باستى اقپاراتقالا مەن سالا

بايقوڭىر – بەرەكەلى ىستەر بەلدەۋى

استانا قالاسىنداعى بايقوڭىر اۋدانىنىڭ قۇرىلعانىنا بيىل 6 جىلعا جۋىقتادى. كۇن ساناپ كوركەيگەن اۋداننىڭ جىل سايىن ماڭىزى ارتىپ, مارتەبەسى وسۋدە. جالپى اۋدانى 18129 گەكتاردى قۇرايدى. تۇرعىندار سانى – 237498 ادام. اۋدان اۋماعىندا «ءوندىرىس», «كيرپيچنىي», «كازگورودوك» تۇرعىن الاپتارى جانە 12 ساياجاي قاۋىمداستىعىنان تۇراتىن «قوياندى» ساياجاي الابى ورنالاسقان.

تۇرعىنداردى قابىلداۋ جالعاسۋدا

«حالىق ۇنىنە قۇلاق اساتىن مەملەكەت» تۇجىرىمداماسى اياسىندا تۇرعىنداردى قابىلداۋ ءىس-شاراسى جالعاسۋدا.

تۇرعىنداردى جەكە قابىلداۋ اپتا سايىن اۋدان اكىمى تالعات راحمانبەردىنىڭ قاتىسۋىمەن وتەدى. قابىلداۋ بارىسىندا اۋدان تۇرعىندارى وزدەرىن تولعاندىراتىن سۇراعىن قويىپ, تۋىنداعان ماسەلەنى سول جەردە شەشۋگە تىرىسادى. ماسەلەن, وسى اپتادا وتكەن قابىلداۋ بارىسىندا الەۋمەتتىك كومەك, سانيتارلىق تازالىق, ەلەكتر جانە جىلۋمەن قامتاماسىز ەتۋ, ميب جانە پيك ۇيىمدارىنا قاتىستى بىرقاتار ماسەلە كوتەرىلدى. تۇرعىندار تاراپىنان قويىلعان بارلىق سۇراققا ءتيىستى جاۋاپ بەرىلدى, قوسىمشا قاراۋدى قاجەت ەتەتىن كەيبىر سۇراقتار باقىلاۋعا الىندى.

وتكەن جىلدىڭ باسىنان بەرى تۇرعىنداردان 20 مىڭنان استام ءوتىنىش كەلىپ تۇسكەن. بۇل, نەگىزىنەن, جەكە قابىلداۋلاردا, تۇراقتى جانە كوشپەلى كەزدەسۋلەر بارىسىندا, رەسمي ينتەرنەت-رەسۋرستاردا, سونداي-اق iKomek قالالىق مونيتورينگ جانە جەدەل سۇراق قويۋ ورتالىعىنا كەلىپ تۇسكەن شاعىمدار مەن ۇسىنىس-تىلەكتەر.

– تۇرعىنداردان كەلىپ تۇسكەن وتىنىشتەرگە قاراعاندا, ولاردى كوبىنە تۇرعىن ءۇي-كوممۋنالدىق شارۋاشىلىق, اۋلالاردى اباتتاندىرۋ, قىزمەت كورسەتەتىن ۇيىمداردىڭ جۇمىسى, تۇرعىن ۇيلەردىڭ قاسبەتى مەن شاتىرى, الەۋمەتتىك جانە باسقا دا ماسەلەلەر تولعاندىراتىنى انىقتالدى. جالپى كەلىپ تۇسكەن بارلىق ءوتىنىش بويىنشا ۋاقىتىلى شارالار قابىلدانىپ, تۇسىنىكتەمەلەر بەرىلدى, – دەدى تالعات راحمانبەردى.

كوشە جارىعى – قاۋىپسىزدىك كەپىلى

اۋدان تۇرعىندارىمەن بولاتىن كەزدەسۋلەردە ءجيى كوتەرىلەتىن ماسەلەنىڭ ءبىرى – كوشەلەردى جارىقتاندىرۋ. بۇل رەتتە بايقوڭىر اۋدانىندا ورامىشىلىك جانە كوشەلەردى جارىقتاندىرۋ بويىنشا جۇمىس كۇن سايىن جۇرگىزىلۋدە.

