استانا كۇنىنە ارنالعان مەرەكەلىك شارالار اياسىندا بۇگىن «ايالاعان استانا» رەسپۋبليكالىق ءان بايقاۋىنىڭ جەڭىمپازى انىقتالدى. ەندى «ارتەك» لاگەرىندەگى بالالاردىڭ «جاڭا تولقىن-2016» حالىقارالىق كونكۋرسىندا ەل نامىسىن استانالىق جانەل سادۋاقاس قورعايتىن بولدى.
استانا قالاسى اكىمدىگىنىڭ قولداۋىمەن وسىمەن ءتورتىنشى رەت شىمىلدىعىن تۇرگەن ءداستۇرلى مۋزىكالىق جوبانىڭ اقتىق كەزەڭىنە قازاقستاننىڭ تۇكپىر-تۇكپىرىنەن كەلگەن 11 بالا قاتىستى. ءبىر-ءبىر اننەن ورىنداعان ۇمىتكەرلەردىڭ ونەرىن قازاقستاندىق ەسترادا انشىلەرى قۇرماش ماحانوۆ, گۇلنۇر ورازىمبەتوۆا, سەرىك يبراگيموۆ, سونداي-اق «نوۆايا ۆولنا» جانە «دەتسكايا نوۆايا ۆولنا» كونكۋرستارىنىڭ ديرەكتورى الەكساندر رۋميانتسەۆ پەن «ايالاعان استانا» ءان بايقاۋىنىڭ باس پروديۋسەرى لينا اريفۋلينا 10 ۇپايلىق جۇيەمەن باعالادى.
جاس تالانتتاردى تانىتاتىن تەلەۆيزيالىق جوبا «قازاقستان» ۇلتتىق تەلەارناسىنىڭ تىكەلەي ەفيرىندە كورسەتىلدى. تارتىستى بايگەدە ماريا زاتۆارنيتسكايا (پاۆلودار), نۇرداۋلەت تىلەكقابىل (اتىراۋ) جانە ارۋجان ساعىنعاليەۆا(ماڭعىستاۋ وبلىسى) ەڭ جوعارى كورسەتكىش – 50 بالل جينادى. الايدا كورەرمەندەر بەرگەن sms-داۋىستاردىڭ ارقاسىندا استانالىق جانەل سادۋاقاس جالپى ۇپاي سانى بويىنشا بارىنەن توپ جاردى. وعان جەڭىس اكەلگەن باكىر تاجىباەۆتىڭ سوزىنە جازىلعان سەيدوللا بايتەرەكوۆتىڭ ءانى – ء«اليا». قازىلار القاسىنىڭ ايتۋىنشا, جانەل ايگىلى ء«اليا» انىنە وزىندىك بوياۋىن بەرىپ, ادەمى ميليزمدەردى قوسىپ, زاماناۋي تۇردە شىرقادى.
بايقاۋ شارتى بويىنشا قاتىسۋشىلار «Red Jam» مۋزىكالىق توبىنىڭ سۇيەمەلدەۋىمەن جاندى داۋىستا ءان سالعان بولاتىن.
ء«ارتىستى تاڭداۋ وڭايعا سوققان جوق. تالاپتارى تاۋداي, تالانتتارى ۇلكەن ءۇمىت كۇتتىرەتىن بالالار ەكەن. ماسەلەن, ارۋجان ءبارىمىزدى ورنىمىزدان تىك تۇرعىزىپ, زور قوشەمەتىمىزگە بولەندى» دەپ تامساندى جاس ونەرپازداردىڭ ورىنداۋشىلىعىنا الەكساندر رۋميانتسەۆ.
ءوزىنىڭ كەڭ دياپازونىمەن جۇرتتى ءتانتى ەتكەن ارۋجان ساعىنعاليەۆا دا جۇلدەدەن قۇر قالمادى. ول «قازاقستان» رەسپۋبليكالىق تەلەراديوكورپاراتسياسىنىڭ ارنايى جۇلدەسىمەن ماراپاتتالدى.
ءمادينا جاقىپ
