جاڭالىقتار

بابالار ءداستۇرىنىڭ بايقاۋى

جۋىردا تىلدەردى دامىتۋ باسقارماسىنىڭ ۇيىمداستىرۋىمەن اتا-انالار اراسىندا «وتان وتباسىنان باستالادى» اتتى قالالىق بايقاۋ وتكىزىلگەن ەدى.

جاھاندانۋ ۇدەرىسىنە قالاساڭ دا, قالاماساڭ دا كيلىگىپ كەتىپ وتىرعان بۇگىنگى تاڭدا ءوز ۇلتىن, مەملەكەتىن, ءتىلىن, ءدىلىن سۇيەتىن ۇرپاقتى تاربيەلەپ شىعارۋ, پا­تريوت ازامات ەتىپ قالىپتاستىرۋ وڭاي شارۋا ەمەس. قازاقتىڭ ۇلتتىق سالت-ءداستۇرىن, ادەت-عۇرپىن, جەتى اتاسىن ساناسىنا قۇيىپ وتىرۋ – تەك اجەلەردىڭ مىندەتى ەمەس, اتى قازاقتىڭ قاسيەتتى پارىزى.

اتالمىش بايقاۋدىڭ دىتتەگەنى دە – سول ۇلتجاندىلىققا باۋلۋ. بۇل بايقاۋعا قالامىزدان 39 وتباسىنان ءوتىنىش تۇسكەن. بىرنەشە كەزەڭدىك ىرىكتەۋدەن سوڭ 11 وتباسى قالدى.

بايقاۋعا قاتىسۋشىلار ۇلتتىق سالت-داستۇرلەرگە بايلانىستى سۇراقتارعا جاۋاپ بەرىپ, حالقىمىزدىڭ ماقال-ماتەلدەرىن ايتۋدان جارىستى. ءوز ونەرلەرىن ورتاعا سالىپ, كەش كورىگىن قىزدىردى.

ۇمىتكەرلەردىڭ ءبىلىمى مەن ونەرىنە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ءتىلى كافەدراسىنىڭ پروفەسسورى, فيلولوگيا عىلىمدارىنىڭ دوكتورى تىلەۋلەس ابدىعالي, بەلگىلى ايتىسكەر اقىن سەرىكزات دۇيسەنعازين, 2008 جىلى وتكەن «قارتتارىم – اسىل قازىنام» بايقاۋىنىڭ جەڭىمپازى, ءتىل جانا­شىرى ءالي قاجى قاڭتارباەۆ باعا بەردى.

بايقاۋ قورىتىندىسى بويىنشا №48 مەكتەپتىڭ اتىنان شىققان جاسحايىر قاراعويشيننىڭ وتبا­سى جەڭىمپاز اتاندى. ءىى ورىندى – №55 «مەرەي» بالاباقشاسىنىڭ اتىنان كەلگەن عابيت سارسەنباەۆ, ءىىى ورىندى – №60 مەكتەپ-ليتسەيىنەن قاتىسقان مۇحتار بايبوسىن جانە №62 «نۇرساۋلە» بالاباقشاسىنىڭ وكىلى ءساندىباي كۇمىسبەكوۆتىڭ وتباسى يەلەندى.

بايقاۋ جەڭىمپازدارى ارناۋ­لى ديپلومدارمەن جانە باعالى سىيلىقتارمەن ماراپاتتالدى.

جينالعان قاۋىم الداعى جىلدارى جارىسقا وتباسىلاردىڭ كوپ قاتىسۋى ءۇشىن جاعداي جاسالسىن دەگەن ۇسىنىس ءبىلدىردى.

شىنار ءابىلدا

تاعىدا

ۇقساس جاڭالىقتار

پىكىر ۇستەۋ

Back to top button