1 ماۋسىم – بالالاردى قورعاۋ كۇنى الەمنىڭ كوپتەگەن ەلدەرىنە ورتاق مەرەكە. بۇل كۇننىڭ تاريحى قالاي باستالدى؟
1925 جىلى شۆەيتساريانىڭ جەنەۆا قالاسىندا وتكەن بالالاردىڭ دەنساۋلىعى مەن بەيبىت ءومىر ءسۇرۋى تۋرالى الەمدىك كونفەرەنتسيادا اتاۋلى كۇننىڭ نەگىزى قالاندى دەسە دە بولادى. نەگە باسقا ەمەس, ءدال 1 ماۋسىم كۇنىنىڭ تاڭدالعاندىعى جايىندا ناقتى مالىمەت جوق. دەرەكتەردىڭ ءبىرى 1925 جىلدىڭ 1 ماۋسىم كۇنى قىتايدىڭ اقش-تاعى باس كونسۋلى سان-فرانتسيسكو قالاسىندا «ايداھار-قايىق فەستيۆالىن» تويلاۋ ءۇشىن جەتىم بالالاردى جيناعان ەكەن دەسەدى. جەنەۆادا وتكەن كونفەرەنتسيا دا 1 ماۋسىمدا وتكەن. ەكىنشى دۇنيەجۇزىلىك سوعىستىڭ سالدارىنان جەتىم قالعان بالالاردىڭ جايىن 1949 جىلى پاريجدە وتكەن ايەلدەر كونگرەسىندە كوتەردى. وسىعان وراي, كەلەسى جىلى 1950 جىلى 1 ماۋسىمدا العاش رەت مەرەكە ۇيىمداستىرادى. جاڭا باستامانى كوپتەگەن ەلدەر قولداپ, وسى كۇندى بالالار مەرەكەسىنە اينالدىردى. ەندى ءبىر رەسمي دەرەكتەردە بالالار كۇنى العاش رەت 1955 جىلدىڭ قازان ايىندا جەنەۆاداعى ”بالالاردىڭ ءال-اۋقاتى حالىقارالىق بىرلىگى” ۇيىمىنىڭ ىقپالىمەن دۇنيە ءجۇزى بويىنشا اتالىپ ءوتتى دەلىنەدى. 1954 جىلى 20 قاراشادا بۇۇ-نىڭ باس اسسامبلەياسىندا رۋباب مانسۋردىڭ تاراپىنان بالالار كۇنىن اتاپ ءوتۋ باستاماسى ايتىلادى. بۇل باستاما باس اسسامبلەيا قولداۋىمەن بۇۇ-عا مۇشە ەلدەرگە ۇسىنىلعان.
الەمنىڭ كوپ ەلدەرى 1 ماۋسىمدى حالىقارالىق بالالار كۇنى دەپ اتاپ وتەتىندىگىنە قاراماستان, كەيبىر ەلدەردە باسقا كۇندەرى دە مەرەكەلەنەدى ەكەن. ”حالىقارالىق بالالار كۇنى” مالايزيادا قازان ايىنىڭ سوڭعى سەنبىسى كۇنى, وڭتۇستىك كورەيادا مەن جاپونيادا 5 مامىر كۇنى, سينگاپۋردا 1 قازان كۇنى, تۇركيادا 23 ءساۋىر كۇنى تويلانادى. ال افريكادا بالالارىن قورعاۋ كۇنى 16 ماۋسىمعا بەلگىلەنگەن.
ايگۇل ۋايسوۆا
