىنشا جەڭىمپازدار بەلگىلى بولدى.
سونىمەن, ساپاسى مەن سەرتيفيكاتتالۋ ولشەمدەرىنە قاراي «ۇزدىك وندىرىستىك تاۋار» اتالىمىن «استانالىق اينەكپاكەت شىعارۋ» كومپانياسى جەڭىپ الدى. ال بايقاۋعا العاش رەت قاتىسقان «Alab Industries» كومپانياسى ەكىنشى ورىندى يەلەندى. اتالمىش كومپانيا – اۋەجايلاردا كەڭىنەن قولداناتىن ۇشىپ-قونۋ جولاعىن وڭدەۋگە ارنالعان ونىمدەردى شىعاراتىن جالعىز كاسىپورىن. 2015 جىلى اشىلعان كومپانيا از ۋاقىتتىڭ ىشىندە جەتىستىككە جەتكەن. اقش پەن كانادانىڭ زەرتحاناسىندا سىنالعان ءونىمدەرى ۇزدىك اتانىپ, الەمدەگى الدىڭعى قاتارلى 30 كومپانيانىڭ قاتارىنا قوسىلىپ ۇلگەردى. 2005 جىلى ىرگەسى قالانعان «سپەتسەلەكترا» كاسىپورىنى ءۇشىنشى ورىندى قاناعات تۇتتى.
«حالىققا ارنالعان ۇزدىك تاۋار» اتالىمى بويىنشا 10-نان استام كاسىپورىن سىنعا تۇسكەن ەكەن. ءبىرىنشى ورىنعا «LED Solution» كومپانياسى لايىق دەپ تانىلدى. جىلىنا 60 000 جارىق شامىن شىعاراتىن كاسىپورىن تۇرعىن ۇيلەرگە, كەڭسەلەرگە, وندىرىستىك نىساندار مەن كوشەلەرگە ارنالعان جارىقديودتى شامداردىڭ 100-دەن استام ءتۇرىن وندىرەدى. «100 مەكتەپ, 100 اۋرۋحانا» باعدارلاماسى بويىنشا اۋماقتىق جانە رەسپۋبليكالىق جوبالارعا جەتەكشىلىك جاسايتىن «بارك تەحنولودجي» كاسىپورىنى ەكىنشى ورىندى يەلەندى. ال ەلوردالىق «Samhat» اياق كيىم فابريكاسى ءۇشىنشى ورىندى قاناعات تۇتتى.
«ۇزدىك ازىق-تۇلىك تاۋارى» اتالىمى بويىنشا قازاقستان نارىعىندا جەتى جىلدان بەرى تالاي جەتىستىككە جەتكەن «بالنۇر-نس» كاسىپورىنى جەڭىسكە جەتتى. استانالىقتاردىڭ سۇيىكتىسىنە اينالعان «Bambino» بالمۇزداقتارىن ساتۋمەن اينالىساتىن كاسىپورىن ەلىمىزدىڭ 5 قالاسىندا 50-دەن استام بالمۇزداق ءتۇرىن شىعارادى. تازا تابيعي ونىمنەن جاسايتىن كاسىپورىننىڭ, اسىرەسە, قىمىزدان جاسالعان بالمۇزداعىنا سۇرانىس كوپ. بۇگىندە رەسەي جانە قىتاي نارىعىنا قادام باسقان.
ال ەكىنشى ورىن «Golden Rill Trade» كومپانياسىنا بۇيىردى. 1998 جىلى «ۆودا حرۋستالنايا» ساۋدا بەلگىسىمەن قۇرىلعان مەكەمەنىڭ اۋىز سۋى بۇگىندە ءاربىر استانالىقتىڭ ۇيىنەن تابىلادى.
2007 جىلدارى نارىققا «رومانوۆسكي پرودۋكت» بەلگىسىمەن شىققان «نۇر ءادىل» جەكە كاسىپورىنى ءۇشىنشى ورىنعا تابان تىرەدى. 60 ادامدى جۇمىسپەن قامتىپ وتىرعان مەكەمە نان ونىمدەرىن وندىرۋمەن اينالىسادى.
– ۇزدىكتەر ۇزەڭگى قاعىستىرعان بايقاۋدا ەلوردانىڭ ەڭ ۇزدىك مەكەمەلەرى انىقتالدى. كورمەدە حالىق قىزىعۋشىلىق تانىتقان ونىمدەردىڭ ءبىرى – وكپە تەراپياسىنا ارنالعان «VibroLUNG» ۆيبرواكۋستيكالىق قۇرالى. ونى ەلوردالىق ماماندار زەرتتەپ شىعارعان. ول فيزيوتەراپيا قۇرالدارىنىڭ ءبىرى ءارى تىنىس الۋ اعزالارىن ەمدەۋگە ارنالعان. سونىمەن قاتار, «پولەزنىي پرودۋكت» مەكەمەسى تۋرالى ايتۋعا بولادى. اتالمىش كاسىپورىن قازاقستاندا وسەتىن جەمىس-جيدەكتەردى زاماناۋي وڭدەۋ تاسىلدەرىمەن اينالىسادى. مىسالى, ينفراقىزىل كەپتىرۋ تاسىلىمەن دايىندالعان الما ءچيپسىن وندىرەدى. ناتيجەسىندە المانىڭ ءنارى وزىندە ساقتالادى. وتاندىق ءونىم يمپورتتىق دەسەرتتى الماستىرۋى ءابدەن مۇمكىن, – دەيدى استانا قالاسى كاسىپكەرلەر پالاتاسىنىڭ ديرەكتورى عاني تاسماعامبەتوۆ.
سونىمەن, جەڭىمپازدار جىل سوڭىندا وتەتىن «قازاقستاننىڭ ۇزدىك تاۋارى» كورمە-بايقاۋىنىڭ رەسپۋبليكالىق كەزەڭىنە جولداما الدى.
گۇلميرا ايماعانبەت