باقىتتى بولاشاق باعدارى
وتكەن بەيسەنبى كۇنى «قازاقستان» ورتالىق كونتسەرت زالىندا ەسىل اۋدانى اكىمى اپپاراتىنىڭ ۇيىمداستىرۋىمەن مەملەكەت باسشىسىنىڭ قازاقستان حالقىنا ارناعان «نۇرلى جول – بولاشاققا باستار جول» جولداۋىنىڭ نەگىزگى باعىتتارىن ءتۇسىندىرۋ ماقساتىندا حالىقپەن كەزدەسۋى وتكىزىلدى.
ءىس-شاراعا استانا قالاسىنىڭ باسقارمالار, كوممۋنالدىق كاسىپورىندار باسشىلارى مەن اۋداننىڭ مەملەكەتتىك قۇرىلىمدارى مەن ۇيىمدارىنىڭ قىزمەتكەرلەرى قاتىستى.
جينالعاندار الدىندا استانا قالاسى اكىمىنىڭ ورىنباسارى ا.بالاەۆا مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى د.قامزابەكۇلى ەلباسى جولداۋىندا ايتىلعان بىرقاتار ءماسەلەلەرگە توقتالدى.
ەلدىك ۇستانىمدار, ۇرپاق ساباقتاستىعى, ماڭگىلىك ەل, ءبىلىم, عىلىم تاقىرىبىندا ءسوز وربىتكەن عالىم د.قامزابەكۇلى جولداۋداعى نەگىزگى جەتى باعىت مەملەكەتتىڭ ءوركەندەۋى مەن جاستاردىڭ بولاشاعىنا بايلانىستى جاسالاتىن زور قامقورلىققا تولى ەكەندىگىن ايتتى.
ال, ءوز سوزىندە ايدا عالىمقىزى «ءبىزدىڭ وسى قول جەتكەن جەتىستىگىمىز, ەڭ ءبىرىنشى, ەلدىڭ ءبىرلىگى مەن تاتۋلىعىنىڭ, قوعامداعى ساياسي تۇراقتىلىق پەن اۋىز بىرلىكتىڭ ارقاسىندا ءمۇمكىن بولۋدا. تاۋەلسىزدىكتىڭ نىعايا ءتۇسۋى ءار ادامنىڭ جاقسى نيەتى مەن جاۋاپكەرشىلىگىنە بايلانىستى بولماق. قازىر ءبىزدىڭ الەۋمەتتىك جاعدايىمىز جىلدان-جىلعا جاقسارىپ كەلەدى. مىنە, ەلباسىنىڭ كورەگەندىك ساياساتىنىڭ ءناتيجەسىندە قۇرىلعان ۇلتتىق قوردان بولىنەتىن قوماقتى قارجى سول قول جەتكەن جەتىستىكتەردى ءتومەندەتپەۋگە مۇمكىندىك بەرەدى» دەي كەلىپ, ەلورداداعى مەكتەپكە دەيىنگى ءبىلىم بەرۋ, بالانى بالاباقشاعا ورنالاستىرۋ ماسەلەلەرىنىڭ وزەكتىلىگىنە, بۇل رەتتەگى مەملەكەتتىك جانە جەكە مەنشىك ارىپتەستىك تەتىكتەرىنە, حالىقتى جۇمىسپەن قامتۋ سالاسىندا اتقارىلىپ جاتقان شارۋالاردىڭ ءپارمەندىلىگىنە توقتالدى.
جىل باسىنان بەرى 62,6 مىڭ زەينەتكەرگە, 235 سوعىس ارداگەرى مەن قاتىسۋشىسىنا, 19,4 مىڭ ءمۇگەدەك پەن 5,5 مىڭعا جۋىق كوپ بالالى وتباسىنا, 8 مىڭنان استام تۇرمىسى تومەن ازامات پەن كوپ بالالى اناعا – بارلىعى 83 مىڭ ادامعا الەۋمەتتىك كومەك كورسەتىلگەن.
– كەيىنگى جىلدارى جاستار اراسىندا جۇمىسسىزدىق دەڭگەيى ەكى ەسە ازايدى. بۇل – ەلوردا سياقتى كوشى-قون قارقىنى جوعارى قالا ءۇشىن وتە جاقسى كورسەتكىش. ەڭبەك ەتە وتىرىپ, ەل ەكونوميكاسىن وركەندەتۋگە وسى جىگىتتەر مەن قىزداردىڭ قوسار ۇلەسى زور. بولاشاقتا تاۋەلسىز ەلىمىزدىڭ تۇعىرى بيىكتەپ, قارىشتاپ دامۋى ءۇشىن ساپالى ءبىلىم, سانالى تاربيە العان وتانسۇيگىش جاستار عانا بار بەلەستى باعىندىرا الادى. «نۇرلى جول – بولاشاققا باستار جول» باعدارلامالىق قۇجاتىندا پرەزيدەنت ءبىرشاما تاپسىرمالار بەردى, ولاردىڭ ورىندالۋىنا قاراجات ءبولدى. ەندى, ءبىز سول بەلگىلەنگەن مىندەتتەردى جۇزەگە اسىرۋ ءۇشىن جۇمىسقا بەلسەنە كىرىسۋىمىز كەرەك» دەدى قالا اكىمىنىڭ ورىنباسارى.
ساعي ورال