استانا قالاسى ءماسليحاتىنىڭ الەۋمەتتىك-مادەني ماسەلەلەرى جونىندەگى تۇراقتى كوميسسيانىڭ وتىرىسى ءوتتى. وسى كوميسسيا توراعاسىنىڭ ورىنباسارى قاراقات ابدەننىڭ توراعالىعىمەن وتكەن جيىندا 2011-2015 جىلدارعا ارنالعان استانا قالاسىن دامىتۋ قورىتىندىسى, ەلوردانىڭ 2015 جىلعا ارنالعان بيۋدجەتىنىڭ ورىندالۋى ماسەلەلەرى تالقىلاندى.
جيىنعا سونداي-اق, استانا قالالىق ءماسليحاتىنىڭ حاتشىسى جانات نۇرپەيىسوۆ, قالالىق باسقارمالار مەن دەپارتامەنتتەردىڭ جانە باسقا دا ۇيىمداردىڭ باسشىلارى قاتىستى.
2011-2015 جىلدارعا ارنالعان استانا قالاسىن دامىتۋ باعدارلاماسىنىڭ قورىتىندىسى تۋرالى بايانداما جاساعان ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى ايجان تۇگەلباەۆا ەلوردانىڭ بەس جىل كولەمىندە الەۋمەتتىك-مادەني سالادا باعىندىرعان بەلەستەرىن جان-جاقتى ايتىپ ءوتتى. ونىڭ ايتۋىنشا, حالىقتى الەۋمەتتىك قولداۋ باعىتىندا كوپ ءىس اتقارىلعان.
استانا قالاسىنىڭ وڭىرلىك جالپى ءونىمنىڭ كولەمى 4 تريلليون 560 ميلليارد تەڭگەنى قۇرادى. بۇل رەسپۋبليكا بويىنشا ءبىرىنشى كورسەتكىش بولىپ وتىر. ەلوردانىڭ وسىنداي ءوسىم قارقىنىن مەملەكەت باسشىسى نۇرسۇلتان نازارباەۆ ايرىقشا اتاپ ءوتتى.
قالادا حالىقتى جۇمىسپەن قامتۋ شارالارىنىڭ ناتيجەسىندە وتكەن جىلى جۇمىسسىزدار سانى 4,6 پايىزعا ازايعان. ناقتىلاپ ايتقاندا, ەلوردادا 18 389 جاڭا جۇمىس ورنى اشىلدى. بەس جىل كولەمىندە ءبىلىم بەرۋ سالاسىنداعى جۇمىس قولجەتىمدى جانە ساپالى ءبىلىم بەرۋدى دامىتۋعا باعىتتالعان. قازىرگى ۋاقىتتا استانا قالاسىندا اپاتتى جانە ءۇش اۋىسىمدىق مەكتەپ جوق. كەڭ جولاقتى ينتەرنەتكە قوسىلۋ ءجۇز پايىزدى قامتىعان. مەكتەپتى جاڭا موديفيكاتسيالاۋ كابينەتتەرىمەن قامتاماسىز ەتۋ 88 پايىزدى كورسەتكەن. بۇگىندە ەلوردادا 188 مەكتەپكە دەيىنگى مەكەمە جۇمىس ىستەيدى. ولاردا 1-دەن 6 جاسقا دەيىنگى بالالاردىڭ 48,7 پايىزى قامتىلعان. 2015 جىلى 2 340 ورىندىق 10 بالاباقشا پايدالانۋعا بەرىلسە, ونىڭ ىشىندە ينۆەستورلاردىڭ ەسەبىنەن 380 ورىندىق 2 بالاباقشا اشىلعان.
دەنساۋلىق ساقتاۋ سالاسىنداعى جاعدايعا ويىسقاندا بالالاردىڭ ءولىم-ءجىتىمى سوڭعى جىلدا 6,7 پايىزعا, تۋبەركۋلەز اۋرۋىنان كوز جۇمعاندار 3,2 پايىزعا تومەندەگەنى ءسوز بولدى. بۇرىن بۇل كورسەتكىش ءسال جوعارى بولعان. مادەنيەت سالاسىنداعى ەڭ باستى جەتىستىك رەتىندە ءبىر جىل كولەمىندە 7650 مادەني ءىس-شارا وتكىزىلگەنى تىلگە تيەك ەتىلدى. سوعان ساي ەكسكۋرسيا, كورمە ۇيىمداستىرۋ شارالارىنىڭ دا سانى ارتىپ, وعان جۇزدەگەن ادام تارتىلعان.
