باعدات قوجامباەۆ, قازاقستاننىڭ مادەنيەت قايراتكەرى: «قاراتورعايدى» قىتايدا قالىقتاتتىق
ەلورداداعى مەملەكەتتىك فيلارمونيانىڭ كامەرالىق حورى اسپان استى ەلىندە وتكەن ىح حالىقارالىق حور فەستيۆالىندە التىن مەدالدى قانجىعالاپ قايتتى. بۇل – باس قالاداعى ونەرگە دەگەن قامقورلىقتىڭ ناتيجەسى. ءسۇيىنشىلى وقيعادان كەيىن, اراعا كوپ ۋاقىت سالماي حور ءارتىسى, قازاقستاننىڭ مادەنيەت قايراتكەرى باعدات قوجامباەۆتى بىرەر ساۋالىمەن مازالاعان ەدى ءتىلشىمىز. شاعىن سۇحباتتى وقىرماندار نازارىنا ۇسىنعاندى ءجون كوردىك.
– باعدات قۋاتۇلى, جەڭىستەرىڭىز قۇتتى بولسىن! جۇلدەگە العان التىندارىڭىزدىڭ سالماعى قانشالىقتى؟
– راسىن ايتسام, بۇل جەڭىس حور مۇشەلەرىنىڭ ءبىرىنىڭ دە تۇسىنە كىرگەن جوق بولاتىن. ءۇشىنشى ورىندى باعىندىرساق تا, قاناعات تۇتىپ, قۋانىپ قايتار ەدىك. بىراق, ءبىز جەرگىلىكتى ۇلت «دۇنيەجۇزىلىك حور ءسامميتى» اتاپ كەتكەن ونەر دوداسىنىڭ بيىگىن باعىندىردىق!
– شارا جونىندە, ساحناداعى باسەكەلەستىرىڭىز تۋرالى تاعى كەڭىرەك توقتالىپ وتسەڭىز…
– ەكى جىلدا ءبىر رەت بەيجىڭدە وتەتىن مۋزىكالىق فورۋمعا بۇل جولى 67 ەلدەن جانە قىتاي پروۆينتسيالارىنان 167 حور ۇجىمى قاتىستى. ۇجىمدار كاسىبي جانە اۋەسقوي, ەرلەر, ايەلدەر, ستۋدەنتتەر, بالالار حورى بويىنشا سىنعا ءتۇستى. باقتالاستارىمىز دا وسال ەمەس.
ءبىر ايتا كەتەرلىگى, فەستيۆال باسقا ەلدەردەگى ارىپتەستەرىمىزبەن تانىسىپ, قىزىقتى جوبالارعا قاتىسۋعا مۇمكىندىك بەردى. اسىرەسە, امەريكا, رەسەي, يندونەزيا, موڭعوليا ەلدەرىنەن كەلگەن ۇجىمداردىڭ, حەنان پروۆينتسياسىنداعى بالالار حورىنىڭ ونەرى ەستە قالدى.
– حالىقارالىق دودادا قازاقتىڭ قانداي شىعارمالارىن ورىندادىڭىزدار؟
– قىتايلىقتار مۋزىكاعا وتە قۇمار جانە سەزىمتال حالىق قوي. ولار ءبىز ونەر كورسەتەردىڭ الدىنداعى ازىرلىك كەزىندە قىزعۋشىلىقپەن ىنتا كورسەتتى, بىزدەرمەن بىرگە سۋرەتكە ءتۇستى. ال حور ەڭبەك ەرى, بەلگىلى كومپوزيتور ەركەعالي راحماديەۆتىڭ «قامار سۇلۋ» وپەراسىنان تراگەديالىق ءۇزىندى ورىندادى. كورەرمەندەر ورىندارىنان تۇرىپ تىڭدادى. سونىمەن قاتار بىزدەر اسپان استى ەلىنىڭ ۇلى قىتاي قورعانى, تىيىم سالىنعان قالا, اسپان حرامى سياقتى كورنەكتى ورىندارىندا بولدىق. قىتايدىڭ ەجەلگى مادەنيەتىمەن ەتەنە تانىستىق. قىتاي قورعانىندا ءبىزدىڭ حور ۇجىمى قازاقستاننىڭ ءانۇرانىن ورىنداعاندا, قىتايلىقتار دۋ قول شاپالاقتادى, سوسىن بي ىرعاعىندا «قاراتورعايدى» شىرقادىق.
