قوعامدا مەملەكەت تاراپىنان بەرىلەتىن ەشقانداي جاردەماقى مەن الەۋمەتتىك كومەكتى كۇتپەي-اق, ءوز وتباسىن العا سۇيرەپ كەلە جاتقان انالار كوپ. سولاردىڭ ءبىرى – ەلوردالىق كەلىنشەك نۇرسۇلۋ ەسەەۆا. كەزىندە جولداسىمەن بىرگە كىشكەنتاي جاتاقحانادا بولمە جالداپ تۇرعان ول «استانا اقشامىنا» بەرگەن سۇحباتىندا كاسىپكەر كەلىنشەككە قالاي اينالعانىن ايتادى.
تيىننان تەڭگە قۇراعان كۇندەر
ءبىز وتباسىندا التى بالامىز. قىزىلوردا وبلىسى جاڭاقورعان اۋدانىندا تۋدىم. اكەمىز شامشۋدين پالمانۇلى ەرتەرەك قايتىس بولىپ, التى بالانى ءوسىرىپ-جەتىلدىرۋدىڭ اۋىرتپالىعىن جالعىز انام ايسارا حالباەۆا كوتەردى. ءبىز بالا كۇننەن ەڭبەكقور بولىپ وستىك. شيەتتەي بالا-شاعانى اسىراۋ ءۇشىن انامىز نان جاۋىپ, ساتۋمەن اينالىستى. ءالى ەسىمدە, كىشكەنتاي قىز بولسام دا قولىم مايىسىپ اناممەن بىرگە نان يلەسىپ, ونى بازارعا اپارىپ ساتاتىنبىز. «ءار كەز تالاپتانىڭدار, تالاپتىعا نۇر جاۋادى» دەپ قۇلاعىمىزعا ۇنەمى قۇيىپ وتىردى. «جۇرگەن ىزدەرىڭنەن تاربيەنىڭ ءىزىن كورەتىن بولايىن» دەيتىن. وسىلايشا تيىننان تەڭگە قۇراۋدى انامىزدان ۇيرەندىك. وعان العىستان باسقا ايتارىمىز جوق. سەبەبى ەرلان مەن نۇرجان اعالارىم بۇگىندە اۋدانداعى بەلگىلى كاسىپكەر ازاماتتارعا اينالدى. ەلۋ شاقتى ادامدى جۇمىسپەن قامتىپ قانا قويماي, ناۋبايحانا, اسحانا جەلىلەرىن دامىتىپ, كوتەرمە باعامەن تاۋار ساتاتىن قويما جۇمىستارىن جۇرگىزىپ كەلەدى.
قالاي «ەڭ باي ستۋدەنت» اتاندىم؟
مەكتەپ بىتىرگەن جىلى ءبىلىم قۋىپ استاناعا كەلدىم. 2003-2008 جىلدارى س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە وقىدىم. بىراق ءبىلىم العان بەس جىل ۋاقىت ىشىندە بوس وتىرمادىم. انامنان دارىعان اسپازدىق ونەرىم بولعان سوڭ, 1-كۋرستان باستاپ ساباقتان تىس ۋاقىتىمدا ستۋدەنتتەر جاتاقحاناسىندا اسپازدىڭ كومەكشىسى بولىپ جۇمىس ىستەدىم. اسۇيدە ىستەگەننىڭ پايداسى – ۇنەمى قارنىڭ توق بولادى. ال كەشكىسىن قوسىمشا مادەنيەت مينيسترلىگىندە تازالاۋشى بولدىم. سول كەزدىڭ وزىندە ەكى جۇمىسىمنان 50 مىڭداي جالاقى الىپ, جاتاقحاناداعى «ەڭ باي ستۋدەنت» اتاندىم. ارينە, ەشقاشان ساباقتان قالعان ەمەسپىن. جۇمىس پەن وقۋدى قاتار الىپ ءجۇردىم. ۇزدىك وقىدىم. ناتيجەسىندە 2008 جىلى ديپلوم العان بويدا وقىتۋشى, پروفەسسور اعايىمىز جاقسىكەلدى قاسىمۇلىنىڭ ۇسىنىسىمەن جەر قاتىناستارى جانە جەرگە ورنالاستىرۋ كافەدراسىندا مۇعالىم بولىپ قىزمەتكە قالدىم.
قازىر ستۋدەنت بولىپ, اي سايىن اتا-اناسىنان اقشا سۇرايتىن تانىستارىمدى ەستىسەم, تاڭعالامىن. ءدال قازىر جاستارعا قوسىمشا جۇمىس ىستەۋگە مۇمكىندىك مول. ەبىن تاپقان ادام ءبىر ەمەس, بىرنەشە جۇمىستى دا, وقۋدى دا قاتار الىپ جۇرەدى. ول ءۇشىن ادامدا تەك العا ۇمتىلۋشىلىق, ىنتا بولسا جەتكىلىكتى.
