مەملەكەت باسشىسى حالىققا ارناعان جولداۋىندا ەلىمىزدە بۇقارالىق سپورتتى دامىتۋعا, ونىڭ ىشىندە بالالاردىڭ سپورتپەن اينالىسۋىن قولجەتىمدى ەتۋدى اتاپ ايتقان بولاتىن. وسى ورايدا بالالار جىلى اياسىندا كوپتەگەن ءىس-شارا جۇزەگە اسىرىلدى. استانا قالاسىندا بالالار سپورتىن دامىتۋ جانە قولجەتىمدى بولۋىن قامتاماسىز ەتۋ ءۇشىن بيىل ەلوردا بيۋدجەتىنەن 5,6 ميلليارد تەڭگە ءبولىندى.
– بۇگىندە استانادا مەملەكەتتىك تاپسىرىس بويىنشا سپورتتىڭ 25 تۇرىنەن 575 سپورت سەكتسياسى جۇمىس ىستەپ تۇر. جىل باسىندا بەرىلگەن ۆاۋچەرلەر سانى 44998 بولسا, ونىڭ ىشىندە بەلسەندىسى – 27369 ۆاۋچەر. وتكەن جىلى سپورت باعدارلاماسىنا 602 ملن تەڭگە بولىنسە, بيىل قارقىن الىپ, 1,3 ملرد تەڭگەگە جەتتى. سونىمەن قاتار بيۋدجەتتى ناقتىلاۋ كەزىندە ءماسليحات دەپۋتاتتارىنىڭ قولداۋىمەن قوسىمشا قاراجات ءبولىندى. وسىلايشا جەرگىلىكتى بيۋدجەتتەن باس-اياعى 5,6 ملرد تەڭگە قارجى ءبولىندى, – دەدى استانا قالاسى دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ەركەعالي كاربوزوۆ ءماسليحات ماجىلىسىندە.
ونىڭ ايتۋىنشا, تاياۋدا سپورت سەكتسيالارىنا ۇكىمەت رەزەرۆىنەن قوسىمشا 660 ملن 201 مىڭ تەڭگە قارجى ءبولىندى.
كەلەسى جىلعا بيۋدجەت ءليميتى بويىنشا 2 ملرد تەڭگە قاراستىرىلىپ وتىر. پروبلەمالارعا كەلسەك, ءبىز جوعارىدا اتالعان 575 سپورت سەكتسياسىنىڭ ءبارىن بارىپ قاراپ ۇلگەرمەدىك. ويتكەنى بىزدە مونيتورينگ جۇرگىزەتىن قۇزىرەت جوق. ءبىز اتالعان جايت بويىنشا قوعامدىق كەڭەسپەن بىرلەسىپ جۇمىس ىستەۋگە تىرىستىق. ازىرگە ماسەلە ءوز شەشىمىن تاپپاي تۇر. سپورت سەكتسياسىنا بارعان بالانىڭ اتا-اناسى تابەلگە قول قويادى. قازان ايىنان باستاپ ArtSport پلاتفورماسى بىزگە IP-مەكەنجايدى كورۋ مۇمكىندىگىن بەردى. اتالعان مۇمكىندىك ارقىلى ءبىر مەزەتتە 80-90 بالانىڭ قول قويعانىن كورىپ وتىرمىز. وكىنىشكە قاراي, بىزدە ول اقپاراتتىڭ راس ەكەنىن تەكسەرەتىن مۇمكىندىك جوق. دەگەنمەن جەتكىزۋشى مەن بالالاردىڭ اتا-اناسىنان سەكتسياعا بارىپ جۇرگەنى تۋرالى مالىمەتتى الىپ وتىرمىز, – دەدى ە.كاربوزوۆ.
سونداي-اق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى باقىلاۋ مەن قاداعالاۋ ماسەلەسىن جۇيەلەۋ كەرەگىن جەتكىزدى.