بۇگىنگى تاڭدا جەرگىلىكتى جۇرتشىلىقتىڭ وتىنىشىنە بايلانىستى اۋدان اۋماعىنداعى م.لەرمونتوۆ, ا.يمانوۆ, ا.جۇبانوۆ, ءبيشى قايىڭ, وزەن, كوكسەڭگىر, نايزاتاس كوشەلەرىندە جارىقتاندىرۋ جۇيەلى جۇزەگە استى.

كوشە شامدارى جولاۋشىعا جول كورسەتىپ قانا قويمايدى, كەز كەلگەن ءوڭىردىڭ بەت-بەينەسىن كورسەتەدى, اۋداننىڭ كەلبەتىن ايشىقتايدى. ءىڭىر تۇسكەندە ىسكە قوسىلىپ, جولاۋشىعا, اسىرەسە مەكتەپتەن قايتقان وقۋشىعا تابان جولىن كورسەتىپ, تۇنگى ۋاقىتتا قاۋىپسىزدىككە دە قورعان بولادى. سوندىقتان جارىق ءجۇ­يەسىنىڭ دۇرىس جۇمىس ىستەۋى قاي كەزدە دە ماڭىزدى.

اۋدان بويىنشا كۇندەلىكتى كولىك جانە جاياۋ جۇرگىنشىلەر قوزعالىسىنىڭ قاۋىپسىزدىگىن قامتاماسىز ەتۋ ماقساتىندا كوشەلەر مەن اۋلا اۋماقتارى جارىقتاندىرىلىپ جاتىر. وتكەن جىلى جارىقتاندىرۋ بويىنشا جۇرگىزىلگەن جۇمىس شەڭبەرىندە 205 جارىقتاندىرۋ باعاناسى ورناتىلعان. ەسكىرگەن جارىق شامدارى ايىرباستالىپ, زاماناۋي ديودتى شامدار پايدا بولدى, ەلەكتر ەنەرگياسىن ءتيىمدى پايدالانۋ جانە ۇنەمدەۋ ءۇشىن ەنەرگيا ۇنەمدەيتىن جارىق­ديودتى شامدار ورناتىلۋدا.

– 2023 جىلى اۋداندى جارىقتاندىرۋ بويىنشا جۇرگىزىلىپ جاتقان جۇمىس شەڭبەرىندە 205 جارىقتاندىرۋ باعاناسى ورناتىلدى. ۇزىندىعى 4,5 شاقىرىم قۇرايتىن 10 كۆ كابەل اۋىستىرىلدى. «قۇتقارۋشىلار», «ەسۋ ارناسى», «ۇستازدار», «جەر-انا» اتتى سكۆەرلەرىندەگى كابەلدەر اۋىستىرىلدى. اعىمداعى جىلى 20 جاڭا قوعامدىق كەڭىستىكتە جانە 90 اۋلادا جارىقتاندىرۋ اسپاپتارىن ورناتۋ, توزعان ينجەنەرلىك جەلىلەردى اۋىستىرۋ جوسپارلانۋدا, – دەدى اۋدان باسشىسى.

سونداي-اق تۇرعىن ۇيلەردى ساندىك جارىقتاندىرۋ بويىنشا دا جۇمىس جۇرگىزىلۋدە. بىلتىر اۋدانداعى تۇرعىن ۇيلەردى ءساندى جارىقتاندىرۋ بويىنشا اۋقىمدى جۇمىس جۇزەگە اسىرىلسا, بيىل 30 ۇيدە ساندىك جارىقتاندىرۋ جۇرگىزىلەدى.

