توقسان بەسكە تولعان اتا باسىلىم – «ەگەمەن قازاقستان» تۋرالى «باس باسىلىم» فوتوالبوم-كىتابى جارىق كوردى.
بەلگىلى قالامگەر ءادىل دۇيسەنبەكتىڭ 2004 جىلى جازعان «قارا شاڭىراق», اتاقتى جۋرناليست جانبولات ءاليحانۇلى 2009 جىلى شىعارعان «ەگەمەنقازاقستاندىقتار», تاعى باسقا كىتاپتاردىڭ قاتارىن تولىقتىرعان بۇل توپتاما باسىلىمنىڭ 95 جىلدىق مەرەيتويىنا وراي شىعارىلىپ وتىر.
«جاڭا ءومىردىڭ سونى سۇرلەۋىنە تۇسكەن حالىقتىڭ سوقتىقپالى-سوقپاقتى, تايعاق كەشۋلى جولىنىڭ, جەتپىس جىلدايعى سوتسياليستىك ءداۋىردىڭ, شيرەك عاسىردايعى تاۋەلسىزدىك كەزەڭىنىڭ شەجىرەسى جارقىراپ جاتىر بۇل گازەتتىڭ سارعايعان بەتتەرىندە. ونىڭ تىگىندىلەرىنەن عاسىرعا جۋىق ۋاقىتتىڭ ىشىندە ءسوز العان ءجۇز-ءجۇز مىڭداعان ادامداردىڭ داۋىسى كۇڭگىرلەپ ەستىلىپ تۇرعانداي». «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ كىتاپتىڭ «ۇلى جولدىڭ ءبىر بەلەسى» دەپ ايدارلانعان العىسوزىندە وسىلاي دەيدى. راسىندا دا, بۇل گازەتتىڭ ارحيۆتەگى تىگىندىلەرىندە سماعۇل سادۋاقاسوۆ, جۇسىپبەك ايماۋىتوۆ, ساكەن سەيفۋللين, مۇحتار اۋەزوۆ, بەيىمبەت مايلين, تۇرار رىسقۇلوۆ, وراز جاندوسوۆ, عابيت مۇسىرەپوۆتەردىڭ جۇرەگىنىڭ سوعىسى, نيەتى مەن تىلەگى, كۇمبىرلەگەن ءۇنى – قولتاڭباسى بار. ءوزىمىز قادىر تۇتاتىن اعالارىمىز – تاۋەلدى زاماننىڭ وزىندە تاۋەلسىزدىكتىڭ قامىن جەپ, ارمان-ماقساتىنىڭ, ۇلتتىق مۇددە تۇرعىسىنداعى ۇستانىمىنىڭ ۇشقىنىن تانىتىپ قالىپ وتىرعان شەرحان مۇرتازا, كەمەلدىلىگى مەن تەرەڭدىگىن پاش ەتىپ, وقىرمان ورەسىن ءوسىرۋدى مۇرات ەتكەن ءابىش كەكىلباەۆ, ۇلتتىڭ ادال ۇلدارى نۇرلان ورازالين, ءۋاليحان قاليجانۇلى, ەرجۇمان سمايىل
سىندى قالامگەرلەردىڭ رەداكتورلىق بەت-بەينەسى دە وسىندا كورىنىس تاپقان.
1919 جىلى «ۇشقىن» دەگەن اتپەن جارىق كورىپ, كۇنى بۇگىنگە دەيىن «ەڭبەك تۋى», «ەڭبەكشىل قازاق», «ەڭبەكشى قازاق», «سوتسيالدى قازاقستان», «سوتسياليستىك قازاقستان» دەگەن اتاۋلارمەن شىققان بۇل گازەتتىڭ تاريحى – سوڭعى 95 جىلداعى قازاقستان, قازاق تاريحىنىڭ شەجىرەسى دەۋگە بولادى. سول سەبەپتى, «باس باسىلىم» كىتابىنىڭ دا شەجىرە كىتاپ اتالۋى زاڭدى.
كىتاپقا گازەت تاريحىنا قاتىستى سيرەك سۋرەتتەر, قىزىقتى دەرەكتەر, وسى باسىلىمدا قىزمەت ەتىپ, ونىڭ وسۋىنە ءوز ۇلەسىن قوسقان قالامگەرلەردىڭ ەستەلىكتەرى ەنىپتى.
المازدى جونعان سايىن جارقىراي تۇسەتىنى, كەمەڭگەر قاريانىڭ جاسى ۇلعايعان سايىن ءسوزى التىندانىپ, اقىلى قازىناعا اينالاتىنى سەكىلدى, عاسىرعا جۋىق تاريحى بار «ەگەمەن قازاقستان» گازەتى دە قازاق قوعامىنىڭ قۇندىلىقتارى قاتارىنا ەنىپتى.
ءنازيرا سايلاۋقىزى
