مادەنيەت

باتىرحان شۇكەنوۆتى ەسكە الادى

F425B0D6CCC42041

5 ماۋسىم كۇنى «استانا-ارەنا» ستاديونىندا دۇرىلدەپ وتەتىن «مۋز-تۆ- 2015. گراۆيتاتسيا» سىيلىعىن تاپسىرۋ راسىمىنە دەيىن از عانا ۋاقىت قالدى. ءبىر وكىندىرەتىنى, وعان ەندى ەلىمىزدىڭ عانا ەمەس, رەسەيلىكتەردىڭ دە سۇيىكتى انشىسىنە اينالعان باتىرحان شۇكەنوۆ قاتىسا المايدى. مۇنارالى ماسكەۋدى ورەلى ونەرىمەن مويىنداتقان قازاقتىڭ ساڭلاق ۇلىنىڭ جالعاندا تاتار ءدام-تۇزىنىڭ تاۋسىلعانىنا دا جارتى ايدان اسىپ بارادى…

باتىرحان 18 مامىر كۇنى 53 جاسقا تولاتىن ەدى. سول كۇنى الماتى جۇرتشىلىعى ءانشىنى ەسكە الۋ كونتسەرتىن ۇيىمداستىرماق. استانادا دا وسىنداي شارا وتكىزىلسە, ارتىقتىق ەتپەس ەدى. دەسەك تە, ءانشىنىڭ ەسىمى ەلوردادا ەسكەرۋسىز قالمايدى. «مۋز-تۆ» تەلەارناسىنىڭ باس ديرەكتورى ارمان داۋلەتياروۆتىڭ ايتۋىنشا, «مۋز-تۆ- 2015. گراۆيتاتسيا» سىيلىعىن تاپسىرۋ ءراسىمى كەزىندە مارقۇمنىڭ دوستارى مەن ارىپتەستەرى «ا’Studio» توبىمەن بىرگە باتىرحان شۇكەنوۆتىڭ اندەرىنەن قۇرالعان ارنايى ءنومىر دايىنداپ وتىر. بۇدان بۇرىن ءانشىنىڭ تۋعان كۇنى اتالمىش ارنادان مۋزىكانتتىڭ وسىدان ەكى جىل بۇرىن الماتى قالاسىندا وتكەن «باتىر. LIVE» كونتسەرتى كورسەتىلەدى.
ءدۇبىرى قۇلاققا جاقىن جەتكەن «مۋز-تۆ- 2015. گراۆيتاتسيا» سىيلىعىن تاپسىرۋ راسىمىنە كەلسەك, العاشقى ءسوليسى باتىرحان شۇكەنوۆ بولعان «ا’Studio» توبى ەكى جىل قاتارىنان – 2010 جانە 2011 جىلدارى ەڭ ۇزدىك توپ اتانعان. بيىل دا بۇل توپ وسى اتالىمداعى ۇمىتكەرلەردىڭ قاتارىندا. باسقا-باسقا, قازاقستاندىقتار بايعالي سەركەباەۆ باستاعان توپقا داۋىستارىن ايامايدى دەپ سەنەمىز.
ارينە, بۇل توپتان بولەك تالاي ەسترادالىق ۇجىمدار مەن تانىمال انشىلەر, بەلگىلى ارتىستەر ماۋسىم ايىندا استاناعا كەلمەك. سولاردىڭ ءبىرى – يماني ەسىمىمەن الەمگە ايگىلى فرانتسۋز ءانشىسى ناديا ملادجاو ارنايى قوناق بولادى.
ءبىر قىزىعى – يماني ءسوزى سۋاحيل تىلىندە سەنىم ماعىناسىن بەرەدى. دەمەك, كومور ارالدارىندا دۇنيەگە كەلگەن ناديانىڭ ۇلتىمىزعا دا جاتتىعى جوق دەپ پايىمدايمىز. ءجاسوسپىرىم كۇنىندە ءانشى سپورتپەن, سونىڭ ىشىندە بيىكتىككە سەكىرۋمەن اينالىسقان. جەتى جىل اقش ەلىندە تۇردى. فرانتسياعا قايتىپ ورالعاننان كەيىن انشىلىك ونەرگە دەندەپ كىرىستى. 2011 جىلى شىققان «The Shape of a Broken Heart» اتتى العاشقى البومى فرانتسيا مەن گرەكيا ەلدەرىندە پلاتينالىق مارتەبە الدى. ال, پولشادا مۇنداي مارتەبەگە ءۇش مارتە جەتىپتى. قارا ءناسىلدى ءانشىنى قازاقستاندىقتاردىڭ كوزبەن كورىپ, ونەرىنە باعا بەرەتىن كۇن دە الىس ەمەس.
ەسكە سالا كەتەيىك, بيىل «مۋز-تۆ- 2015. گراۆيتاتسيا» سىيلىعىن تاپسىرۋ راسىمىنە العاشقى رەت «قازاقستاندىق ۇزدىك جىل ءانشىسى» اتالىمى ەنگىزىلىپ وتىر. بۇل اتالىمدا «مۋزارت» توبى, نۇرلان ابدۋللين, قايرات نۇرتاس, جانار دۇعالوۆا جانە ءالي وقاپوۆ ونەر جارىستىرۋدا. قايسىسىنىڭ ونەرى ۇستەم تۇسەتىنى 5 ماۋسىم كۇنى انىقتالادى.

امانعالي قالجانوۆ

تاعىدا

ۇقساس جاڭالىقتار

پىكىر ۇستەۋ

Back to top button