كوشەلەردى جارىقتاندىرۋ ءۇشىن قاۋىپسىز ءارى ءتيىمدى ەنەرگيا قوندىرعىلارى ەنگىزىلىپ, اۋداندا اۋقىمدى تىرلىكتەر اتقارىلدى. اسىرەسە ينفراقۇرىلىمدى دامىتۋ, ونىڭ ىشىندە كوشەلەردى جارىقتاندىرۋ, ەلەكتر جەلىلەرىن جاڭعىرتۋ سىندى جۇمىس جۇرگىزىلىپ جاتىر. الداعى ۋاقىتتا جارىق جۇرگىزىلمەگەن كوشەلەر كەزەڭ-كەزەڭىمەن جارىقتان­دىرىلادى.

جاسىل جەلەك جايقالادى

كوگالداندىرۋ بويىنشا وتكەن جىلدارى ءبىراز جۇمىس جۇرگىزىلدى. بيىل بايقوڭىر اۋدانىنىڭ 3 تۇرعىن الابىندا 6500-گە جۋىق اعاش وتىرعىزىلادى.

مەملەكەت باسشىسىنىڭ تاپ­سىرماسى نەگىزىندە بايقوڭىر اۋدانىنىڭ اكىمدىگى مەگاپوليستى كوگالداندىرۋعا جانە كوك جەلەكتى قالاعا اينالدىرۋعا كوپ كوڭىل بولەدى. اۋدان اكىمىنىڭ ايتۋىنشا, بيىل ۇلكەن جۇمىس اتقارىلادى. اۋداننىڭ كوگالدانۋىنا جەرگىلىكتى كاسىپورىندار مەن ۇيىمدار, شوب, كوممۋنالدىق كاسىپورىندار, پيك جانە بەلسەندى تۇرعىندار اتسالىسادى. ماسەلەن, 2022 جىلى اۋدان اۋماعىنا 2 مىڭعا جۋىق اعاش پەن 10 مىڭنان استام كوپجىلدىق بۇتا وتىرعىزىلدى. بىلتىر تاعى 10 مىڭنان اسا بۇتا مەن 3 مىڭ اعاش ەگىلىپ, 22 مىڭ شارشى مەتر گۇلزار جاسالدى, 14 مىڭ سىزىق مەتر بويىمەن كوگالدى قورشاۋ, 25 مىڭعا جۋىق ساندىك گۇلدى بۇتا بوي كوتەردى. بۇل رەتتە جەرگىلىكتى سۋارۋ جۇيەسىن ورناتۋعا ەرەكشە كوڭىل ءبولىنىپ, جامبىل جاباەۆ سكۆەرى مەن اقبۇلاق وزەنى بويىندا, ءتا­ۋەلسىزدىك داڭعىلىنان باستاپ ش.قۇدايبەردىۇلى داڭعىلىنا دەيىنگى ارالىق وسى جۇيەمەن قامتىلدى. سونداي-اق اتاتۇرىك, ا.كراۆتسوۆ كوشەسى, 2-4, ج.تاشەنەۆ كوشەسى مەن «ەگەمەن قازاقستان» گازەتى» كوشەسىنىڭ ماڭىنداعى سكۆەرلەردە, ا.پۋشكين كوشەسى, 15-ءۇيدىڭ اۋلاسىندا جوندەۋ-­قالپىنا كەلتىرۋ جۇرگىزىلدى.

بيىل اۋداندا 6 مىڭنان استام اعاش, 20 مىڭ بۇتا وتىرعىزۋ, 15 مىڭ سىزىق مەتر بويىمەن كوگالدى قورشاۋ سالۋ جوسپارلانىپ وتىر. اۋدان اۋماعىندا اپات قاۋپى بار جانە كەدەرگى كەلتىرەتىن اعاشتار جوق ەمەس. ولاردى ۋاقىتىلى جويۋ كوشەلەردە, اۋلالاردا, ساياباقتاردا, قوعامدىق كەڭىستىكتەردە قاۋىپسىزدىكتى قامتاماسىز ەتۋگە ىقپال ەتىپ كەلەدى. وسىعان وراي, بايقوڭىر اۋدانىنىڭ اۋماعىندا بۇتاقتاردى كەسۋ جانە قۋراعان اعاشتاردى كەسۋ جوسپارلى تۇردە جۇرگىزىلىپ كەلەدى. وسىنداي اعاشتاردى كەسۋ جونىندەگى ءىس-شارالار جوسپارى جاسىل جەلەكتەردىڭ جاي-كۇيىن قاداعالاۋ ناتيجەسى بويىنشا جانە اۋدان تۇرعىندارىنىڭ ءوتىنىشى بويىنشا جۇزەگە اسۋدا.

