وقۋشىلار سارايىندا قالالىق ءبىلىم باسقارماسىمەن بىرلەسە وتىرىپ ەلوردانىڭ بارلىق بوبەكتەرىنە ارنالعان «بالالىق بويتۇمارى» اتتى مەرەكەلىك ءىس-شارا ۇيىمداستىرىلدى.
عيماراتتىڭ الدىڭعى الاڭى مەكتەپ وقۋشىلارى ونەر كورسەتەتىن بەس الاڭقايعا ءبولىندى. ءبىرىنشى الاڭقايدا بۇلدىرشىندەر ماتاعا سۋرەت سالسا, ەكىنشى الاڭقايعا جاس سۋرەتشىلەردىڭ كورمەسى قويىلدى. ءۇشىنشى الاڭ – حيپ-حوپ بي الاڭى بولىپ, ءتورتىنشىسى – كاراتە گودزيۋ-ريۋ, توعىزقۇمالاق, شاحمات, تاەكۆوندو, ارقان تارتۋ, كوڭىلدى باستامالار سياقتى سپورت ويىندارىنا ارنالدى. بەسىنشى الاڭقايدا قىزىقتى كونتسەرتتىك باعدارلاما وتكىزىلدى. مەرەكەلىك باعدارلاماعا وقۋشىلار سارايىنىڭ بارلىق شىعارماشىلىق ۇجىمدارى قاتىسىپ, اننەن شاشۋ شاشىپ, بيدەن ورنەك تىكتى. بالاقايلار اسفالتقا استانامىزدىڭ باس سيمۆولى بايتەرەكتى, كورىكتى عيماراتتاردى, قول ۇستاسقان باقىتتى وتباسىن بەينەلەپ جاتتى.
وقۋشىلار سارايىنداعى «يزو» ۇيىرمەسىنە قاتىساتىن №53 مەكتەپ-ليتسەيىنىڭ 5-سىنىپ وقۋشىسى ءمادينا اسىلبەكوۆا سالعان سۋرەتتەردىڭ ءمانى ەرەكشە. جول ءجۇرۋ ەرەجەسىن ساقتاۋ تاقىرىبىندا سۋرەت سالعان ول: «بارلىق بالالاردى جول ەرەجەسىن ساقتاۋعا, جولدا ابايلاپ جۇرۋگە شاقىرامىن» دەدى. كورەرمەن رەتىندە كەلگەن بۇلدىرشىندەر اراسىندا بايقاۋلار جاريالانىپ, بالمۇزداقتار تاراتىلدى. ودان وزگە كوركەم گيمناستيكا جانە شين-كيوكۋشينكاي كاراتە بويىنشا قويىلىم كورسەتىلدى. «ارت فەشن ديزاين» ستۋدياسى جاس سانگەرلەرىنىڭ «Fashion.kz. جاز-2013» جيىنتىعىنىڭ جاڭا كورسەتىلىم دەفيلەسى قوناقتارعا وقۋشىلار سارايىنىڭ جاس ديزاينەرلەرى مەن سانگەرلەرىنىڭ شەبەرلىكتەرىن تاماشالاۋعا مۇمكىندىك بەردى. وسىلايشا وقۋشىلار سارايىنىڭ الاڭىندا وتكىزىلگەن دۋماندى شارا بالالار مەن اتا-انالاردى قۋانىشقا بولەدى.
شىراق بايكەنوۆا,
ل.گۋميلەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىنىڭ ءىى كۋرس ستۋدەنتى
