كەشە استانادا قازاقستان بوكس فەدەراتسياسى كۋبوگىنىڭ فينالى ءوتتى. اقتىق سىندا اقمولا مەن جامبىل وبلىسى قۇرامالارى كەزدەستى. بيىل بەسىنشى رەت وتكەن بايراقتى باسەكەدە جامبىل وبلىسىنىڭ بوكسشىلارى جەڭىسكە جەتتى.
جىلدىڭ قورىتىندى جارىسى بارىسىندا 2014 جىلدىڭ ۇزدىكتەرىن ماراپاتتاۋ ءراسىمى ءوتتى. قازاقستان بوكس فەدەراتسياسىنىڭ تاڭداۋى بويىنشا «جىلدىڭ ۇزدىك بوكسشىسى» سىيلىعىنا بيىلعى ازيا ويىندارىنىڭ جەڭىمپازى, ۇلتتىق قۇرامانىڭ كاپيتانى دانيار ەلەۋسىنوۆ يە بولدى. «ۇزدىك جاس بوكسشى» سىيلىعىنىڭ يەگەرى بولىپ ءىى بۇكىلدۇنيەجۇزىلىك جاسوسپىرىمدەر وليمپياداسىنىڭ چەمپيونى اتانعان ابىلايحان ءجۇسىپوۆ, «ايەلدەر بوكسىنىڭ ۇزدىگى» اتاعىن بيىلعى الەم بىرىنشىلىگىندە توپ جارعان قازاقستاندىق تۇڭعىش الەم چەمپيونى نازىم قىزايباي يەلەندى. «ۇزدىك باپكەر» بولىپ قازاقستان ۇلتتىق قۇراماسىنىڭ باس جاتتىقتىرۋشىسى مىرزاعالي ايتجانوۆ تانىلدى.
بيىل حالىقارالىق بوكس قاۋىمداستىعى (ايبا) باسشىلىعى مۇشەلىگىنە بىرنەشە قازاقستاندىق ماماندار قابىلداندى. ايبا ۇيعارىمى بويىنشا جىلدىڭ ۇزدىك بوكسشىسى بولىپ دانيار ەلەۋسىنوۆ تانىلسا, ۇزدىك جاتتىقتىرۋشى اتاعىنا مىرزاعالي ايتجانوۆ يە بولدى. قازاقستاندا 2013 جىلى وتكەن الەم چەمپيوناتىنا ايبا جوعارى باعا بەردى.
مىنە, وسى جەڭىستەر مەن جەتىستىكتەر قازاقستان بوكس فەدەراتسياسىنىڭ بيىك مارتەبەسىن ايعاقتايدى. ەگەمەن ەل اتىنان وليمپيادا ويىندارىندا قاتىسقان قازاق بوكسشىلارى ۇزدىكسىز التىن مەدال الىپ كەلەدى. الەم چەمپيونى اتاعىن دا كوپ العان بىلعارى قولعاپ شەبەرلەرى بولىپ وتىر. وسىنىڭ ءبارى قازاقستان بوكسى الەم ارەناسىندا الدىڭعى قاتاردا تۇرعانىن بىلدىرەدى. ولاي بولسا, ۇلتتىق سپورتىمىزعا بالانعان قازاقستان بوكسى, قازاق بوكسشىلارىنىڭ باعى ەشقاشان بابىنان تايماسا دەپ تىلەيمىز.
عالىم قوجابەكوۆ