وتكەن جىلى 126 كونتەينەر الاڭى ورناتىلدى. جالپى ۇزىندىعى 4,4 كم بولاتىن 4 كوشەگە اسفالت توسەلدى, سونداي-اق «ءوندىرىس» جانە «كيرپيچنىي» تۇرعىن الاپتارىندا 80 جارىقتاندىرۋ اسپابى اۋىستىرىلىپ, ورناتىلدى. سونىمەن بىرگە اۋداندا 4 جىلى ايالداما پاۆيلونى پايدا بولدى. 8 كوشەدە ۇزىندىعى 3,6 كم بولاتىن تروتۋار سالىندى.

قوعامدىق كەڭىستىك كوبەيدى

اۋدان اۋماعىندا تۇرعىنداردىڭ بوس ۋاقىتىن قولايلى وتكىزۋىنە بارىنشا جاعداي جاسالۋدا. جىل سايىن جاڭا قوعامدىق كەڭىستىكتەر مەن ورىندار, اۋلا اۋماقتارى جابدىقتالادى.

بىلتىر 11 قوعامدىق كەڭىستىك اباتتاندىرىلدى, 25 اۋلادا كەشەندى اباتتاندىرۋ جۇرگىزىلدى, 42 اۋلاداعى ويىن جانە سپورت ايماقتارىنا جوندەۋ-قالپىنا كەلتىرۋ جۇمىسى جۇرگىزىلدى. ونىڭ ىشىندە «حالىق قاتىساتىن بيۋدجەت» جوباسى اياسىندا 20 اۋلا اباتتاندىرىلدى. جۇرگىزىلىپ جاتقان جۇمىس ناتيجەسى بويىنشا اباتتاندىرىلعان اۋلالار سانى 205-كە دەيىن ارتىپ, بۇل اۋدانداعى بارلىق اۋلا اۋماعىنىڭ 84 پايىزىن قۇرادى.

اعىمداعى جىلى اۋداندا 20 قوعامدىق كەڭىستىك اشۋ, سونداي-اق 90 اۋلادا اباتتاندىرۋ جۇرگىزۋ جوسپارلانىپ وتىر. اۋدان تۇرعىندارىنىڭ ءوتىنىشى بويىنشا 20 جاڭا كونتەينەر الاڭى ورناتىلىپ, جۇمىس ىستەپ تۇرعان 200 كونتەينەر الاڭىنا جوندەۋ جۇرگىزىلدى, 50 كۇل كونتەينەرى دايىندالدى. بيىل قولدانىستاعى 300 الاڭ جوندەلىپ, كەڭەيتىلەدى, سونداي-اق 100 كۇل كونتەينەرىن دايىنداۋ جوسپارلانىپ وتىر.

الەۋمەتتىك ماسەلەلەر – باستى نازاردا

بايقوڭىر اۋدانىندا بۇگىندە 22 مىڭنان استام زەينەتكەر, 573 تىل ەڭبەككەرى, 5591 مۇمكىندىگى شەكتەۋلى ادام, 3963 كوپبالالى وتباسى, 1107 كوپبالالى انا, «التىن القا» جانە «كۇمىس القا» بەلگىلەرىمەن ماراپاتتالعان, 421 الەۋمەتتىك از قامتىلعان وتباسى تۇرادى.

