استانا قالالىق ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيانىڭ وتىرىسىندا مۇمكىندىگى شەكتەۋلى ادامداردىڭ الەۋمەتتىك نىساندار مەن كولىك ينفراقۇرىلىمىنا قولجەتىمدىلىگى قارالدى. اتالمىش ماسەلە تۋرالى قالالىق جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ساۋلە نۇرعوجينا بايانداما جاسادى.
ونىڭ ايتۋىنشا, 2012-2016 جىلدار ارالىعىندا ەلوردادا 365 نىسانعا پاسپورت بەرىلدى. ال وتكەن جىلى الەۋمەتتىك نىساندار جانە كولىك ينفراقۇرىلىمى مۇمكىندىگى شەكتەۋلى جاندارعا 55,9 پايىزعا قولجەتىمدى بولدى.
بيىلعى اقپان ايىندا استانا اكىمدىگى قالالىق پروكۋراتۋرامەن بىرىگىپ, مۇگەدەكتەرگە الەۋمەتتىك نىساندار مەن كولىك ينفراقۇرىلىمىنىڭ قولجەتىمدىلىگىنە قاتىستى جول كارتاسىن ازىرلەدى. بۇعان قالا باسقارمالارى جاۋاپتى بولىپ تاعايىندالدى. ياعني, دەنە شىنىقتىرۋ جانە سپورت باسقارماسى سپورتتىق نىساندارعا, مادەنيەت, مۇراعات جانە قۇجاتتامالار باسقارماسى وزدەرىنە قاراستى 20 مادەني وشاققا, دەنساۋلىق ساقتاۋ باسقارماسى 43 ەمدەۋ نىسانىنا, ءبىلىم باسقارماسى 197 ءبىلىم بەرۋ مەكەمەسىنە مۇگەدەكتەردىڭ كەدەرگىسىز كىرۋىنە جاۋاپ بەرەدى.
جالپى العاندا استانادا پاسپورتتاۋعا جاتاتىن نىسانداردىڭ سانى – 1106. بيىل ولاردىڭ 705-ءسى پاسپورتتالۋى ءتيىس. الايدا 774 نىساندى مۇمكىندىگى شەكتەۋلى جاندارعا بەيىمدەۋ قاجەت. سونىڭ ىشىندە بيىل جەرگىلىكتى بيۋدجەتتەن مادەني وشاقتاردى بەيىمدەۋگە 33,5 ملن تەڭگە ءبولىندى. سپورت نىساندارىنا, ءبىلىم بەرۋ نىساندارىنا دا ءتيىستى قارجى بولىنگەن.
«دەنە شىنىقتىرۋ جانە سپورت باسقارماسىنىڭ جۇمىسىن اتاپ وتۋگە ءتيىستىمىز. ولار اعىمداعى جىلدىڭ 1 ماۋسىمىنا دەيىن بارلىق سپورتتىق نىساندارىن بەيىمدەيمىز دەپ ۋادە بەرىپ وتىر» دەيدى ساۋلە نۇرعوجينا.
ونىڭ ايتۋىنشا, جولاۋشىلار كولىگى جانە اۆتوموبيل جولدارى باسقارماسى كولىك ينفراقۇرىلىمىن دا بەيىمدەۋگە شارا قولدانىپ وتىر. ماسەلەن, 1020 اۆتوبۋستىڭ 609-ى اربامەن جۇرەتىن مۇگەدەكتەر كەدەرگىسىز ءمىنىپ ءتۇسۋ ءۇشىن قۇرالمەن جابدىقتالدى.
جالپى بيىل الەۋمەتتىك نىسانداردىڭ مۇمكىندىگى شەكتەۋلى جاندارعا قولجەتىمدىلىگىن 70 پايىزعا جەتكىزۋ جوسپارلانۋدا. سول ماقساتتا وتكەن ءساۋىر ايىندا «Rixos President Astana» قوناق ءۇيى مەن «جۇمباقتاس» قوناق ءۇي كەشەنىندە سايكەس جۇمىستار جۇرگىزىلدى. الدا «گيپپوكرات» ءدارىحانالار جۇيەسى مەن «پيالا» ءدامحاناسى, «دۋمان» ويىن-ساۋىق ورتالىعى جانە ت.ب. نىساندار مۇگەدەكتەرگە بەيىمدەلمەك.
الايدا «ەكسپو-2017» نىساندارى مۇمكىندىگى شەكتەۋلى جاندارعا جارتىلاي عانا قولجەتىمدى بولىپ وتىر.
بۇدان كەيىن بايانداما جاساعان استانا قالاسى بويىنشا ەڭبەك, الەۋمەتتىك قورعاۋ جانە كوشى-قون دەپارتامەنتى باسشىسىنىڭ مىندەتىن اتقارۋشى ورال مۇقياەۆ مەملەكەتتىك باقىلاۋدىڭ قورىتىندىسىندا بىلتىر نىساندارعا كەدەرگىسىز كىرىپ-شىعۋعا قاتىستى 16 تەكسەرۋ سونىڭ ىشىندە 8 كەزەكتەن تىس تەكسەرۋ جۇرگىزىلىپ, نىسان يەلەرىنە 1,3 ملن تەڭگەدەن استام سوماعا ايىپپۇل سالىنعانىن جەتكىزدى.
امانعالي قالجانوۆ
