ازاماتتار سەنىمى ماڭىزدى اسپەكت
كەشە استانادا قر ادىلەت ءمينيسترى بەرىك يماشەۆ حالىققا ەسەپ بەرۋ كەزدەسۋىن وتكىزدى.
مينيستر رەەسترگە سايكەس ادىلەت مينيسترلىگىنىڭ قۇزىرىنا مەملەكەتتىك قىزمەتتىڭ 53 ءتۇرى بەكىتىلىپ, ونىڭ ىشىندە مينيسترلىكپەن تىكەلەي 40 قىزمەت ءتۇرى كورسەتىلەتىنىن, 9 جەرگىلىكتى اتقارۋ ورگاندارىمەن جانە ءتورت قىزمەت «ۇكىمەت ازاماتتار ءۇشىن» مەملەكەتتىك كورپوراتسياسىمەن اتقارىلاتىنىن اتاپ ءوتتى. وسى رەتتە مەملەكەت باسشىسىنىڭ تاپسىرماسى بويىنشا, مەملەكەتتىك قىزمەتتەردى كورسەتۋ تيىمدىلىگىن ارتتىرۋ باعىتىنداعى جۇيەلى جۇمىستار جۇرگىزىلىپ جاتقاندىعىن جەتكىزدى.
حالىق ءۇشىن مەملەكەتتىك قىزمەتتەر ساپاسىن ارتتىرۋ سىبايلاس جەمقورلىققا قارسى ءىس-قيمىلدىڭ جانە مەمورگاندار قىزمەتىنە ازاماتتاردىڭ سەنىم ارتتىرۋدىڭ ماڭىزدى اسپەكتىسى بولىپ تابىلادى, دەپ اتاپ ءوتتى ب. يماشەۆ.
حالىقارالىق كەلىسىمدەر مەن حالىقارالىق ۇيىمدار شەشىمدەرىنە توقتالعان مينيستر: «بۇگىندە سىرتقى ىستەر مينيسترلىگىنىڭ مالىمەتى بويىنشا قازاقستاندىق شارتتىق بازا 3683 حالىقارالىق كەلىسىمدەردى قامتىپ وتىر. سونىمەن بىرگە ەلىمىزدىڭ پارلامەنتىمەن راتيفيكاتسيالانعان 1190 كەلىسىم زاڭ ءۇستى باسىمدىعىنا يە. بىزگە زاڭگەرلىك ساراپتاماعا جىل سايىن 70 زاڭ جوباسى 2 مىڭعا جۋىق پرەزيدەنتتىڭ جانە ۇكىمەتتىڭ اكتىلەرى جوبالارى, سونداي-اق 10 مىڭنان استام ورتالىق جانە جەرگىلىكتى ورگانداردىڭ نورماتيۆتىك-قۇقىقتىق اكتىلەرى كەلىپ تۇسەدى» دەدى مينيستر.
ءمينيستردىڭ مالىمدەۋىنشە, حالىقارالىق ىنتىماقتاستىقتى قۇقىقتىق قامتاماسىز ەتۋ اياسىندا 2015 جىلى مينيسترلىك قاراۋىنا شارتتاردى بەكىتۋ ماسەلەلەرى بويىنشا حالىقارالىق كەلىسىمدەر مەن نورماتيۆتىك-قۇقىقتىق اكتىلەردىڭ 711 جوباسى ەنگىزىلگەن.
بوتاگوز ماراتقىزى