استانادا ۇلى جەڭىستىڭ 70 جىلدىعىنا ارنالعان «اجالدى جەڭگەن پولك» اتتى پاتريوتتىق شارا وتەدى.
استانا قالاسى اكىمدىگى جانە «جاس وتان» جاستار قاناتىنىڭ قولداۋىمەن وتەتىن ايتۋلى شارا جونىندە نەگىزگى ۇيىمداستىرۋشىلاردىڭ ءبىرى – استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگىنىڭ توراعاسى سەرىك كەنجەبەكوۆ تۇسىنىك بەردى:
«اجالدى جەڭگەن پولك» («بەسسمەرتنىي پولك») اكتسياسىنىڭ باستى ماقساتى – سوعىس بارىسىندا قازا تاپقان وتانداستارىمىزعا تاعزىم جاساۋ. اتاپ ايتقاندا, 9 مامىر كۇنى, ياعني جەڭىس مەرەكەسىندە ەلوردامىزداعى «اۋعانستان سوعىسىندا قازا بولعان قازاقستاندىقتار مەموريالى» جانىنان باستالاتىن شەرۋ «وتان قورعاۋشىلار» الاڭىنداعى «وتان انا» ەسكەرتكىشىنە دەيىن بارادى. شەرۋگە قاتىسۋشىلار قولدارىنا ا3 فورماتىندا جاسالعان پورترەتتەر ۇستاپ جۇرەدى. پورترەتتەردە سوعىس كەزىندە, سونىمەن قاتار, بەيبىت ومىردە قايتىس بولعان ۇلى وتان سوعىسى مايدانگەرلەرى مەن اۋعانستاندا ينتەرناتسيوناليستىك بورىشىن وتەۋ بارىسىندا قازا بولعان جاۋىنگەرلەردىڭ سۋرەتتەرى بەينەلەنەدى. مىنە, وسىنداي اكتسيا ارقىلى ءبىز بۇگىنگى جاس ۇرپاققا ارداگەرلەر ەرلىگىن جەتكىزۋدى, سول ارقىلى بارشا قازاقستاندىقتاردىڭ بويىنا وتاندىق پاتريوتيزم سەزىمىن دارىتا ءتۇسۋدى كوزدەيمىز. تاعى ءبىر ايتارىمىز, وسىنداي اكتسيانى ەلىمىزدىڭ باسقا قالالارىندا دا وتكىزۋ جوسپارلانىپ وتىر».
اۋعانستان سوعىسى ارداگەرلەرى ۇيىمدارىنىڭ باستاماسىمەن وتكىزىلەتىن ايتۋلى وسىنداي پاتريوتتىق اكتسياعا قالامىزدىڭ كەز كەلگەن تۇرعىنى قاتىسا الادى. ول ءۇشىن 9 مامىر كۇنى ۇلى وتان سوعىسىنا قاتىسقان مايدانگەر اتاڭىزدىڭ نەمەسە اۋعانستان سوعىسىندا قازا بولعان اعاڭىزدىڭ سۋرەتىن ا3 فورماتىنا ءتۇسىرىپ, شەرۋگە قوسىلىڭىز. بۇل ءسىزدىڭ وتان ءۇشىن وت كەشكەن جاقىنىڭىزعا دەگەن زور قۇرمەت بولماق.
عالىم قوجابەكوۆ
