جاڭالىقتار

باسپاسوزدە وتكەن 40 جىل

DSC_2400

سىرت كوزگە تىم قاراپايىم, ۇياڭ بولىپ كورىنگەنىمەن, تىلدەسە كەلە, ىشكى جان دۇنيەسىنىڭ تازالىعىمەن كوپشىلىكتى وزىنە باۋراپ الاتىن وسى ءبىر اقسارى كەلىنشەكتى استانانىڭ بايىرعى تۇرعىندارى جاقسى بىلەدى. اسىرەسە, جەرگىلىكتى اقىن, جازۋشىلار مەن جۋرناليستەرگە ونىڭ ەسىمى ەتەنە جاقىن. ويتكەنى, راۋشان دوسحوجينا – ءومىرىنىڭ قىرىق جىلىن باسپاسوزبەن بايلانىستىرعان ارداقتى دا اسىل جان. 

ول – كوپ شىعارمانىڭ العاشقى وقىرمانى. سياسى كەپپەگەن دۇيە­لەردىڭ باسىم بولىگى الدىمەن راۋشان اپايدىڭ الدىنا كەلىپ تۇسەتىن. قالامگەرلەردىڭ ول كىسىنى ىزدەيتىنى دە تەگىن ەمەس. سەبەبى كەز كەلگەن ادامنىڭ قولمەن جازعانىن جازباي تانيتىن قازاقتىلدى ساۋاتتى تەرىمشى ول كەزدە نەكەن-ساياق ەدى.
وسى وڭىردە تۋىپ-ءوسىپ, تسەلينوگرادتاعى №2 كاسىپتىك-تەحنيكالىق ۋچيليششەنى ويداعىداي تامامداعاننان كەيىن ول اقمولا وبلىستىق اتقارۋ كوميتەتىنىڭ باس­پاحاناسىنا جۇمىسقا ورنالاسادى. ول كەزدە نەبارى ون توعىز جاستا ەدى. مىنە, راۋشان دوسحوجينانىڭ دا سودان بەرگى ءومىرى باسپاسوزبەن بايلانىستى.
– ول كەزدە باسپاحانانىڭ جۇمىسى قازىرگىدەي ەمەس, قيىن بولاتىن. ءبارىن قولمەن تەرەتىنبىز. ءتۇننىڭ ءبىر ۋاقىتىنا دەيىن ءۇستى-باسىم شاڭ, ماي بولىپ باسپاحانادا جۇرەتىن كەزدەرىم ەسىمە تۇسسە, قازىرگى جاستار قانداي باقىتتى دەپ ويلايمىن. بۇگىندە ءبارى كومپيۋتەرلەندىرىلگەن. ءبىزدىڭ كەزىمىزدەگىدەي ەمەس, قيىندىق تا از,- دەيدى ر.دوسحوجينا.
جۇمىسىنا جاۋاپتى, وزىنە تاپسىرىلعان ءىستى تياناقتى اتقارا بىلەتىن جاس مامان كوپ ۇزاماي باس­پاحانادان وبلىستىق پارتيا كومي­تەتىنىڭ ورگانى – بۇرىنعى «كوممۋنيزم نۇرى», قازىرگى «ارقا اجارى» گازەتىنىڭ رەداكتسياسىنا اۋىستىرىلادى. سول تۇستا بۇل جەردە و.الىبەكوۆ, م.حاسەنوۆ, ج.ابدىحالىقوۆ, ج.جاعىپاروۆ, ب.يماشەۆ, ت.ىلدەباەۆ, ا.جۇمابەكوۆ سىندى وسى ءوڭىردىڭ كىل مىقتى جۋرناليست-جازۋشىلارى جۇمىس ىستەيتىن. سولاردىڭ قولمەن جازعان دۇنيەلەرىن ماشينكادا باسادى. ول كەزدەگى ادامداردىڭ كوبىنىڭ جازۋى دا تەپ-تەگىس, كەلىستى ەدى. ارينە, اراسىندا ايباق-سايباقتارى دا كەزدەسىپ جاتاتىن. سوعان قاراماستان, راۋشان اپاي ءبارىن دە تاپ-تۇيناقتاي ەتىپ, تىق ەتكىزىپ باسىپ بەرەدى. ءتىپتى, كەيدە ۇيلەسپەگەن سويلەمدەردى ءوزى جوندەپ جىبەرگەن كەزدەرى دە از ەمەس. وندايدا گازەتتىڭ جاۋاپتى حاتشىسى بولعان ءبادۋان اعا «ءبىزدىڭ راۋشان ءبارىن بىلەدى» دەپ ارقاسىنان قاعىپ قوياتىن.