كاسىبىڭ – ءناسىبىڭ
جولداسىم – مەملەكەتتىك قىزمەتكەر. ايبەككە تۇرمىسقا شىققاننان كەيىن, 2009 جىلى دۇنيەگە تۇڭعىشىم اقبوتا كەلدى. اراعا جىل سالىپ ەكىنشى قىزىم ايزەرەنى بوساندىم. تىنىمسىز ەڭبەك ەتىپ قالعان باسىم بالامەن ۇيدە وتىرۋعا ءماجبۇر بولدىم. ودان كەيىن بەكارىس, ارتىنشا ارۋجان دۇنيەگە كەلدى. مەنىڭ ويىمشا, بالا تاربيەسى – ۇلكەن عىلىم. ولاردىڭ تاربيەلى بولىپ وسۋىنە وتباسى مەن وسكەن ورتاسىنىڭ تيگىزەتىن اسەرى مول. سول ءۇشىن وتاعاسىنىڭ ايتقانىن ىستەپ, ءبىرجولا بالا تاربيەسىنە ءمان بەردىك. ارينە, تەك بالاعا الاتىن جاردەماقىعا قاراپ قالماۋ كەرەك ەكەنىن ءتۇسىندىم. ويتكەنى كوپبالالى اناعا بەرىلەتىن اي سايىنعى جاردەماقى تۇككە جەتپەيدى. ءسويتىپ ۇيدە وتىرىپ ءتۇرلى ءتاتتى ءپىسىرۋدىڭ كۋرستارىنا جازىلدىم. قولىما العان سەرتيفيكات بۇل ىسكە ودان ءارى بەل شەشە كىرىسۋگە تۇرتكى بولدى. شۇكىر, قازىر ءتۇرلى تورتتارعا تاپسىرىس قابىلدايمىن. «ينستاگرام» الەۋمەتتىك جەلىسى ارقىلى تاپقان تۇتىنۋشىلارىم كوپ. ءتىپتى مەرەكە كۇندەرى 10-15 تورتقا دەيىن تاپسىرىس الامىن. كەلىسى – 3500 تەڭگەدەن. بۇيىرتسا, كوكتەمگە قاراي تالاپكەر اۋىلىنان كونديتەرلىك تسەح اشۋ جوسپارىمدا بار. قازىر شاعىن كاسىپكەرلەرگە بەرىلەتىن قولداۋلاردى پايدالانعىم كەلەدى, سول ءۇشىن قۇجات ماسەلەسىمەن جۇگىرىپ ءجۇرمىن.
كويلەك – ايەل اجارى
تاعى ءبىر اينالىسىپ جۇرگەن شارۋام – جالعا ادەمى كويلەكتەر بەرەمىن. يدەيا قالاي تۋدى دەيسىز عوي؟ العاشقىدا ەكى قىزىما ادەمى كويلەك ىزدەپ, ءتۇرلى فابريكالاردىڭ سايتىن اقتاردىم. تاپسىرىسپەن العان ەكى كويلەگىم دە ساپالى شىقتى. كەيىننەن نەگە كاسىپكە اينالدىرماسقا دەگەن وي كەلە قالدى. باستاپقىدا تۇركيادان, ۋكراينادان, بەلورۋسسيادان ون شاقتى كويلەك الدىردىم, ال قازىر جاس شاماسىنا قاراي كەڭەيتىپ جاتقان جايىم بار. مەرەكەلىك, كەشكىلىك كويلەكتەردى قالامىزدىڭ كىشكەنتاي حانشايىمدارىنا قولجەتىمدى باعامەن (7 مىڭ تەڭگە) جالعا بەرىپ قانا قويماي, كوپبالالى وتباسىنىڭ بالالارىنا قايىرىمدىلىق ماقساتىندا ارنايى كونتسەرتتەرگە قاتىساتىن بولسا, تەگىن بەرىپ ءجۇرمىن. مەندەگى ەرەكشە كويلەكتەرگە استانا عانا ەمەس, كوكشەتاۋ قالاسىنان دا حابارلاساتىندار بار. ەندى وسى كويلەكتەردى اقىلى ستۋديالارمەن كەلىسىپ, فوتوسەسسيا ۇيىمداستىرۋ جۇمىستارىن پىسىقتاپ جاتىرمىن. وسىلايشا قوسىمشا قارجى تاۋىپ, جولداسىما كومەكتەسىپ جاتقانىما شۇكىر دەيمىن. ءار كاسىپتىڭ بەرەكەسى بولادى ەكەن. بۇگىندە التى جىل پاتەر جالداپ جۇرگەن كۇندەر ارتتا قالدى. ءوز قولىمىزبەن ءۇي سالدىق. ەڭ باستىسى, بالا تاربيەسىنە دە ۋاقىت بار.
