«ازيا جاڭعىرىعى» تسيرك جاڭالىقتارىنا تولى

استانا تويىنا وراي وتەتىن بيىلعى «ازيا جاڭعىرىعى» فەستيۆالى 1-8 شىلدە ارالىعىندا استانالىق تسيرككە كورەرمەندەرىن شاقىرادى.

استانالىق تسيرك مانەجىندە استانا تۇرعىندارى مەن قوناقتارىنا رەسەي, قىتاي, موڭعوليا, ۆەتنام, بەلارۋس, ياكۋتيا, ۋكراينا, وزبەكستان جانە قازاقستاننىڭ ارتىستەرى ونەر كورسەتەدى. ولاردىڭ كوبى – بۇكىلالەمدىك فەستيۆال جەڭىمپازدارى مەن لاۋرەاتتارى, ءوز جانرلارىنىڭ حاس شەبەرلەرى, تسيرك اۋلەتىنىڭ ۇرپاقتارى. فەستيۆال باعدارلاماسى ءار قاتىسۋشى مەملەكەت بىرىگۋ ارقىلى ۇلتتىق تسيرك ەرەكشەلىكتەرىن ورتاعا سالاتىن «جاندى» ءارى بىرەگەي شوۋعا قانىق.
«ازيا جاڭعىرىعى» حالىقارالىق تسيرك ونەرى فەستيۆالىنىڭ ايتۋلى ۋاقيعاسى – فەستيۆال قاتىسۋشىلارىنىڭ ۇرمەلى وركەستر سۇيەمەلدەۋىمەن ەلوردا كوشەلەرىندەگى «كاۆالكادا» مەرەكەلىك شەرۋى. 30 ماۋسىم كۇنى ساعات 18:00-دە وتەتىن كاۆالكادا باعدارى: استانالىق تسيرك – سارىارقا داڭعىلى – بوگەنباي باتىر داڭعىلى – رەسپۋبليكا داڭعىلى – استانالىق تسيرك.
تسيرك قويىلىمدارى فەستيۆالى ادەتتەگىدەي قىزىقتى دا اسەرلى بولماقشى.
ايتا كەتەرلىگى, قازىلار مەن قۇرمەتتى قوناقتار قۇرامىندا استانالىق تسيركتىڭ باس ديرەكتورى, قازاقستاننىڭ ەڭبەك سىڭىرگەن ءارتىسى ەرىك جولجاقسىنوۆ, رەسەيلىك «روسگوستسيرك» كومپانياسىنىڭ باس ديرەكتورى ۆاديم گاگلوەۆ, رەسەي حالىق ءارتىسى, ماسكەۋلىك ۇلكەن تسيركتىڭ باس ديرەكتورى ەدگار زاپاشنىي, نيكۋلين اتىنداعى ماسكەۋ تسيركىنىڭ باس ديرەكتورى ماكسيم نيكۋلين, ۋكراينا مەملەكەتتىك تسيرك كومپانياسىنىڭ باس ديرەكتورى يگور حلەبوسولوۆ, قازاقستاننىڭ ەڭبەك سىڭىرگەن ءارتىسى قادىرحان بۋليبەكوۆ, قازان مەملەكەتتىك تسيركىنىڭ ديرەكتورى, تاتارستاننىڭ ەڭبەك سىڭىرگەن مادەنيەت قىزمەتكەرى دامير شاريفۋللين, ساحا رەسپۋبليكاسى مەملەكەتتىك تسيرك ديرەكتورى (ياكۋتيا) سەرگەي راستورگۋەۆ, ۆەتنام تسيركى ديرەكتورىنىڭ ورىنباسارى Thai Ngoc Anh بار.