استانا قالاسىنىڭ 2015 جىلعا ارنالعان بيۋدجەتىنىڭ ورىندالۋى تۋرالى بايانداما جاساعان قارجى باسقارماسىنىڭ باستىعى رۋسلان دوساەۆتىڭ ايتۋىنشا, بيۋدجەتتىڭ يگەرىلۋى 102,4 پايىزدى قۇراعان. ونىڭ ىشىندە دەنساۋلىق ساقتاۋ باسقارماسى 29420,5 ملن تەڭگەنى يگەرۋدى كوزدەسە, ول 99,9 پايىزعا ورىندالعان. ال استانا قالالىق جاستار ساياساتى جونىندەگى جانە دەنە شىنىقتىرۋ جانە سپورت باسقارماسى سياقتى بىرنەشە باسقارما بيۋدجەتتىك قارجىنى 100 پايىز كولەمىندە يگەرگەن.
وسى تاقىرىپتا بايانداما جاساعان استانا قالاسى بويىنشا تەكسەرۋ كوميسسياسىنىڭ توراعاسى عالىمجان مولداش قالا بيۋدجەتىنىڭ ورىندالۋىنا مەملەكەتتىك قارجىلىق باقىلاۋدى جۇزەگە اسىرۋ جانە باقىلاۋ وبەكتىلەرىنىڭ قارجىلىق ءتارتىبىن نىعايتۋ بويىنشا بەلگىلى ءبىر جۇمىستار جۇرگىزىلگەندىگىن اتاپ ءوتتى. سونداي-اق, ءار سالا بويىنشا انىقتالعان ماسەلەلەرگە دە توقتالدى. ونىڭ ايتۋىنشا, ۆولونتەرلىك قوزعالىسقا استانادا جىلىنا 50 ملن تەڭگە قارجى بولىنەدى. ايتسە دە, ءبىزدىڭ قولدانىستاعى زاڭدارىمىزدا وسى «ۆولونتەرلىك» تۋرالى ۇعىم مۇلدەم جوق كورىنەدى. قوعام ءۇشىن اسا قاجەت قوزعالىستى زاڭدى تۇردە قولداپ دامىتۋ ءۇشىن ول اتاۋدى زاڭدى جولمەن قولدانىسقا ەنگىزۋ ماسەلەسىن كۇن تارتىبىنە شىعارار ۋاقىت كەلگەنىن دەپۋتاتتاردىڭ نازارىنا ۇسىندى. سونداي-اق, اۋلا كلۋبتارى دا رەسمي قۇجاتتارعا ەنبەگەن. بىراق, ەلوردادا قازىرگى ۋاقىتتا 20 شاقتى وسىنداي كلۋب جۇمىس ىستەيدى. ولارعا جىلىنا 100 ملن تەڭگە قارجى بولىنەدى. ونىڭ باسىم بولىگى وقىتۋشىلاردىڭ ەڭبەكاقىسىن تولەۋگە, قۇرال-جابدىقتار الۋعا جانە كوممۋنالدىق شىعىندارعا جۇمسالادى. ال اۋلا كلۋبتارىنا اعىمداعى جانە كۇردەلى جوندەۋگە بيۋدجەت قارجىسىن جۇمساۋعا ءتيىستى باسقارمانىڭ زاڭ جۇزىندە قۇقىعى جوق. ويتكەنى, بۇل مەكەمەلەر باسقا ۆەدومستۆولاردىڭ بالانسىندا تىركەلگەن. بايانداماشى وسى ماسەلەنى دە زاڭدى جولمەن شەشۋ ءۇشىن الداعى ءماسليحات سەسسسيانىڭ قاراۋىنا ەنگىزۋدى ۇسىندى.
قالالىق ءماسليحاتىندا قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيانىڭ وتىرىسى ءوتتى. وندا جوعارىدا اتالعان باسقارمالاردىڭ باسشىلارى وسى سالا بويىنشا استانا قالاسىنىڭ دامۋ قورىتىندىسىن, وتكەن جىلعى بيۋدجەتتىڭ ورىندالۋىنا قاتىستى بايانداما جاسادى. وندا قارالعان ماسەلەلەردىڭ بىرقاتارى الداعى ءماسليحات سەسسياسىندا كەڭىنەن تالقىلانباق.
مەڭدوللا شامۇراتوۆ
