باستى اقپاراتقالا تىرشىلىگىمادەنيەت

باس قالادا – بەكمامبەتوۆ كينوفەستيۆالى

جەكسەنبى كۇنى ەلوردا جۇرتشىلىعى ءىىى حالىقارالىق «استانا» ەكشن-فيلمدەر فەستيۆالىنىڭ اشىلۋ سالتاناتىنىڭ كۋاسى بولدى. تيمۋر بەكمامبەتوۆ پەن ونىڭ كومانداسىنىڭ ءداستۇرلى فەستيۆالىنىڭ رەسمي اشىلۋى بەيبىتشىلىك جانە كەلىسىم سارايىندا ۇيىمداستىرىلدى. سارايدىڭ الدىنا توسەلگەن قىزىل كىلەممەن جۇزدەن استام كينو مايتالماندارى مەن مادەنيەت قايراتكەرلەرى ءجۇرىپ ءوتتى.

 سالتاناتتى اشىلۋعا دەيىن قازاقستاندىق رەجيسسەر تيمۋر بەكمامبەتوۆ باق وكىلدەرىنە ءباسپاسوز ءماسليحاتىن وتكىزدى. وندا كينوفەستيۆال پرەزيدەنتى استانانى ازيالىق كينەماتوگرافيا ورتالىعىنا اينالدىرۋ قاجەتتىگىن ايتتى.

 – بيىل فەستيۆال كوپ كينەماتوگرافيستەرگە قاراي ەلەۋلى قادام جاسادى.

ءبىز 90-شى جىلداردىڭ جۇلدىزدار شەرۋىن جاساۋدى دوعاردىق. ءبىز استانانى ازيالىق كينەماتوگرافيا ورتالىعىنا اينالدىرۋمىز كەرەك, – دەدى ول.

بيىلعى فەستيۆالگە ازيا قۇرلىعىنداعى ەڭ ءىرى ءۇش كينومەكتەبى – قىتايدىڭ بەيجىڭ كينومەكتەبىنەن, كورەيانىڭ كينوونەر اكادەمياسىنان, جاپونيانىڭ كيوتو ونەر ۋنيۆەرسيتەتىنەن جاس رەجيسسەرلەر كەلدى.

 – ءار مەكتەپتەن 30-عا تارتا قاتىسۋشى كەلدى. وعان قازاقستاننان تاڭدالىپ الىنعان 30 كينەماتوگرافيست قوسىلدى. سوندا بارلىعى 120 جاس رەجيسسەر قاتىسۋدا. ولار قىسقا ۋاقىت ىشىندە كينەماتوگرافيانىڭ كوپتەگەن سىرلارىنا قانىعىپ, قازاقستان جانە تاماشا قالا – استانا جايلى ماعلۇمات الۋعا ۇلكەن مۇمكىندىك الىپ وتىر. ولار بىرىگىپ, استانانىڭ جاڭا ميفولوگياسىن قۇرۋلارى ءتيىس. نە شىعاتىنىن ءبىز بىلمەيمىز, كورەمىز, باعدارلاما سوڭىندا كورسەتۋگە تىرىسامىز, – دەدى ت.بەكمامبەتوۆ.

ايتا كەتەرلىگى, ءۇش كۇندىك فەستيۆالگە بىرقاتار الەمدىك كينو جۇلدىزدارى, ايگىلى اكتەرلەر مەن رەجيسسەرلەر, مادەنيەت جانە ونەر قايراتكەرلەرى كەلدى. سونداي-اق تانىمال پروديۋسەرلەر مەن الەۋەتتى ينۆەستورلار دا بار. اراسىندا قازاقستان, كورەيا, جاپونيا, قىتايدان 150 دەلەگات, اقش, ەۋروپا, رەسەي جانە قازاقستاننان 300-دەن استام قوناق بار.

فەستيۆالدىڭ العاشقى كۇنى كورەيلىك ستسەناريست, رەجيسسەر جانە پروديۋسەر كانگ دجە گيۋ مەن سونگ دجين چو شەبەرلىك سىنىپتارىن وتكىزدى. سونىمەن بىرگە تانىمال رەسەيلىك اكتريسا ەليزا- ۆەتا بويارسكايا باق وكىلدەرىنىڭ سۇراقتارىنا جاۋاپ بەردى.

دۇيسەنبىنىڭ الا تاڭى اتىسىمەن امەريكاندىق رەجيسسەر, ستسەناريست كەۆين رەينولدەس قاتىسۋشىلارعا شەبەرلىك سىنىبىن وتكىزدى. ودان سوڭ كينوگەرلەر «حان شاتىر» ويىن-ساۋىق ورتالىعىنىڭ جانىنداعى ەتنو- اۋىلعا اتتاندى. قازاقتىڭ تاريحى مەن مادەنيەتىمەن تانىسىپ, ءان مەن جىرىن تىڭداپ قايتقان مەيماندار ءتۇس قايتا بەيبىتشىلىك جانە كەلىسىم سارايىنا قايتا جينالدى. فەستيۆال اياسىندا بەلگىلى قازاقستاندىق رەجيسسەر اقان ساتاەۆ پەن ايگىلى اكتەر ۆەنسان كاسسەل جۋرناليستەرگە ءباسپاسوز ءماسليحاتىن وتكىزدى. جەرلەسىمىز اقان ساتاەۆ ءسوز اراسىندا ءوزىنىڭ ۇلى وتان سوعىسى تۋرالى كينو تۇسىرۋگە نيەتتى ەكەنىن مالىمدەدى. ال ايگىلى فرانتسۋز اكتەرى ۆەنسان كاسسەل ءوزىنىڭ بەكمامبەتوۆ فيلمدەرىنە ەرەكشە قۇرمەتپەن قارايتىنىن ءارى ونىڭ فيلمدەرىنە تۇسۋگە قۋانا كەلىسەتىنىن ايتتى.

 

اينۇر سانابەك

تاعىدا

ۇقساس جاڭالىقتار

پىكىر ۇستەۋ

Back to top button