استانا تاڭداۋى – 2012
جاڭىلاي ايساققىزى – №54 «نۇراي» بالاباقشاسىنىڭ مەڭگەرۋشىسى. ول – كوپ جىلداردان بەرى وسى سالامەن بىتە قايناسىپ كەلە جاتقان مايتالمان ۇستاز.
ءومىر جولىن 1982-1987 جىلدار ارالىعىندا بەلگراد پەداگوگيكالىق ينستيتۋتىنا تۇسۋىنەن باستاعان. سوندا ورىس فيلولوگياسى مەن ادەبيەتى ءپانىنىڭ مۇعالىمى ماماندىعى بويىنشا وقۋىن ءتامامدايدى. جۇبايى ءوزى وقىعان تسەلينوگراد اۋىلشارۋاشىلىعى ينستيتۋتىنا وقىتۋشىلىققا قالدىرىلعان سوڭ, وسى قالاعا باسى ءبۇتىن كوشىپ كەلەدى. 1988 جىلى تسەلينوگرادتان وزىنە لايىقتى جۇمىس قاراستىرادى. قولىنداعى ءسابيىن ۆەدومستۆولىق بالاباقشاعا ورنالاستىرۋ ءۇشىن ءوزى دە سوندا جۇمىسقا تۇرادى. سول العاشقى ەڭبەك ءوتىلىن باستاعان مەكەمەدەن تۇلەپ ۇشقان پەداگوگ-مامان قاراپايىم تاربيەشىدەن بالاباقشانىڭ مەڭگەرۋشىلىگىنە دەيىن ءوسىپ, كوپ جىلدار بويى وسى سالادا جەمىستى ەڭبەك ەتىپ كەلەدى. 1996 جىلى العاشقى بالاباقشادا ونىڭ ەڭبەگىن ەلەپ, ەسكەرگەن باسشىلىق ادىسكەرلىككە كوتەرمەلەيدى.
قايسارلىعىمەن, جۇمىسقا جانىن سالا كىرىسەتىن ىنتىزارلىعىمەن, ەش قيىندىققا مويىمايتىن جىگەرىمەن جۇرگەن ورتاسىنىڭ گۇلى بولىپ جايناعان جاڭىلاي اپاي – از ۋاقىتتا ءوزىنىڭ بىلىكتىلىگىن ءىس جۇزىندە دالەلدەي العان ۇستاز. 2005 جىلى استاناداعى №36 «بالاپان» بالاباقشاسىنىڭ مەڭگەرۋشىلىگىنە ۇسىنىلىپ, سوندا ءوزىنىڭ جيناقتاعان مول تاجىريبەسىمەن ءبولىسۋدى باستايدى. وزىنە ارتىلعان جاۋاپكەرشىلىكتى ۇلكەن ابىرويمەن اتقارادى.
قازىرگى تاڭدا ول ەسىلدىڭ سول جاعالاۋىنداعى «نۇراي» بالاباقشاسىنىڭ مەڭگەرۋشىسى بولىپ قىزمەت اتقارادى. ءوزى مەڭگەرىپ وتىرعان باقشاداعى ءار ءبۇلدىرشىننىڭ ەسىمىن جاتقا بىلەدى. باسشىلىقتا جۇرگەنمەن, ءوزىنىڭ ىسىنە دەگەن اق-ادال ماحابباتىنىڭ ءبىر پاراسى دەپ تۇيسىنگەن ابزال مۇعالىمنىڭ ەرەكشەلىگى بولسا كەرەك. ونىڭ بار شارۋاسى تەك تاڭەرتەڭمەن ەرتە جۇمىسقا كەلىپ, توپتاردى ارالاپ, اسحانانى تەكسەرىپ شىعۋمەن ءتامامدالمايدى. ول ءۇشىن ءار بالاعا ءوزىنىڭ شۋاعىن توگىپ, ىستىق ىقىلاسپەن نازار اۋدارۋ – مۇعالىمدىك جۇمىستىڭ ەڭ باستى قاسيەتى. بالاباقشادا بولىپ جاتقان بارلىق ءىس-شارالارعا, اشىق ساباقتارعا قاتىسۋدى دا ۇمىتپايدى. ءبىلىم بەرۋ ۇدەرىسىن ۇنەمى قاتاڭ قاداعالاپ وتىرادى.
قازىر «استانا تاڭداۋى» بايقاۋىنا ۇسىنىلىپ, ونىڭ ەڭبەگىنە سىرتتاي ءتانتى بولىپ جۇرگەن استانالىق تۇرعىندار از ەمەستىگى بايقالدى. مۇنى سايتتا جاڭىلاي اپايىمىزدى قولداۋشىلاردىڭ سانى انىقتاپ بەرىپ وتىر. ولاردىڭ سانى سوڭعى دەرەكتەر بويىنشا – 3554. استانا كۇنى بۇل بايقاۋ مارەسىنە جەتپەك. ازىرگە قاتارلاستارىنىڭ اراسىنان كوش باستاپ كەلە جاتقان تاجىريبەلى مۇعاليمانىڭ ەڭبەگى ەل ەسىندە, ءوزى ءونىپ-وسكەن حالىقتىڭ كوزايىمى بولۋىنا تىلەكتەستەرىنىڭ ۇسىنۋى ول ءۇشىن كوڭىل مارقايتارلىق زور قۋانىش بولىپتى. «ماسەلە تەك جەڭىستە ەمەس, مەنى ۇسىنىپ, ەڭبەگىمدى ەلەپ, وزىمە از دا بولسا وسىنداي قۇرمەت كورسەتىپ جاتقان اتا-انالارعا, بارلىق داۋىس بەرىپ جاتقان استانالىقتارعا العىسىم شەكسىز» دەپ اعىنان جارىلدى اڭگىمەلەسە بارعان بىزگە جاڭىلاي ايساققىزى.
ال, سايتتا ونى ۇسىنعان اتا-انانىڭ: «مەن جاڭىلاي ايساققىزىنىڭ بالالاردىڭ ەسىمىن جاتقا بىلەتىنى قۋانتادى. ول بالالاردىڭ دەنساۋلىعى تۋرالى ماعلۇمات الىپ, شارۋاشىلىق ماسەلەلەردى رەتتەپ جۇرەدى. وسىنداي قۇرمەتكە لايىق ازاماتتى, بىلىكتى ۇستازدى بارشا حالىق تانىسا ەكەن دەيمىن!» وسىنداي لەبىزىنە ورتاقتاسقان ازاماتتاردىڭ قاتارى بايقاۋ مارە سىزىعىنا جەتكەنشە مولايا تۇسەرى دە مۇمكىن. ەندەشە, ەل ماقتاعان ۇستازدى ەل بولىپ قولداۋ كورسەتسە, نەسى ايىپ. جەڭىس تەك لايىقتىلار تۇعىرىنا اينالسىن!
شىنار ءابىلدا
