Sport

بالۋاندارىمىزدىڭ باعى جاندى

استانادا, ناقتىراق ايتساق, «سارىارقا» ۆەلوترەگىندە دزيۋدو كۇرەسىنەن حالىقارالىق گران-پري جارىسى بولىپ ءوتتى. الەمنىڭ 36 مەملەكەتىنەن 277 سپورتشىنىڭ باسىن قوسقان دودادا 154 ەر ازامات باق سىناسا, 123-ءى – نازىك جاندىلار. ءبىزدىڭ ەلدىڭ اتىنان 48 (26 ەر, 22 ايەل) بالۋان ونەر كورسەتتى. سايىسقا تەرىسكەيدەگى كورشىمىزدىڭ اتىنان 18 سپورتشى قاتىسسا, يزرايل مەملەكەتىنەن – 15, ال موڭعول مەن المان تاراپى اتتاي ۇكىلەپ 14 قىز-جىگىتىن اكەلگەن ەكەن. سلوۆاكيا, ليۋكسەمبۋرگ, بەلگيا جانە چەرنوگوريا سىندى ەلدەردىڭ اتىنان ءبىر-ءبىر قاتىسۋشى عانا ەلوردا تاتاميىندە تەر توكتى.

ءۇش كۇنگە سوزىلعان ۇلكەن جارىستىڭ قورىتىندىسى بويىنشا وتانداستارىمىز ويىمىزدان شىعا ءبىلدى. سولاردىڭ ءبىرى – ەلدوس سمەتوۆ. الپىس كەلى سالماق دارەجەسى بويىنشا جاقىندا عانا ازيا ويىندارىن ۇتىپ العان بالۋانىمىز استاناداعى كەزدەسۋدىڭ تورتەۋىندە دە يپپون ادىسىمەن جەڭىسكە جەتتى. ول ۇستاسقان ۋكراينالىق دەنيس ۆيليچەنكونى, رەسەيلىك وزبەك باحروم ينوەاتوۆتى, رەسەيلىك دميتري كۋليكوۆتى قاپى قالدىرىپ, فينالدا موڭعوليالىق امارتۋشۆين داشداۆااعا دا ەش مۇمكىندىك قالدىرمادى.

وسى سالماققا تيەسىلى قولا جۇلدەنى تاعى ءبىر قانداسىمىز اسحات تەلمانوۆ يەلەندى. ول شيرەك فينالدا جاپون حيرونوري يشيكاۆادان ۇتىلدى دا, قولاعا تالاس بارىسىندا ءوز وتانداسى رۋستام يبراەۆتان, كەيىن رەسەيلىك كۋليكوۆتان ايلاسىن اسىردى.

جەڭىل سالماق – 66 كەلىدە ونەر كورسەتكەن جانساي سماعۇلوۆ العاشىندا يزرايلدىك تال فليكەر مەن پولياك پاۆەل زاگرودنيكتى جەڭگەن بولاتىن. ول جارتىلاي فينالدا بەلورۋس بالۋانى دميتري چەرچاننان باسىم تۇسكەنمەن, التىن مەدال جولىنداعى اقتىق كەزدەسۋدە جاپون يۋكي حاشيگۋشيدەن ۇتىلىپ قالدى. ازيا ويىندارىنىڭ قولا جۇلدەگەرى ازامات مۇقانوۆ تا جارتىلاي فينالدا وسى يۋكي حاشيگۋشيدەن ۇتىلىپ, فينالعا شىعا الماعان ەدى. ءسويتىپ, مۇقانوۆ قولا جۇلدە ءۇشىن وتكەن كەزدەسۋدە تاعى ءبىر جاپون ميا ريازاكيدەن ۇتىلىپ, بەسىنشى ورىنعا قاناعات ەتتى.

ال ءازيز قالقامانۇلى 81 كەلىگە دەيىنگى سالماقتا قولا جۇلدەگەر اتانىپ, قورجىنىمىزعا العاشقى كۇننەن-اق ولجا سالدى.

الەمدىك گران-ءپريدىڭ كەلەسى كۇنىندە قازاق بالۋاندارى ءتورت مەدال ۇتىپ الدى. 2009 جىلعى الەم چەمپيونى ماكسيم راكوۆ فينالدىق بەلدەسۋدە لوندون وليمپياداسىنىڭ قولا جۇلدەگەرى گەرمانيالىق ديميتري پەتەرستى ۇتتى. ءبىزدىڭ بالۋان اقتىق كەزدەسۋگە دەيىن جاپونيالىق ريۋكو وگاۆۋ مەن رەسەي وكىلى داۆيد بيتيەۆتان باسىم تۇسسە, جارتىلاي فينالدىق بەلدەسۋدە مىسىرلىق رامادان دارۆيشتان ايلاسىن اسىرا الدى. وسىلايشا ماكسيم ينچحونداعى كۇمىستى التىنعا ايىرباستاپ وتىر.

ال 90 كەلىدە بەلدەس­كەن اسەت احمەتجانوۆ التىن جۇلدەگە ءبىر تابان جەتە الماي سان سوعىپ قالدى. ول فينالدا الەمدىك رەيتينگتە 33-ورىندا تۇرعان تاجىك بالۋانى كومرونشوح ۋستوپيريونعا ەسە جىبەرىپ, كۇمىسكە قاناعات ەتتى. وعان دەيىن اسەت ۆەنگريالىق گابور ۆەر, مىسىرلىق حاتيم ابدۋل احەر جانە رەسەيلىك حۋسەين كالمۋرزاەۆتاردىڭ جاۋىرىندارىن جەرگە تيگىزدى.

سونىمەن قاتار, ايەلدەر اراسىندا وتكەن باسەكەدە 78 كەلىدەن جوعارى سالماقتا كۇرەسكەن زارينا ءابدراسۋلوۆا  گران-پري جارىسىنىڭ قولا جۇلدەگەرى اتاندى. ول جارتىلاي فينالدا ۋكراينالىق يرينا كيندزەرسكاعا جول بەرىپ, تاعى ءبىر ۋكراينالىق سۆەتلانا يارومكادان جەڭىلگەن وتانداسىمىز گۇلجان يسانوۆامەن قولاعا تالاستى. نەگىزگى ۋاقىتتى تەڭ اياقتاعان سپورتشىلار «التىن ۇپايعا» كەزەك بەرىپ, زارينانىڭ جولى بولعان ەدى.

جارىس ناتيجەسىندە قازاقستان دزيۋدو قۇراماسى ەكى التىن, ەكى كۇمىس جانە ءۇش قولا جۇلدەمەن جالپىكوماندالىق ەسەپتە ءبىرىنشى ورىننان كورىندى. ال, ەكى التىن, ءبىر قولا ەنشىلەگەن ۆەنگريا ەكىنشى ورىنعا تۇراقتاسا, ۇزدىك ۇشتىكتى ءبىر التىن, ەكى كۇمىس جانە بەس قولاسى بار گەرمانيا قورىتىندىلادى.

ماراپاتتاۋ راسىمىندە ءار جەڭىمپازعا ديپلومداردان بولەك 100 000 اقش دوللارى كولەمىندە سىي-سياپات كورسەتىلدى.

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button