استانا اكىمى ادىلبەك جاقسىبەكوۆتىڭ توراعالىعىمەن وتكەن كەزەكتى اپپارات كەڭەسىندە قالاداعى اباتتاندىرۋ جۇمىستارى مەن ساۋدانى ۇيىمداستىرۋ ماسەلەلەرى تالقىلاندى دەپ حابارلادى قالا اكىمىنىڭ ءباسپاسوز قىزمەتى.
ەلوردا مەرى بەيبەرەكەت ساۋدا قالا تۇرعىندارىنىڭ نارازىلىعىن تۋدىرىپ جۇرگەن ماسەلەلەردىڭ ءبىرى ەكەندىگىنە توقتالدى. اتاپ ايتقاندا, مۇنداي كەلەڭسىزدىك «ارتەم» ساۋدا ورتالىعىنىڭ ماڭىندا كوپتەپ كەزدەسەدى. بۇل جەردەگى ساۋدا نۇكتەلەرىنىڭ يەلەرى ادامداردى ارزان باعامەن قىزىقتىرىپ, ولاردىڭ قاۋىپسىزدىگى مەن سانيتارلىق جاعدايلاردى ساقتاي بەرمەيدى.
– بۇعان جول بەرۋگە بولمايدى. مۇنداي دۇڭگىرشەكتەر قالانىڭ بارلىق اۋداندارىندا كەزدەسەدى. وسىعان جاۋاپتى قۇرىلىمداردىڭ باسشىلارىنا ەسكەرتەمىن. بۇل جۇمىس كەشەندى ءارى جۇيەلى تۇردە جۇرگىزىلۋى ءتيىس, ەشكىمنىڭ ءوز مىندەتىن وزگەگە جۇكتەۋگە قاقىسى جوق. مەن بۇل جاعدايدى ءوز باقىلاۋىما الامىن, – دەپ اتاپ ءوتتى اكىم.
اكىم ءوزىنىڭ ورىنباسارى ءنۇرالى اليەۆكە ءتيىستى مەملەكەتتىك ورگاندارمەن بىرلەسىپ, بۇرىش-بۇرىشتاعى بەيبەرەكەت ساۋدانى جويۋ جونىندەگى ءىس-شارالار جوسپارىن ازىرلەۋدى تاپسىردى.
تالقىلانعان تاعى ءبىر ماسەلە – قۇرىلىس نىساندارىنىڭ احۋالى. اكىم قۇرىلىس الاڭدارى قورشاۋلارىنىڭ لاستىعىن, مايىسقان, سىنعان جەرلەرىنىڭ كوپتىگىن ايتىپ, جىرتىلعان باننەرلەر, ءتىپتى كەي جەرلەردە ولاردىڭ ورنىنىڭ بوس تۇرۋى كوشەنىڭ سيقىن كەتىرەتىندىگىن تىلگە تيەك ەتتى.
– قۇرىلىس الاڭدارى قاۋىپتى نىسان بولىپ تابىلادى, سوندىقتان, جۇمىس باستالماي تۇرىپ قورشالۋى ءتيىس. قورشاۋلاردىڭ سىرتقى كورىنىسىنە, ماتەريالىنا جانە قۇرىلىسىنا قويىلاتىن بەلگىلى تالاپتار بار. مەملەكەتتىك ساۋلەت-قۇرىلىس باقىلاۋ باسقارماسىنا ەكى اپتا ىشىندە بارلىق قۇرىلىس نىساندارى قورشاۋلارىن قالپىنا كەلتىرىپ, برەندتەۋىن تاپسىرامىن, – دەدى ەلوردا باسشىسى.
جيىن بارىسىندا قالا باسشىسى ەلوردادا باستالعان ەكولوگيالىق ايلىق تۋرالى ەسكە سالىپ, جالپى قالالىق سەنبىلىككە شاھار تۇرعىندارىنىڭ بارلىعى قاتىسۋى كەرەك ەكەنىن اتاپ ءوتتى. بۇل رەتتە سايلاۋ ۋچاسكەلەرىنە, تۇرعىن الاپتارىنا, قالا ماڭىنداعى ايماقتارعا جانە بازارلارعا جاقىن اۋماقتاردى تازالاۋ مەن اباتتاندىرۋعا ەرەكشە كوڭىل ءبولۋ كەرەك ەكەنى باسا ايتىلدى.
