جاڭالىقتار

باقىت باستاۋى

اديلەت1-(1)

– ۇيىڭە قۋانىپ بارساڭ, جۇمىسىڭا اسىعىپ جەتسەڭ – باقىت دەگەن سول. سوندىقتان ءار ادام ءوزىنىڭ ومىرلىك جارى مەن كاسىبىن تاڭداۋدا قاتەلەسپەۋى كەرەك, – دەيدى «مەرەيلى وتباسى» بايقاۋىنا قاتىسىپ وتىرعان مەديتسينا عىلىمدارىنىڭ كانديداتى, جوعارى ساناتتى دارىگەر ادىلەت دۇيسەمباەۆ.

ادىلەت قيزاتۇلى وتباسىمەن استاناعا 2007 جىلى كوشىپ كەلگەن. قالالىق دەنساۋلىق ساقتاۋ باسقارماسى بىلگىر ماماندى ارنايى شاقىرعان. ونىڭ وزىندىك سەبەبى بار. ول – سۇيەك-بۋىن تۋبەركۋلەزىن ەمدەۋدەگى ساناۋلى مامانداردىڭ ءبىرى. قۇرت ءتۇسىپ, ابدەن مۇجىلگەن سۇيەككە وپەراتسيا جاساۋدىڭ شەبەرى. «بولاشاق» باعدارلاماسى بويىنشا يزرايلدا بىلىكتىلىگىن جەتىلدىرىپ كەلگەن ادىلەت دۇيسەمباەۆ ەلورداعا كەلىپ, تۋبەركۋلەزگە قارسى ديسپانسەردە وستەوحيرۋرگيالىق بولىمشەنى اشادى. سۇيەك-بۋىن تۋبەركۋلەزىن ەمدەيتىن استاناداعى جالعىز بولىمشە ءتورت جىلدىڭ ىشىندە 300-گە جۋىق وپەراتسيا جاساپ ۇلگەرىپتى.
ادىلەت قيزاتۇلى كۇردەلى اۋرۋعا شالدىعىپ, جۇرە الماي قالعان تالاي ادامدى اياعىنان تۇرعىزدى. سىرقاتى ابدەن مەڭدەپ, كۇللى دەنەسى جانسىزدانىپ قالعاندار دا شيپالى دارىگەردىڭ ەمىنەن كەيىن قۇلان-تازا جازىلىپ شىقتى.
– تۋبەركۋلەز اۋرۋى وڭايلىقپەن جازىلمايدى. بۇرىن سۇيەك, بۋىن تۋبەركۋلەزىنە شالدىققاندار دا جارتى جىلداپ اۋرۋحانا توسەگىنە تاڭىلاتىن. بۇل ناۋقاستارعا دا وڭاي ەمەس. سوندىقتان ءبىز دە اۋرۋدى تەزىرەك ەمدەۋدىڭ تىڭ تاسىلدەرىن ىزدەستىرە باستادىق. ناتيجەسىندە, قازىر پاتسيەنتتەرىمىز ارى كەتسە ەكى ايدىڭ ىشىندە اياعىنان تۇرىپ, ءجۇرىپ كەتەدى, – دەيدى كەيىپكەرىمىز.
وسى سالادا يننوۆاتسيالىق ءتا­سىل­دەردى ەنگىزگەنى ءۇشىن ادىلەت ءدۇي­سەمباەۆ 2012 جىلى «سمارت استانا» كونكۋرسىندا ءبىرىنشى ورىندى جەڭىپ الادى. 2013 جىلى رەسپۋبليكا بويىنشا «جىلدىڭ ۇزدىك دارىگەرى» اتانادى. ءوزى – 50-دەن اسا عىلىمي ەڭبەكتىڭ اۆتورى. مەديتسينا سالاسىنا الا كەلگەن تىڭ جاڭالىعىنىڭ ءوزى 30-دان اسادى. ايتپاقشى, دارىگەردىڭ اكەسى قيزات ءانۋارۇلى دا كەزىندە ەلىمىزدىڭ قۇرمەتتى تراۆماتولوگ-ورتوپەد دارىگەرى بولعان.
– مەن ءوزىمدى ماماندىعىن اداسپاي تاپقانداردىڭ قاتارىنا قوسامىن. ادام نەعۇرلىم ماماندىعىن جاقسى كورسە, سوعۇرلىم جەتىستىككە جەتەدى, – دەيدى دارىگەر.
ءادىل قيزاتۇلىنىڭ جان جارى دينارا ەرنازارقىزى شەتەل تىلدەرى مەن ەكونوميكا سالاسىنىڭ مامانى. اعىلشىن, قىتاي تىلدەرىندە ەركىن سويلەيدى. قازىر جەكە كاسىپكەر.
– ءبىزدىڭ ۇيدە وتاعاسى نە ايتادى – سول زاڭ. «بالالاردىڭ اكەسىن پاتشاڭداي سىيلاساڭ, بالالارىڭ دا پاتشاداي بولادى» دەيدى عوي. ونىڭ جۇمىسى وڭاي ەمەس. وپەراتسيا جاسايتىن كۇنى ءبىز دە ءوزىمىز وتا جاسايتىنداي ۋايىمداپ, ۇنەمى تىلەكشى بولىپ وتىرامىز, – دەيدى دينارا.
جىلىلىق ۇيالاعان وتباسى ءازىر­شە ەكى بالا تاربيەلەپ وتىر. ەكەۋى دە تالانتتى. ۇلكەنى الىبەك – «بال­بوبەك», «ەۆرازيا جۇلدىزدارى» كونكۋرستارىنىڭ جۇلدەگەرى. كارا-تەنى دە مەڭگەرگەن, شاحماتتى دا جاقسى وينايدى. كىشكەنەسى ءنۇرالى ءازىر بالاباقشادا. سونىڭ وزىندە «جىگىت سۇلتانى» بايقاۋىندا ءجۇل­­دەگەر اتانىپ ۇلگەرىپتى. «ءبىز بالا­لاردىڭ بوس ۋاقىتىن تەك پايدالى نارسەگە جۇمساعانىن, تەلەۆيزور, ينتەرنەتتىڭ جەتەگىندە كەتپەۋىن قاتاڭ قاداعالايمىز» دەيدى اناسى دينارا.
ەلىنە پايدالى ءىس جاساپ, وتباسىن دا ۇيىتىپ وتىرعان ادىلەت دۇيسەمباەۆ: «وتباسىڭ – بارلىق بەرەكەنىڭ باستاۋى. سوندىقتان اركىم ءوزى قۇرعان كىشكەنتاي وتانىن شايقالتپاي, ىرگەسىن بەرىك ەتۋىنە بارىن سالۋى ءتيىس» دەيدى.

قىمبات توقتامۇرات

تاعىدا

ۇقساس جاڭالىقتار

پىكىر ۇستەۋ

Back to top button