ايبول قۋاندىقوۆ, اقپاراتتىق-كوممۋنيكاتسيالىق تەحنولوگيالاردى دامىتۋ قورىنىڭ باس ديرەكتورى:
– بيىل VI استانا ەكونوميكالىق فورۋمى اياسىندا تۇڭعىش رەت Astana Smart Technologies Exhibition (ASTEX) كورمە-كونفەرەنتسياسى وتكىزىلەدى. كورمەنى وتكىزۋ يدەياسى نەدەن تۋدى؟
– بۇل ەڭ اۋەلى ەلباسى ماقۇلداعان «اقپاراتتىق قازاقستان-2020» مەملەكەتتىك باعدارلاماسىن جۇزەگە اسىرۋدىڭ ءبىر باعدارى دەسەك تە بولادى. ول باعدارلامادا ەلەكتروندى ۇكىمەت, مەملەكەتتىڭ اشىق مالىمەت بازاسى, ەلەكتروندىق ساۋدا, ونەركاسىپ, اۋىلشارۋاشىلىق, ەنەرگەتيكا سالاسىندا IT-تەحنولوگيانى دامىتۋدىڭ جوسپارى جاسالدى. ماقسات – الەمدە قانداي تەحنولوگيالار, قانداي ىزدەنىستەر مەن جاڭالىقتار بار ەكەنىن كورسەتۋ, تانىستىرۋ.
– Smart تۇجىرىمداسى بىرنەشە سەسسياعا بولىنگەنىن ەسكەرسەك, كورمە تاقىرىبى وتە اۋقىمدى سياقتى…
– بارلىعى ءتورت سەسسيا بولادى. ولار: Smart Government, Smart Industry, Smart Business, Smart Life. ولاردىڭ ارقايسىسى كىشىگىرىم ءتورت تاقىرىپتىق بولىمگە بولىنەدى. ماسەلەن, Smart Government بويىنشا «ەلەكتروندىق ۇكىمەت», «ءموبيلدى ۇكىمەت» جانە قازىر الەمدىك قاۋىمداستىق جاپپاي قولعا الىپ جاتقان «اشىق ۇكىمەت» باعىتى قامتىلادى.
ال Smart Industry بۇل ءوندىرىستىڭ تيىمدىلىگىن ارتتىرۋ, كولدەنەڭ قاۋىپ-قاتەردى ازايتۋ بويىنشا ىزدەنىستەردەن تۇرادى. بۇل تۇرعىدا ءبىز ەگىنشىلىكتەگى اقىلدى تەحنولوگيالار, «جاسىل» تەحنولوگيا-لار, مۇنايگاز, كولىك سالاسىنداعى 3D مودەلدەۋ مەن ساندىق تەحنولوگيالارعا ايرىقشا ماڭىز ارتىپ وتىرمىز. ەلەكتروندى ساۋدا الاڭدارى مەن بيرجالار, تەلەكوممۋنيكاتسيا نارىعى, قاشىقتىقتان قىزمەت كورسەتۋ سياقتى باعىتتار بويىنشا جاڭالىقتارعا Smart Business سەسسياسىنان قانىعاسىزدار.
– كورمەنىڭ ۆورك-شوپ فورماتى تۋرالى نە ايتاسىز؟
– ەلەكتروندىق ءبىلىم بەرۋ, ورتاق يگىلىكتەگى ونلاين-سەرۆيستەر, ەلەكتروندىق دەنساۋلىق ساقتاۋ, ەلەكتروندىق كوممەرتسيا, open government تاقىرىپتارى بويىنشا ۆورك-شوپ ۇيىمداستىرىلادى. ونىڭ ماڭىزى كونفەرەنتسياعا قاتىسۋشىلار ونىمدەردى كوزبەن كورىپ, قولمەن ۇستاپ, ءوز-وزىنە «بۇل ماعان نە ءۇشىن كەرەك؟» نەمەسە «مەن مۇنى قالايشا تەگىن الامىن؟» دەگەن سىندى سۇراقتار قويا الۋى كەرەك. سوندىقتان ءبىز تۇتىنۋشىلار, باعدارلامانى جاساۋشىلار مەن وسى سالانى رەتتەيتىن, قاداعالايتىن ورگاندار وڭاشا باس قوسىپ, ءونىمنىڭ ارتىق-كەم تۇستارىن تالقىلاسا دەيمىز. سونداي-اق شەتەلدىك قوناقتار مۇنداي IT-جوبالاردى ۆەنچۋرلىق قارجىلاندىرۋ نەمەسە باستاپقى ساتىنەن قارجىلاندىرۋ (پوسەۆنوە فينانسيروۆانيە – رەد) ارقىلى جۇزەگە اسىرۋ جولدارىمەن بولىسەدى. وسى ماقساتتا ءبىز اقش-تىڭ Rustic Canyon ۆەنچۋرلىق قورىن ارنايى شاقىرىپ وتىرمىز.
ادىلبەك جاپاق