جاسى ۇلكەن كىسىلەر بوس ۋاقىتىن پايدالى وتكىزۋى ءۇشىن اۋداندا 3 شاعىن ورتالىق ورنالاسقان.

– اۋدان تۇرعىندارىن الەۋ­مەتتىك قامتاماسىز ەتۋدە بۇرىنعىداي جوسپارلى جۇمىس جۇرگىزىلىپ جاتىر, وتەتىن اكتسيالار اياسىندا اۋداننىڭ كوپبالالى جانە الەۋمەتتىك از قامتىلعان وتباسىلارىنان 5500-دەن استام بالا ءتۇرلى ءىس-شارا مەن اكتسياعا قاتىستى, وندا ولارعا جاڭا وقۋ جىلىنا دايىندالۋعا كومەك كورسەتىلدى جانە جاڭا جىلدىق سىيلىق تاراتىلدى, مەرزىمدى بۇقارالىق-سپورتتىق ءىس-شارالارعا قاتىسۋعا تارتىلدى, سونداي-اق اۋلا مەرەكەلەرى ءوتتى, – دەدى اكىم.

وتكەن جىلى اۋدان اۋماعىندا تۇراتىن 421 وتباسىعا اتاۋلى الەۋمەتتىك كومەك تاعايىندالدى. مىندەتتى مەملەكەتتىك الەۋمەتتىك تولەمدەردەن باسقا, 1500-گە جۋىق الەۋمەتتىك از قامتىلعان, كوپبالالى جانە تولىق ەمەس وتباسىعا ازىق-تۇلىك جيىنتىعى, بالالارعا ارنالعان كيىم, كومىر, ۋاقىتشا باسپانا بەرۋ, بالالاردى بالاباقشاعا تەگىن ورنالاستىرۋ, مەديتسينا مەكەمەلەرىندە تەكسەرۋدەن جانە ەمدەۋدەن ءوتۋ جانە ت. ب. كومەك كورسەتىلدى.

– تاۋەلسىزدىك كۇنىنە وراي استانادا ارداگەرلەر كەڭەسىنىڭ ءۇشىنشى ورتالىعى اشىلدى. وسى ۋاقىتقا دەيىن ە.برۋسيلوۆسكي كوشەسىندە «ايدار» ورتالىعى اشىلدى. وندا 80-نەن اسا ارداگەر بار. ەكىنشى ورتالىق, ياعني «پاراسات» ورتالىعى ا.جۇبانوۆ كوشەسىندە اشىلعان. ورتالىققا 50-گە جۋىق ارداگەر كەلىپ, بوس ۋاقىتىن ءتيىمدى وتكىزەدى. اۋدانداعى بەلسەندى ەڭبەك ارداگەرلەرىنىڭ بوس ۋاقىتىن وڭتايلى وتكىزۋگە ارنالعان وسىنداي باسقوسۋ ورىندارىنىڭ بولۋى اسا ماڭىزدى, – دەدى اۋدان باسشىسى.

ونىڭ مالىمدەۋىنشە, وسكەلەڭ ۇرپاق تا نازاردان تىس قالمايدى. بۇگىنگى تاڭدا اۋدان اۋماعىندا 8 اۋلا كلۋبى جۇمىس ىستەيدى. وندا سپورت سەكتسيالارى مەن شىعارماشىلىق ۇيىرمەلەر ۇيىمداستىرىلادى.

بىلتىر اۋدان اۋماعىندا جالپى 10 مىڭنان استام ادامدى قامتيتىن 120-دان استام مادەني-بۇقارالىق ءىس-شارا ءوتتى. اۋدان تۇرعىندارىنىڭ ءومىر ءسۇرۋ ساپاسىن جاقسارتۋ بويىنشا جوسپارلى جۇمىس الداعى ۋاقىتتا جالعاسا بەرەدى.

تاعىدا

گۇلبارشىن وكەشقىزى

«استانا اقشامى» گازەتىنىڭ ءتىلشىسى

ۇقساس جاڭالىقتار

Back to top button