قالالىق جولاۋشىلار تاسىمالىندا وزگەرىستەر ەنەدى. ەندى اۆتوبۋستاردا جۇرگىزۋشىلەردىڭ حال-جاعدايىن مونيتورينگتەن وتكىزەتىن جۇيە ورناتىلادى. زاماناۋي جۇيە قوعامدىق كولىكتىڭ قاۋىپسىزدىگىنە ءمان بەرىپ, قىزمەت ساپاسىن ارتتىرۋعا ىقپال ەتەدى.
وسى جونىندە «استانا LRT» جشس باسقارما باسشىسىنىڭ ورىنباسارى بەيبىت ەسجانوۆ بريفينگ وتكىزدى. ول كومپانيانىڭ ازاماتتاردان تۇسەتىن شاعىمداردىڭ سانى وتكەن جىلدىڭ سايكەس كەزەڭىمەن سالىستىرعاندا 60 پايىز, قوعامدىق كولىك سالاسىندا جۇرگىزۋشىلەر تاراپىنان بولاتىن قۇقىق بۇزۋشىلىقتاردىڭ سانى 31,9 پايىزعا قىسقارعانىن ايتتى. جۇرگىزۋشىلەر تاپشىلىعىنا قاتىستى كورسەتكىش وتكەن جىلمەن سالىستىرعاندا 22 پايىزعا تومەندەگەن.
«دەگەنمەن جۇرگىزۋشىلەر قازىردىڭ وزىندە تاپشى. بۇل بۇگىن قوعامدىق كولىكتە قىزمەت كورسەتىپ جۇرگەن جۇرگىزۋشىلەردىڭ تەز شارشاۋىنا, ولاردىڭ قوزعالىس كەزىندەگى زەيىنىنىڭ تومەندەۋىنە اكەپ سوقتىرادى. ءبىز اۆتوپاركتارمەن بىرلەسىپ, اتالمىش ماسەلەنى شەشىپ جاتىرمىز. بۇل رەتتە, ساندىق تەحنولوگيالاردى ەنگىزۋ جولدارى دا نازاردان تىس قالمايدى» دەدى ول. سونىمەن قاتار, ەكى اۆتوبۋستا پيلوتتىق جوبا اياسىندا ارنايى ونلاين-مونيتورينگ جۇيەسى ورناتىلاتىن بولادى. ولاردىڭ ءبىرى – «جۇرگىزۋشىلەردىڭ شارشاۋىن باقىلاۋ جۇيەسى», ەكىنشىسى – «اينالا شولۋ جۇيەسى». العاشقىسى جۇرگىزۋشىنىڭ بەت قيمىلى, كولىكتى قالاي باسقارىپ كەلە جاتقانى, ونىڭ كولىكتى بۇدان ءارى جۇرگىزە الاتىندىعى نەمەسە المايتىندىعىنا قاتىستى اقپاراتتى ديسپەتچەرگە جىبەرۋگە مۇمكىندىك بەرەدى. بۇل جۇيە الەمنىڭ بارلىق ەلدەرىندە جۇمىس ىستەيدى. قاۋىپسىزدىك پەن ادام ءومىرى ءبىز ءۇشىن ەڭ باستى فاكتور بولعاندىقتان, ءبىز ونى قازاقستاندا دا ەنگىزگىمىز كەلەدى» دەپ مالىمدەدى IQ global corporation LLP ديرەكتورلار كەڭەسىنىڭ مۇشەسى ەرلان كاكەنوۆ. ەكىنشى جۇيە زاماناۋي اۆتوموبيلدەردە كەڭىنەن قولدانىلادى. ول جۇرگىزۋشىنىڭ ۇيىقتاپ كەتۋىنە جول بەرمەي, ادامنىڭ ۇيقىسى كەلگەنىن انىقتاعان بويدا, دىرىلدەپ, دىبىستىق بەلگىلەر بەرە باستايدى. «بۇل, شىندىعىنا كەلگەندە, قاراپايىم جۇيە. دەسەك تە, جولدارداعى اپاتتى جاعدايلاردىڭ سانىن ايتارلىقتاي تومەندەتۋگە مۇمكىندىك بەرەدى. مۇنداي جۇيەنىڭ ارقاسىندا كولىكتى باسقارعان ادامنىڭ ۇيىقتاپ كەتۋ فاكتىسىنە ورىن جوق» دەدى سپيكەر.
