«استانا سۋ ارناسى» مكك سۋ-كارىزدەندىرۋ قىزمەتتەرىنىڭ تاريفتەرى ءوسۋىنىڭ سەبەپتەرىن تۇسىندىرۋگە رنالعان «دوڭگەلەك ۇستەل» وتكىزدى.
قازاقستان رەسپۋبليكاسى تابيعي مونوپوليالاردى رەتتەۋ اگەنتتىگىنىڭ استانا قالاسى بويىنشا دەپارتامەنتىنىڭ 2011 جىلعى 25 شىلدەدەگى بۇيرىعىنا سايكەس, 2012 جىلدىڭ 1 قىركۇيەگىنەن باستاپ تۇتىنۋشىلاردىڭ توبى بويىنشا جانە جەكەلەگەن سۋدى ەسەپتەۋدىڭ قۇرىلعىلارى بار جەكە تۇلعالارعا سۋدى تۇتىنۋدىڭ مولشەرى بويىنشا سارالانعان كەسىمدى اقىنىڭ شەكتەۋلى دەڭگەيى ەنگىزىلگەن ەدى. ءۇش جىلدىق كەزەڭگە, 2011-2014 جىلعا ارنالعان ينۆەستيتسيالىق باعدارلاماداعى تاريف بويىنشا تۇتىنىلعان سۋ ءۇشىن استانالىقتار مىناداي تاريف بويىنشا تولەپ كەلدى. ماسەلەن, پاتەرىندە سۋ ەسەپتەۋ قۇرالدارى بار, ايىنا 1ادام 3م3 دەيىن سۋ پايدالانسا – ەڭ تومەنگى تاريف بويىنشا – تەكشە مەترگە 30,36 تەڭگە. سۋدى تۇتىنۋ كولەمى ايىنا 1 ادامعا 3 م3 اساتىن تۇرعىنداردى ەكىنشى توپقا ءبولىپ, ورتاشا تاريفتەر بويىنشا – تەكشە مەترگە 36,43 تەڭگە تولەسە, سۋ ەسەپتەۋ قۇرالدارى جوق تۇرعىندار 3-توپتاعى ەڭ جوعارعى تاريفتەر بويىنشا ءار تەكشە مەترگە 43,72 تەڭگە تولەيتىن. ەندى جاڭا تاريف بويىنشا: ءبىرىنشى توپتاعى تۇتىنۋشىلار ءبىر ادامعا شاققانداعى 3 تەكشە مەتر سۋ ءۇشىن – 34,91 تەڭگە, ودان ارتىق تۇتىنسا – 41,9, ال ەسەپتەۋ قۇرالدارى جوق تۇتىنۋشىلار – 52,72 تەڭگە تولەيدى. بۇل قوسىمشا قۇن سالىعىن قوسا ەسەپتەگەندەگى باعالار.
جاڭا تاريف بويىنشا 2-توپتاعى بيۋدجەتتىك مەكەمەلەر, جىلۋ ەنەرگياسىن ءوندىرۋ, تاراتۋ بويىنشا قىزمەتىن كورسەتەتىن مەكەمەلەر – 104,99 تەڭگە, ال 1جانە 2-توپقا جاتپايتىن زاڭدى تۇلعالار 125,38 تەڭگە تولەيدى.
كارىز قىزمەتىنىڭ باعالارى جالپىعا بىردەي 21,06 تەڭگەدەن 24,21 تەڭگەگە دەيىن وسپەك. 2-توپتاعى تۇتىنۋشىلار ءار تەكشە مەتر سۋعا – 104,03 تەڭگە, 3-توپتاعىلار – 113,39 تەڭگە تولەيتىن بولادى. بۇل باعالار كەلەسى جىلدىڭ قىركۇيەگىنە دەيىن وزگەرتىلمەيدى.
قازىرگى ۋاقىتتا «استانا سۋ ارناسى» مكك 2011-2014 جىلعا ارنالعان ينۆەستيتسيالىق باعدارلامانى جۇزەگە اسىرۋ ۇستىندە. بۇل باعدارلامانىڭ اياسىندا وندىرىستىك- بۇرعىلاۋ كەشەنى, زەرتحانا, سۋمەن جابدىقتاۋ جانە كارىزدەۋ جەلىسى سورعى ستانسالارىنداعى جوعارى كەرنەۋلىك جابدىقتار اۋىستىرىلعان. الدىمىزداعى جىلدارى كولىك پەن ارنايى مەحانيزمدەردى ساتىپ الۋ, ەسكىرگەن ەنەرگەتيكالىق قۇرىلعىنى اۋىستىرۋ قاراستىرىلۋدا. جەلىلەردى اۋىستىرۋ جانە جوندەۋ كاسىپورىننىڭ نورماتيۆتىك تەحنيكالىق شىعىنداردىڭ ازايۋىنا جاردەمدەسىپ قالانى ساپالى سۋمەن جابدىقتاۋ ساپاسىن جاقسارتا تۇسەدى.
ايگۇل ۋايسوۆا
