قازاقستان عاسىرلار بويى جيناقتالعان ادامگەرشىلىكتىڭ تەگەۋرىندى تالاپتارىن ادامزاتقا جەتكىزۋگە بايلانىستى جاۋاپتى ميسسيانى ءوز مىندەتىنە الدى. دىندەر مەن حالىقتار اراسىنداعى ءوزارا تۇسىنۋشىلىكتىڭ قالىپتاسۋ مۇمكىندىگىن جاساۋدا استانالىق سەزدىڭ ماڭىزى زور.
قازاقستان پرەزيدەنتىنىڭ باستاماسى بويىنشا ۇيىمداستىرىلعان الەمدىك جانە ءداستۇرلى دىندەر كوشباسشىلارىنىڭ سەزى قازىرگى زامانعى دىندەر اراسىنداعى جاھاندىق ابىرويلى سۇحباتتىڭ تابيعي جانە ىسكەرلىك كورىنىسى بولدى. بۇعان دەيىن ءۇش سەزد ءوتتى. مۇنداي ماڭىزدى شارانى جوعارى دەڭگەيدە وتكىزە بىلگەن قازاقستانعا بىرنەشە ەلدەن كەلگەن ءدىني ۇيىمداردىڭ باسشىلارى شىنايى ريزاشىلىعىن ءبىلدىردى. حالىقتار مەن ءدىني كوزقاراستاردى جاقىنداستىرۋعا, سول ارقىلى بەيبىتشىلىك قۇندىلىقتارىن قالىپتاستىرۋعا جاساعان قادامى ءۇشىن الەمدىك قاۋىمداستىق قازاقستانعا جوعارى باعا بەردى.
جاڭا ءححى عاسىردا ۇلتارالىق كەلىسىم مەن دىندەر اراسىنداعى ۇنقاتىسۋدىڭ ۇلگىسى ەلوردامىزدان باستاۋ الىپ وتىر. استاناداعى بەيبىتشىلىك جانە كەلىسىم سارايى ناعىز رۋحاني ورتالىققا اينالدى.
ورتالىق بەيبىتشىلىك, كەلىسىم جانە ادىلدىكتىڭ ينتەللەكتۋالدى زەرتحاناسى بولۋى قاجەت. «ول سەزدىڭ بارلىق قاتىسۋشىلارىن جاڭا يدەيالارمەن جانە ۇسىنىستارمەن تولىقتىراتىن قۇرىلىم بولۋى قاجەت»,– دەپ استانا سەزىنە باستاماشى بولعان, حالىقارالىق مادەني جانە ءدىني ورتالىقتى قۇرۋ يدەياسىنىڭ اۆتورى – قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆ ايتقان بولاتىن.
ەلىمىز الەمدە بەيبىتشىلىك ورناۋى ءۇشىن, اتاپ ايتقاندا, قاۋىپسىزدىك, ىنتىماقتاستىق, ءوزارا سىيلاستىق, تەڭدىك, ادىلدىك, توزىمدىلىك, رۋحاني-ادامگەرشىلىك باستاۋلارىن يگەرۋ قاعيداتتارىن ۇسىنىپ وتىر.
ەرتەڭ اشىلعالى وتىرعان الەمدىك جانە ءداستۇرلى دىندەر كوشباسشىلارىنىڭ ءتورتىنشى سەزىنە دايىندىقتى جۇرگىزۋ مىندەتى حاتشىلىقتىڭ ح وتىرىسىندا ساراپقا سالىندى. حاتشىلىق وتىرىسىندا ءدىني كوشباسشىلار كەڭەسىنىڭ تۇجىرىمداما جوباسى بەكىتىلدى.
الەمدىك جانە ءداستۇرلى دىندەر كوشباسشىلارى فورۋمىنىڭ قازاقستاننىڭ ەلورداسى – استانادا وتكىزىلۋىنىڭ ءوزى كەزدەيسوقتىق ەمەس.
ەلىمىزدە جۇزدەن استام ۇلت وكىلدەرى تۇرادى جانە بارلىق ءدىن وكىلدەرىنە وزدەرىنىڭ تاڭداۋى بويىنشا قۇلشىلىق ەتۋىنە مۇمكىندىك بەرىلگەن.
ۇلىستار اراسىنداعى كەلىسىمدى ساقتاۋدا قازاقستاندىق تاجىريبە وتە قۇندىلىعىمەن ەرەكشەلەنەدى.
شىنىمەن دە, كونفەسسياارالىق كەلىسىم فەنومەنى نەسىمەن قۇندى؟
بىرىنشىدەن, بۇل عاسىرلاردان كەلە جاتقان حالىقتار دوستىعىنان باستاۋ الادى, ال ەندى, بۇگىنگى قوعامدا قازاقستان حالقىنىڭ دوستىعىمەن جالعاسىن تاۋىپ وتىر.
ەكىنشىدەن, بۇل – ۇلتارالىق قاتىناستار سالاسىنداعى ەلباسىمىز ن.نازارباەۆتىڭ باسشىلىعىمەن جۇزەگە اسىرىلىپ جاتقان مەملەكەتتىك ساياسات.
قازاقستان – نەگىزىنەن ءداستۇرلى يسلام, حريستيان جانە باسقا ەجەلگى دىندەر ءوزارا تاتۋلىقتا وركەن جايعان ەل. كونفەسسياارالىق كەلىسىم قاعيداتتارىنىڭ ءبىرى ءاربىر ادامنىڭ ءوز ءدىنىن تاڭداۋعا قۇرمەتپەن قاراۋ بولىپ تابىلادى.
ادامداردىڭ ءبىر-بىرىنە دەگەن سىيلاستىق سەزىمى بىردەن بولا قالاتىن پروتسەسس ەمەس, ول كوپ جىلداردى قاجەت ەتەدى. مۇندا قازاقتاردىڭ مەنتاليتەتى, قازاقستان حالقىنىڭ بىرلىگىنە دەگەن ۇمتىلىسىنىڭ ءرولى زور.
ەلىمىزدىڭ ءوسىپ-وركەندەۋى ءۇشىن قازاقستاننىڭ ءاربىر ازاماتى, كەز-كەلگەن ۇلت وكىلى تۇراقتىلىقتىڭ بەلگىسى رەتىندە ءوزىنىڭ انا ءتىلىن قۇرمەتتەي وتىرىپ, قازاقتىڭ ءتىلىن, سالت-ءداستۇرىن ءبىلۋى قاجەت دەپ سانايمىن.
ءبىز – قازاقستاننىڭ پاتريوتىمىز. سوندىقتان, بەيبىتشىلىك پەن كەلىسىمگە دەگەن ءوزىمىزدىڭ ىنتا-جىگەرىمىزدى جاستاردىڭ بويىنا دارىتۋىمىز قاجەت. بۇل ءبىزدىڭ وتە جاۋاپتى ازاماتتىق ۇستانىمىمىز بەن بورىشىمىز!
ەگور كاپپەل,
قر پارلامەنتى ءماجىلىسىنىڭ دەپۋتاتى, قازاقستان حالقى اسسامبلەياسىنىڭ مۇشەسى
