ەلوردادا بالانى ءبىرىنشى سىنىپقا بەرۋ بويىنشا وتىنىشتەردى قابىلداۋ جالعاسۋدا. دەگەنمەن كەيبىر اتا-انا بۇل پروتسەسس ءۇشىن قانداي قۇجاتتار كەرەك ەكەنىن, ال باستىسى, ولاردى ۇيدەن شىقپاي-اق قالاي وتكىزۋگە بولاتىنىن بىلمەيدى.
قۇجاتتار ەلەكتروندى تۇردە دە, قاعاز تۇرىندە دە قابىلدانادى دەپ رەسمي حابارلانعانمەن, مەكتەپكە تۇرعىلىقتى جەرىنە قاراماي قابىلدانعىسى كەلگەندەر ءۇشىن قۇجاتتاردى ەلەكتروندى تۇردە وتكىزۋگە كەڭەس بەرىلەدى. بۇل پروتسەسس school.nursultan.e-orda.kz سايتىنداعى «1-سىنىپقا قابىلداۋ» بولىمىندە جۇزەگە اسىرىلادى.
قانداي قۇجاتتار كەرەك؟
1-سىنىپقا قالالىق ءبىلىم باسقارماسىنىڭ پورتالى ارقىلى قابىلدانعىسى كەلەتىندەر تومەندەگى قۇجاتتاردىڭ ەلەكتروندى كوشىرمەلەرىن (فوتوسۋرەتى نەمەسە سكانەرلەنگەن كوشىرمەسى) ۇسىنۋعا مىندەتتى:
• بالانىڭ تۋ تۋرالى كۋالىگى;
• دەنساۋلىق جاعدايى تۋرالى انىقتامانىڭ №026/ۋ-3 نىسانى;
• دەنساۋلىق جاعدايى تۋرالى انىقتامانىڭ №063/ۋ نىسانى.
• بالانىڭ 3ح4 فورماتتاعى فوتوسۋرەتى;
• ۋچاسكەلىك پەدياتر بەرەتىن پەداگوگيكالىق-مەديتسينالىق-پسيحولوگيالىق كوميسسيانىڭ شەشىمى (ەگەر بار بولعان جاعدايدا).
جوعارىدا اتالعان قۇجاتتاردىڭ تۇپنۇسقالارى بالا مەكتەپكە قابىلدانعاننان كەيىن سۇراتىلادى.
ەگەر اتا-انا بالانى مەكتەپكە بەرۋ تۋرالى ءوتىنىشتى پورتال ارقىلى ەمەس, مەكتەپتەردىڭ وزىنە وتكىزسە, وندا جوعارىداعى قۇجاتتاردىڭ تۇپنۇسقالارى كەرەك.
بالانى 1-سىنىپقا تىركەمەس بۇرىن ءوزىڭىز تاڭداعان ورتا مەكتەپتەرمەن جاقسىراق تانىسىپ شىققانىڭىز ءجون. ەگەر ول مەكتەپ ءسىز تۇراتىن اۋدانعا جاتپايتىن بولسا, وندا ورىن مەن كۆوتا سانىن انىقتاپ العانىڭىز دۇرىس.
تىركەۋ قالاي جۇزەگە اسادى؟
پورتالدا ءوزىڭىز جانە بالاڭىز تۋرالى مالىمەتتەردى ەنگىزەسىز. بالانى مەكتەپكە قابىلداۋ تۋرالى حابارلامانىڭ تەلەفونىڭىزعا كەلۋىن مىندەتتى تۇردە كورسەتىڭىز.
مالىمەتتەردى ەنگىزىپ, تىركەلگەنىڭىزدى راستايتىن كودتى العان سوڭ, سىزگە جولداما بەرىلگەنى جانە كەرەكتى قۇجاتتاردى الىپ مەكتەپكە بارۋىڭىز قاجەتتىگى تۋرالى حابارلاما الاسىز. ودان كەيىن سىزگە بالانىڭ مەكتەپكە قابىلدانعانى جايلى سمس كەلەدى.
ءوتىنىش قانشا ۋاقىتتا تىركەلەدى؟
ءسىز وقۋعا ءوتىنىش بەرگەن مەكتەپ ونى ءبىر جۇمىس كۇنى ىشىندە قارايدى.
قانداي جاعدايدا ءوتىنىش قابىلدانباۋى مۇمكىن؟
كەرەكتى قۇجاتتار تولىق بولماعان نەمەسە جالعان بولعان جاعدايدا ءوتىنىش قابىلدانبايدى.
بالا تۇرعىلىقتى جەرىنە سايكەس كەلمەيتىن مەكتەپكە قابىلدانا الا ما؟
بالا كۆوتالىق ورىندارى بار كەز كەلگەن مەكتەپكە قابىلدانا الادى. كۆوتالىق ورىندار بويىنشا اقپاراتتى پورتالداعى «مەكتەپتەر ءتىزىمى» بولىمىندە كورۋگە بولادى.
ەگەر مەكتەپ بالانى قابىلداۋدان نەگىزسىز تۇردە باس تارتسا, قايدا حابارلاۋعا بولادى؟
ونداي جاعدايدا بەيبىتشىلىك كوشەسى, 11 مەكەنجايىندا ورنالاسقان قالالىق ءبىلىم باسقارماسىنداعى 119-كەڭسەگە كەلىپ حابارلاۋعا بولادى. بايلانىس تەلەفوندارى: 55-68-73, 55-68-83.
