بوتاگوز ءجۇنىسوۆا,
استانا قالاسى ءبىلىم باسقارماسى ورتا جانە مەكتەپكە دەيىنگى ءبىلىم بەرۋ ءبولىمىنىڭ باستىعى:
– جەلتوقساننىڭ ەكىنشى جارتىسىندا اۋا تەمپەراتۋراسىنىڭ 40 گرادۋسقا دەيىن تومەندەۋى حالىقتى ءبىراز ابىگەرگە سالعانى راس. الايدا, ارقادا ايازدىڭ بۇلايشا كۇرت كوتەرىلۋى – قالىپتى جاعداي. مۇنداي ايازدا ساباقتىڭ توقتاتىلۋى دا ۇيرەنشىكتى ءجايت. ءبىلىم باسقارماسىندا اياز كۇشەيگەن كەزدە ساباقتىڭ بولمايتىندىعى تۋرالى اتا-انالارعا الدىن الا حابارلاپ وتىراتىن ارنايى ءبولىم جۇمىس ىستەيدى. اۋا تەمپەراتۋراسىنىڭ كۇرت تومەندەۋىنە بايلانىستى ايدىڭ ەكىنشى ونكۇندىگىندە استانا مەكتەپتەرىندە ساباق ۋاقىتشا توقتاتىلعان بولاتىن. ناقتىراق ايتساق, 10 جەلتوقسان كۇنى تەك 1-4 سىنىپ وقۋشىلارى, 11-13-ءى ارالىعىندا – 1-9 سىنىپ وقۋشىلارى, ال, 14-ىنەن باستاپ بارلىق اۋىسىمدا وقيتىن بالالار مەن كوللەدجدىڭ 1-2 كۋرس ستۋدەنتتەرى ساباققا جىبەرىلگەن جوق. 20 جەلتوقسان كۇنى ءبىرىنشى اۋىسىمداعى –1-9 سىنىپ, ەكىنشى اۋىسىمداعى 1-4 سىنىپ وقۋشىلارىنىڭ ساباعى توقتاتىلدى. ال, كەشە بارلىق مەكتەپ ءوز جۇمىسىن باستادى. كەيبىر اتا-انالار بالالارىنىڭ وقۋ باعدارلاماسىنان قالىپ قويۋىنا الاڭداۋشىلىق ءبىلدىرىپ جاتىر. بىراق, وعان ەشقانداي نەگىز جوق دەر ەدىم. ويتكەنى, ءبىز ونىڭ ءبارىن الدىن الا ەسكەرەمىز. ايازدى كۇندەرى توقتاتىلعان وقۋ باعدارلاماسىن كۇندەلىكتى وتەتىن ساباققا جۇكتەمە ەتىپ بەكىتەمىز. ياعني, ءبىر ساباقتا ەكى تاقىرىپتى قامتۋعا تىرىسامىز. قالىپ قويعان وقۋ باعدارلاماسىن قۋىپ جەتۋدىڭ ەڭ ءتيىمدى ءتاسىلى دە – وسى.
گۇلنار امانعۇلوۆا,
استانا قالاسىنىڭ تۇرعىنى:
– 4, 6-سىنىپتاردا وقيتىن ەكى بالام بار. اۋا رايىنىڭ قولايسىزدىعىنا بايلانىستى جىل سايىن كەمىندە 15-20 كۇن ساباقتان قالادى. وقۋ باعدارلاماسىنان قالىپ قويۋ بالالارعا دا, مۇعالىمدەرگە دە وڭاي سوقپاسى انىق. سوندىقتان, مۇنداي ساباقتاردى مەڭگەرۋدىڭ ەكى جاققا دا ءتيىمدى ءتاسىلىن قاراستىرعان ءجون. كەي اتا-انالار اياز سالدارىنان وتپەي قالعان ساباقتى وقۋشىلاردىڭ جازعى دەمالىسىن قىسقارتۋ ەسەبىنەن تولىقتىرۋ كەرەك دەگەن پىكىر ايتىپ ءجۇر. ءوز باسىم بۇعان قارسىمىن. وقۋشىلاردىڭ دەمالىسىن جاز مەزگىلىنە ورايلاستىرۋ مەديتسينالىق تۇرعىدان ءتيىمدى ەكەندىگى دالەلدەنگەن. دەمالىس مەزگىلىنىڭ قىسقارۋى بالالارعا فيزيولوگيالىق تۇرعىدان دا, پسيحولوگيالىق تۇرعىدان دا كەرى اسەرىن تيگىزەدى. وتىلمەگەن ساباقتىڭ ورنىن سەنبى-جەكسەنبى كۇننىڭ ەسەبىنەن تولىقتىرۋ دا دۇرىس ەمەس. بالانىڭ اعزاسىنا, ويلاۋ جۇيەسىنە تىم ارتىق سالماق سالۋى مۇمكىن. دەمەك, قالىپ قويعان تاقىرىپتاردى كۇندەلىكتى وتەتىن ساباقپەن قاتار يگەرگەن ءجون.
شىنار دوسان
