«ايالاعان استانا» بايقاۋىنىڭ قاتىسۋشىلارى قىزۋ دايىندىق ۇستىندە.
بالالارعا ارنالعان «ايالاعان استانا» ۇلتتىق مۋزىكالىق تەلەۆيزيالىق بايقاۋى بيىل ەكىنشى رەت وتكەلى وتىر. ونىڭ ۇيىمداستىرۋشىلارى – «نۇر وتان» حدپ, استانا قالاسى اكىمدىگى, يگور كرۋتوي جەتەكشىلىك ەتەتىن «ارس» پروديۋسەرلىك كومپانياسى جانە «ەۋرازيا» ءبىرىنشى ارناسى. بايقاۋدىڭ ىرىكتەۋ كەزەڭىندە ەلىمىزدىڭ 16 قالاسىنان 8-12 جاس ارالىعىنداعى 1000-نان اسا بالا باق سىناپ, ورتالارىنان 17 بالا وزىپ شىققانىن ىلگەرىدە حابارلاعان ەدىك. قازىر فيناليستەر قىزۋ دايىندىق ۇستىندە. بايقاۋدىڭ اقتىق سىنى استانا قالاسىندا 4-6 شىلدە ەلوردا تويىنا وراي وتكىزىلەدى.
باس جۇلدەگە يە بولعان جاس دارىن «دەتسكايا نوۆايا ۆولنا» بايقاۋىندا قازاقستاندى تانىستىرۋ مۇمكىندىگىنە جانە 1 ميلليون تەڭگە كولەمىندەگى اقشالاي سىياقىعا (ول بالانىڭ شىعارماشىلىق دامۋىنا جۇمسالادى) يە بولادى. بۇعان قوسا, 1, 2, 3 ورىندارعا جانە «كورەرمەندەر كوزايىمى» اتالىمىنا لايىق دەپ تانىلعان بالالار دا قۇرالاقان قالمايدى دەيدى ۇيىمداستىرۋشىلار.
قازىر قازاقستاننىڭ تۇكپىر-تۇكپىرىنەن ىرىكتەلگەن جەتكىنشەكتەر انشىلىك قابىلەتتەرىن شىڭداپ, ۆوكال, سولفەدجيو, اكتەرلىك شەبەرلىك بويىنشا رەسەيلىك لينا اريفۋلينا شەبەرحاناسىنىڭ بىلگىر ماماندارىنان, پەداگوگتارىنان ساباق الۋدا. بايقاۋدىڭ نەگىزگى ماقساتى دا تاسادا قالعان تالانتتى ىزدەپ تاۋىپ, كاسىبي انشىلىك جولعا سالۋ دەسەك, جۇلدە السىن-الماسىن, بىراق بىلىكتى مامانداردان ساباق الۋدىڭ ءوزى بالعىندار ءۇشىن ۇلكەن ولجا ەكەنى انىق.
«شوۋ تۇرىندە وتەتىن بايقاۋ ءۇش كۇن بويى تىكەلەي ەفيردە كورسەتىلەدى. ارنايى ىرىكتەلىپ الىنعان 12 كونتسەرتتىك ءنومىر دايىندالىپ جاتىر. ادىلقازىلار القاسىنىڭ ۇيعارىمىمەن, SMS ارقىلى جولداعان حالىقتىڭ داۋىسى دا ەسكەرىلەدى, بالالار «Zaratushtra Band» وركەسترىنىڭ سۇيەمەلدەۋىمەن جاندى داۋىستا ءان سالاتىن بولادى. قاتىسۋشى مىندەتتى تۇردە قازاق جانە اعىلشىن تىلدەرىندە ءان ايتۋى ءتيىس. جەكە ورىنداۋمەن قاتار, م.اراپباەۆا, ا.كىشكەنباەۆ, س.باقاەۆا سىندى انشىلەرمەن دۋەت بولادى» دەيدى باعدارلامانى ۇيىمداستىرۋشى رەسەيلىك ماماندار.
ۋىز لەبىز
عاليمۇرات ءابدىماناپوۆ, 13 جاستا:
«قاراقات» مەكتەپ-ستۋدياسىندا شىڭدالدىم
– ءان ايتۋ – ماعان ناعاشىلارىمنان دارىعان ونەر. ەكىنشى سىنىپتا وقىپ جۇرگەندە پيانينو ۇيىرمەسىنە باردىم, سونداعى پەداگوگتەر ماعان داۋىسىمنىڭ جاقسى ەكەنىن, حوردا ءان ايتىپ جۇرە بەرمەي, جەكە ءان ايتۋ كەرەكتىگىن ايتتى. بىراق اتا-انام دا, مەن دە اسا ءمان بەرگەن جوقپىز. كەيىن 2011 جىلى «قاراقات» مەكتەپ-ستۋدياسىنا باردىم, سول مەكتەپتە وقىعانىما بيىل ءۇشىنشى جىل.
ماليكا سماعۇلوۆا, 10 جاستا:
ءۇي ىشىمىزبەن ونەرگە جاقىنبىز
– مەن پاۆلودار قالاسىنان كەلدىم. ەڭ العاش كاستينگكە كەلگەندە ادەلدىڭ «Rolling in the deep» ءانىن ورىندادىم. ارمانىم – سول انشىمەن كەزدەسىپ, دۋەت ايتۋ. ول ءۇشىن كوپ ەڭبەك ەتىپ, تەر توگۋ قاجەت. مەنىڭ اپكەم ايدا سماعۇلوۆا كەزىندە «Voyage» توبىنىڭ ءانشىسى بولدى, قازىر دە مۋزىكامەن اينالىسادى, اعام مەرگەن سماعۇلوۆ وزىق DJ-لەردىڭ قاتارىندا. اكەم مۋزىكالىق اسپاپتاردىڭ قۇلاعىندا وينايدى. مەن دە وسى بايقاۋدان جۇلدەلى ورىن الىپ, اتا-انا ءۇمىتىن اقتايتىنىما سەنىمدىمىن, سەبەبى, وزىنە سەنبەگەن ادامعا ەشكىم سەنبەيدى.
زاميرا ساعاديەۆا, 12 جاستا:
ءان ايتۋدى اجەمنەن ۇيرەندىم
– مەن اقمولا وبلىسىنىڭ زەرەندى اۋدانىنان كەلدىم. «ايالاعان استانا» – بىزگە بەرىلگەن ۇلكەن مۇمكىندىك, مۇندا ءبىز ءوز دارىنىمىزدى بۇكىل ەلگە تانىتا الامىز. استاناداعى كۇندەرىم قىزىقتى وتۋدە, ءبارىمىز «دۋمان» ويىن-ساۋىق ورتالىعىنا, «استانالىق تسيرككە» باردىق, ەسىل وزەنىندە پاروحودپەن جۇردىك. اتاقتى سپورتشى دەنيس تەننىڭ ونەرىن تاماشالادىق. كۇن سايىن ۆوكالدان, بيدەن ساباق الامىز, يوگاعا بارامىز. ماعان ءان ايتۋدى اجەم ۇيرەتتى, انام دا ونەردەن قۇرالاقان ەمەس. بولاشاقتا مەن دە ونەر اۋىلىنان الىس كەتپەيمىن, تانىمال ءانشى بولعىم كەلەدى.
ايجان قاسىموۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
