استانا قالاسىندا جاستار مەن جاسوسپىرىمدەردىڭ بولاشاقتا جان-جاقتى ءبىلىمدى, مادەنيەتتى, ەڭ باستىسى تاربيەلى ءارى قنەرلى بوپ قالىپتاسۋىنا وڭ ىقپالىن تيگىزەتىن اۋلا كلۋبى كوپ. بۇگىندە ولاردىڭ جالپى سانى – 25. بۇل اۋلا كلۋبتارىنا ەلورداداعى 7 جاستان 29 جاسقا دەيىنگى بالالار مەن جاستار اراسىنان 3100-گە جۋىق تاربيەلەنۋشى قاتىسادى. وندا 124 ۇيىرمە مەن سەكتسيا جۇمىس ىستەيدى. ونىڭ ىشىندە بوكس, كاراتە, ءتۇرلى بي ۇيىرمەلەرى, سۋرەت سالۋ, قولونەر, باعدارلامالاۋ جانە تىلدەرگە وقىتۋ سىندى 68 سپورتتىق سەكتسيا جانە 56 شىعارماشىلىق ۇيىرمە بار. ەلوردادا بالالار مەن جاسوسپىرىمدەردىڭ دەمالىسىن پايدالى وتكىزۋ ءۇشىن 25 اۋلا كلۋبى جۇمىس ىستەيدى. ولاردىڭ نەمەن اينالىساتىنى تۋرالى ونلاين-بريفينگتە استانا قالاسى جاستار ساياساتى ماسەلەلەرى باسقارماسىنىڭ باسشىسى قايرات قامباروۆ مالىمدەدى.
«اۋلا كلۋبتارى» الەۋمەتتىك جوباسى ەلوردادا سوڭعى سەگىز جىل ىشىندە تۇراقتى نەگىزدە جۇزەگە اسىپ كەلەدى. ونىڭ جۇمىسى تۇرعىلىقتى جەرى بويىنشا بالالار مەن جاسوسپىرىمدەردىڭ بوس ۋاقىتىن ءتيىمدى پايدالانۋعا باعىتتالعان.
– اۋلا كلۋبتارىنىڭ قىزمەتى جاستار مەن جاسوسپىرىمدەر اراسىنداعى قىلمىستى ازايتۋعا, بالالاردىڭ دەنساۋلىعىن جاقسارتۋعا جانە ولاردىڭ ۋاقىتىن پايدالى وتكىزۋگە تىكەلەي اسەر ەتەدى, سونداي-اق پاتريوتيزمنىڭ دامۋىنا ىقپال ەتەدى. جىل سايىن وتەۋسىز نەگىزدە اۋلا كلۋبتارىندا حالىقتىڭ الەۋمەتتىك وسال توپتارىنان, الەۋمەتتىك از قامتىلعان وتباسىلاردان شىققان جۇزدەگەن بالا تاربيەلەنەدى. سونداي-اق قالالىق ىشكى ىستەر دەپارتامەنتىنىڭ يۋۆەنالدى پوليتسيا بولىمشەسىندە ەسەپتە تۇرعان كامەلەتكە تولماعاندار اۋلا كلۋبتارىنا بارادى, – دەدى قايرات قامباروۆ.
ەلوردانىڭ 25 اۋلا كلۋبىنا 7 جاستان 29 جاسقا دەيىنگى بالالار مەن جاستار اراسىنان 3100-گە جۋىق تاربيەلەنۋشى قاتىسادى. وندا 124 ۇيىرمە مەن سەكتسيا جۇمىس ىستەيدى. ونىڭ ىشىندە 68 سپورت سەكتسياسى جانە 56 شىعارماشىلىق ۇيىرمە بار: بوكس, كاراتە, ءتۇرلى بي ۇيىرمەسى, سۋرەت سالۋ, قولونەر, باعدارلامالاۋ جانە ءتىل وقىتۋ.
وتكەن جىلى استانانىڭ ەسىل, سارىارقا جانە الماتى اۋداندارىندا 3 جاڭا اۋلا كلۋبى اشىلدى. جەلتوقسان ايىنىڭ سوڭىندا «جاس قانات», «استانا», «بايتەرەك» اۋلا كلۋبتارىندا جوندەۋ جۇمىسى اياقتالدى.
– 2022 جىلى جالپى سانى 3000 ادامدى قامتيتىن 20-عا جۋىق ءىس-شارا وتكىزىلدى. مىسالى, ەلوردادا شاحمات, سپورت جانە شىعارماشىلىق باعىت بويىنشا تۋرنيرلەر, كونتسەرتتەر ءوتىپ تۇرادى. وسى جىلدىڭ باستى ماقساتى – اۋلا كلۋبتارىنىڭ سانىن كوبەيتۋ جانە ساپاسىن ارتتىرۋ. بۇل باعىتتا جۇمىس بيىل دا جالعاسادى, – دەدى باسقارما باسشىسى.
قازىرگى تاڭدا بالانىڭ قىزىعۋشىلىعىنا سەپتىگىن تيگىزىپ, يكەمىنە قاراي جاڭا قىرىنان تانىلۋىنا, ومىرلىك جولىن انىقتاۋدا اۋلا كلۋبتارىنىڭ ماڭىزى زور. بۇل جاستار مەن جاسوسپىرىمدەردىڭ بولاشاقتا جان-جاقتى, ءبىلىمدى, مادەنيەتتى, ەڭ باستىسى كورەگەندى ءارى تاربيەلى بوپ قالىپتاسۋىنا وڭ ىقپالىن تيگىزەدى. سەبەبى اۋلا كلۋبتارىنا قاتىسقان بالالاردىڭ باسىم بولىگى جان-جاقتى دامىپ قانا قويماي, رۋحاني دەم الادى جانە قوعامدىق شارالارعا ءوز ۇلەسىن قوسىپ كەلەدى.
باسقارما باسشىسىنىڭ ايتۋىنشا, ەلوردا اۋلا كلۋبتارىنىڭ تاربيەلەنۋشىلەرى بولگاريا, ارمەنيا, قىرعىزستان, وزبەكستان, رەسەي, يتاليادا جانە ەلىمىزدە وتكەن جارىستاردىڭ جۇلدەگەرى اتاندى.