وبلىس ورتالىعى كوكشەتاۋعا كوشىرىلىپ, «ارقا اجارى» سول جەردەن شىعاتىن بولعان تۇستا وتباسى جاعدايىمەن استانادا قالىپ قويدى. كەيىن ەلوردانىڭ رەسپۋبليكاعا تارالاتىن «استانا اقشامى» گازەتىنە وپەراتور-تەرۋشى بولىپ جۇمىسقا ورنالاسقان ول مۇندا دا ءوزىنىڭ ۇقىپ­تىلىعىمەن, تياناقتىلىعىمەن ەرەكشەلەندى.
عۇمىرىنىڭ بارلىق ماعىنالى جىلدارىن ءباسپاسوز سالاسىنا ارناعان راۋشان اپايدى سوناۋ وتكەن عاسىردىڭ توقسانىنشى جىلدارىنىڭ باسىنان باستاپ بىلەمىن. سودان بەرى, مىنە, شيرەك عاسىردان اسىپ بارادى. اپايمەن قىزمەتتەس بولعان جىلداردا ول كىسىنىڭ ارتىق سويلەمەيتىندىگىن, ءوز جۇمىسىنا مىعىم, بوتەن مىنەزىنىڭ جوق ەكەنىن بايقادىم. قانداي شارۋاعا بولماسىن تاپ-تۇيناقتاي. جيناقىلىقتى قاتتى ۇناتادى. سول قاسيەتىنەن ءالى دە تانباي كەلەدى. ەشكىمنىڭ الا ءجىبىن اتتامادى. ادال ەڭبەك ەتتى. ارامدىقتان ادا, دوستىققا ادال, جۇمىستى جانىمەن اتقاراتىن راۋشان اپايدى ارىپتەستەرى دە ەرەكشە قۇرمەت تۇتادى. سەبەبى, ول كەز كەلگەن تاقىرىپتى ءيىرىپ اكەتەدى. كوپشىل, جيىن-تويدىڭ كوركى, قوڭىر داۋىسىمەن سىزىلتىپ ءان سالعاندا تامسانىپ, تاڭداي قاقپايتىندار كەمدە-كەم.
– ادالدىقتى انامنان ۇيرەندىم, – دەيدى اپاي. – ءبىر مەكەمەدە وسىنشا ۋاقىت ەڭبەك ەتىپ وتىرعانىم دا انامنىڭ تاربيەسىنىڭ ارقاسى دەپ ويلايمىن. ەشقاشان دۇنيە قۋعان جوقپىن, بايۋدى, ءزاۋلىم ساراي سالعىزۋدى مۇرات تۇتپادىم. قاراپايىم تىرشىلىگىمە تاۋبە دەپ, اق نانىمدى ادال جەۋدى باقىت سانادىم. اتامىز قوجا, ءدىني ساۋاتتى كىسى بولعان ەكەن. سول كىسىنىڭ يماني ۋاعىزدارىن ەستىپ وسكەندىكتەن بولار, جاستايىمىزدان قاراپايىمدىلىق, ادالدىق, ەڭبەكقورلىق, مەيىرىمدىلىك دەگەن سوزدەر سانامدا جاتتالىپ قالدى.
ءبىر سالادا تابان اۋدارماستان قىرىق جىل ەڭبەك ەتسە دە, ول كىسى شارشادىم, قاجىدىم دەپ كورگەن جان ەمەس. كەرىسىنشە, جاستاردى جىگەرلەندىرىپ, ارماندارىن اسقاق­تاتىپ, قاناتتاندىرىپ وتىرادى. سول ءۇشىن رەداكتسيانىڭ ۇلكەنى دە, جاسى دا ونى ەرەكشە جاقسى كورەدى. وسى جىلدار ارالىعىندا سەگىز باس رەداكتورمەن قىزمەتتەس بولىپ, ولاردىڭ بىردە-بىرىمەن ءشاي دەسپەي, قويان-قولتىق جۇمىس ىستەۋى دە سول قاسيەتىنىڭ ارقاسىندا بولسا كەرەك.
ومىرلىك جارى ەكەۋى اينۇر, روزا ەسىمدى قىزدار ءوسىردى. بۇگىندە اجە اتانىپ, نەمەرەسىنىڭ قىزىعىنا كەنەلىپ وتىرعان اپايدىڭ ءالى تالاي تۋىندىعا تۇڭعىش وقىرمان اتانارى انىق. تەك, اللا قۋات بەرسىن دەيىك.

گۇلبارشىن وكەشقىزى

تاعىدا

ۇقساس جاڭالىقتار

پىكىر ۇستەۋ

Back to top button