بيىلعى حالىقارالىق قارتتار كۇنى مەرەكەسى سارىارقا اۋداندىق ارداگەرلەر كەڭەسىنىڭ 10 جىلدىق مەرەيتويىمەن تۇسپا-تۇس كەلدى. وسىعان وراي, اتالمىش اۋدان اكىمدىگىندە سالتاناتتى شارا ءوتتى.
بۇگىنگى تاڭدا سارىارقا اۋدانىندا 25 000 زەينەتكەر تىركەلگەن. ولاردىڭ اراسىندا 103-ءى ۇلى وتان سوعىسىنا قاتىسقان. جالپى, اۋداندىق ارداگەرلەر كەڭەسىنىڭ جانىندا 124 ءبىرلەستىك بار. ولار ەگدە ادامداردىڭ بوس ۋاقىتتارىن ءتيىمدى وتكىزىپ, ءتۇرلى قوعامدىق شارالارعا قاتىسۋىنا مۇرىندىق بولىپ كەلەدى. وسىلايشا, اۋدانداعى كوپ زەينەتكەر قۇرمەتتى دەمالىسقا شىقسا دا, ءالى دە ەل يگىلىگى ءۇشىن ەڭبەك ەتىپ, جاستارعا ۇلگى-ونەگە كورسەتۋدە. وسى جونىندە كەڭىنەن اڭگىمەلەي كەلە, اۋداندىق ارداگەرلەر كەڭەسىنىڭ توراعاسى ابەنعاپپاس احمەتوۆ اتقارىلىپ جاتقان جۇمىستار تۋرالى باياندادى. ونىڭ ايتۋىنشا, اۋدان ارداگەرلەرى جىل سايىن استانادا وتكىزىلەتىن سەنبىلىكتەرگە قاتىسىپ, ەلوردامىزدىڭ گۇلدەنىپ-كوركەيۋىنە ۇلەس قوسۋمەن بىرگە, ايتۋلى مەرەكەلەرگە وراي ۇيىمداستىرىلاتىن مازمۇندى دا قىزىقتى شارالارعا قۇرمەتتى قوناق رەتىندە شاقىرىلادى. سونداي-اق, ەلباسىنىڭ جىل سايىنعى قازاقستان حالقىنا ارناعان جولداۋىن تالقىلاۋعا بەلسەنە اتسالىسادى. بۇل تۇرعىدا قاريالار جايى پرەزيدەنتىمىزدىڭ ءداستۇرلى حالىققا جولداۋىندا نازاردان تىس قالعان ەمەس.
ودان ءارى رەسپۋبليكالىق ارداگەرلەر ۇيىمى ورتالىق كەڭەسى توراعاسىنىڭ ورىنباسارى بەكبولات مۇقىشەۆ زالدا وتىرعان ارىپتەستەرىنە قاراپ: «سىزدەردى ەگدە ادامدار دەۋگە مۇلدە اۋزىم بارمايدى. ءوزىمدى قۇددى ءبىر كومسومولدار ۇيىمىنىڭ كەزەكتى وتىرىسىندا وتىرعانداي سەزىنىپ تۇرمىن» دەدى. ال, قالالىق ارداگەرلەر كەڭەسىنىڭ توراعاسى امانگەلدى سىزدىقوۆ زەينەتكەرلەردىڭ ەگدە تارتقاندارىنا قاراماستان, بولاشاق ءۇشىن, ەل ءۇشىن ايانباي ەڭبەك ەتىپ كەلە جاتقانىن, مەملەكەت تە ولاردى قامقورلىققا الىپ, بار مۇمكىندىكتى جاساپ وتىرعانىن ايتا كەلە, سول ءۇشىن قالا باسشىلىعىنا العىسىن جەتكىزدى.
سارىارقا اۋدانى ارداگەرلەرىنىڭ كەڭەسى قۇرىلعان كەزدە قازىرگى «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ سول اۋداننىڭ اكىمى بولاتىن. سوندىقتان دا ءاۋ باستان وسىنداعى بارلىق ىستەردىڭ باسى-قاسىندا بولعان ول كەڭەس جۇمىسىنا جاقسى قانىق ەكەنىن ايتا وتىرىپ, ون جىل ىشىندە ەلوردادا اتقارىلعان جۇمىستار مەن تاربيەلىك ءىس-شارالارعا, ءاسىرەسە «ارداگەرلەردى ارداقتايىق» اكتسياسىنىڭ ماڭىزدىلىعىنا توقتالدى.
باس قالاداعى زەينەتكەرلەر مەن ارداگەرلەرگە كورسەتىلىپ جاتقان كومەكتەر مەن جەڭىلدىكتەر دە جەتەرلىك. وسى جونىندە اڭگىمەلەگەن قالالىق جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ مىندەتىن اتقارۋشى ءلاززات ءابۋوۆا جىل وتكەن سايىن زەينەتكەرلەر قاتارىنىڭ كوبەيىپ كەلە جاتقانىن جەتكىزدى. ونىڭ ايتۋىنشا, 2007 جىلى ەلوردا زەينەتكەرلەرىنىڭ سانى 37 مىڭ بولسا, 2012 جىلى ولاردىڭ قاتارى 52 مىڭعا جەتكەن. ال, بۇگىنگى تاڭدا استانادا 63 مىڭ زەينەتكەر بار.
ءسوز العانداردىڭ بارلىعى دا اۋدان زەينەتكەرلەرىن اتاۋلى كۇنمەن شىن جۇرەكتەن قۇتتىقتاپ, اۋدان اكىمى ە.بولەكپاەۆتىڭ اتىنا العىستارىن ايتىپ, ارداگەرلەرگە ىزگى تىلەكتەرىن ءبىلدىردى. بەلسەندى زەينەتكەرلەر العىس حاتتارمەن ماراپاتتالىپ, اعا بۋىن وكىلدەرىنىڭ قۇرمەتىنە «استانا-پلازا» مەيرامحاناسىندا داستارقان جايىلدى.
گۇلبارشىن وكەشقىزى
