ەلوردامىز باتىر انالار قالاسىنا اينالىپ كەلەدى. اۋداندىق اكىمدىكتەردە ەل دەموگرافياسىن دامىتۋعا قوسقان ۇلەستەرى ءۇشىن جيىرما ايەل ماراپاتتالىپ, «التىن القا» جانە «كۇمىس القا» قۇرمەت بەلگىلەرىنە يە بولدى.
قۇرمەتتى توسبەلگىگە يە بولعان انالاردىڭ 13-ءى الماتى اۋدانىندا تۇرادى. سونىڭ ىشىندە 11-ءى – كۇمىس, 2-ەۋى التىن القا الىپ وتىر. «باتىر انالارىمىزدى ماقتان ەتەمىز, ولار قۇرمەتكە لايىق, ويتكەنى التى جانە ودان ارتىق بالانى تاربيەلەپ, ءوسىرۋ – ۇلكەن جاۋاپكەرشىلىك جانە اۋىر مىندەت» دەيدى الماتى اۋدانى اكىمى اپپاراتىنىڭ باسشىسى عالىمجان سامەتوۆ ناگرادالاردى تابىستاۋ ساتىندە.
سارىارقا اۋدانىندا دا 7 باتىر انا ماراپاتتالدى. بىرەۋى التىن القا السا, التاۋى كۇمىس القا تاقتى. الداعى ۋاقىتتا سول جاعالاۋدا تۇراتىن 5 كوپبالالى انا دا ماراپاتتالاتىن بولادى.
بۇگىنگە دەيىن تاعى 77 ايەل كوپبالالى انا رەتىندە «التىن القا» جانە «كۇمىس القا» قۇرمەت بەلگىلەرىنە يە بولعان بولاتىن. بۇل باتىر انالاردىڭ 42-ءسى – الماتى اۋدانىنىڭ تۇرعىندارى. ولاردىڭ 14-ءى «التىن القا» يەلەرى بولسا, 30-ى «كۇمىس القا» العان. ەسىل اۋدانىندا دا 4 التىن, 5 كۇمىس القا يەگەرى تۇرادى.
سونداي-اق, سارىارقا اۋدانىندا تۇراتىن باتىر انالارىمىزدىڭ سانى دا 26-عا جەتىپ وتىر. اتالمىش اۋدانداعى «التىن القا» العانداردىڭ سانى التاۋ بولسا, قالعان جيىرماسى – «كۇمىس القالى». وسىلايشا استانا قالاسىندا جىل باسىنان بەرى 100-گە جۋىق ايەل باتىر انا اتاندى.
استانادا ەلىمىزدىڭ دەموگرافياسىنا ەلەۋلى ۇلەس قوسقان انالارعا ەرەكشە قۇرمەت كورسەتىلەدى. الەۋمەتتىك باعدارلامالاردى جۇزەگە اسىرۋ اياسىندا كوپبالالى انالار مەن ولاردىڭ وتباسىلارى ۇدايى جان-جاقتى مەملەكەتتىك قولداۋعا يە بولىپ كەلەدى.
بۇركىت نۇراسىل
