ەلوردا مەرەيتويى قارساڭىندا قالامىزدا «اۋلا كۇنى» اكتسياسى جۇرۋدە. وعان دايىندىق ءساۋىر ايىنان باستالىپ, استانانىڭ بارلىق اۋداندارى شەكارالارىنداعى اۋماقتاردى اباتتاندىرۋدى قولعا الدى.
اتاپ ايتساق, اۋلالار ىشىنە اسفالت توسەلۋدە, جارىق باعانالارى, بالالاردىڭ ويىن, سپورت الاڭدارى, ورىندىقتار, دەكوراتيۆتى قورشاۋلار ورناتىلۋدا. ال جالپى العاندا استانا بويىنشا 300 اۋلا جوندەلىپ, جاڭارعان, جاسانعان كەيىپكە ەنبەك. قازىر دە جوندەلگەن اۋلالاردا ءسوزىمىزدىڭ باسىندا كەلتىرگەن اتاۋمەن مەرەكەلىك شارالار وتكىزىلۋدە.
سارىارقا اۋدانىندا 90 اۋلانى اباتتاندىرۋ جوسپارلانعان. سونىڭ ءبىرى جەڭىس داڭعىلى, 55 مەكەن-جايىندا ورنالاسقان. بۇل اۋلاداعى جۇمىستار تولىعىمەن اياقتالىپ, 2 شىلدە كۇنى اكىمدىك اۋلا تۇرعىندارى ءۇشىن مەرەكە ۇيىمداستىردى. وعان جاڭبىرلى كۇنگە قاراماستان قارتتار, ورتا جاستاعى ادامدار, بالالار جينالىپ مارە-سارە بولدى. اۋلاعا مەرەكەلىك اۆتوكەرۋەن كەلىپ, كونتسەرت, سپورتتىق شارالاردى وتكىزدى. استانا قالاسىنىڭ جاستار ساياساتىن قولداۋ مەملەكەتتىك قورى مەن استانا قالاسى جاستار ساياساتى ماسەلەلەرى باسقارماسىنىڭ قولداۋىمەن وتكەن شارا اياسىندا قازاقستاننىڭ جاس ەسترادا جۇلدىزدارى, «ستۋدەنت كوكتەمى – 2013» فەستيۆالىنىڭ جەڭىمپازدارى قاتىسۋىمەن كونتسەرت ءوتتى. اۋلانىڭ بايىرعى تۇرعىندارىنا, كوپ بالالى وتباسىلارىنا, التىن توي يەلەرىنە سىي-قۇرمەت كورسەتىلدى.
الماتى اۋدانىندا اباتتاندىرىلاتىن 106 اۋلا بار. سونداعى ماعجان جۇماباەۆ كوشەسىندە دە «اۋلا كۇنى» مەرەكەسىنىڭ اياسىندا كونتسەرتتىك باعدارلاما ۇيىمداستىرىلىپ, فۋتبولدان, شاحماتتان, دويبىدان, ارمرەستلينگ پەن ارقان تارتۋدان جارىستار ءوتتى.
ەسىل اۋدانىنا كەلسەك, مۇندا 15 سپورتتىق جانە 26 بالالار الاڭى ورناتىلادى. مۇندا 29 ماۋسىم كۇنى جوعارىدا ايتىلعانداي مەرەكە ءوتتى.
امانعالي شميتۇلى
