بەردىقۇلوۆ بايگەسىن «الماتى» الىپ كەتتى
مامىردىڭ 9-10 كۇندەرى سپورت جانە دەنەشىنىقتىرۋ ىستەرى اگەنتتىگىنىڭ ۇيىمداستىرۋىمەن سەيداحمەت بەردىقۇلوۆتى ەسكە الۋعا ارنالعان ءداستۇرلى شاعىن فۋتبول ءتۋرنيرى تۇڭعىش رەت «استانا-ارەنا» ستاديونىندا بولىپ ءوتتى. وعان ەلىمىزدىڭ ءار وڭىرىنەن كوپتەگەن باق وكىلدەرى قاتىسىپ, جۋرناليستەردىڭ دە دوپ تەبە الاتىنىن كورسەتتى.
1995 جىلدان بەرى الماتىدا وتكىزىلىپ كەلگەن جارىستى ۇيىمداستىرۋشىلار ەلىمىزدەگى ورتالىق باسىلىمداردىڭ, سونداي-اق, باسقا دا گازەت-جۋرنالداردىڭ, تەلەارنالاردىڭ, ينتەرنەت سايتتاردىڭ باس قالادا شوعىرلانۋى سەبەپتى «استانا-ارەنادا» وتكىزۋگە شەشىم قابىلداعان ەكەن.
12 قۇراما قاتىسقان دوداعا الماتىلىق, شىمكەنتتىك جانە جەرگىلىكتى جۋرناليستەر قاتىستى. ءوز توبىنان وزا شاپقان ءۇش كوماندا جارتىلاي فينالعا تىكەلەي جولداما السا, ءار توپتاعى ەكىنشى ورىنداعىلاردىڭ ۇزدىك ناتيجە كورسەتكەنى اقتىق ويىنعا تالاساتىن ءتورت قۇرامانىڭ ءبىرى اتاندى. جارتىلاي فينالدىڭ العاشقى ويىنى وڭتۇستىكقازاقستاندىق جۋرناليستەر مەن «حابار» ارناسىنىڭ الماتىلىق قوسىنى اراسىندا ءوتىپ, «حابارلىقتار» اقتىق سىنعا شىقتى. ولاردىڭ ىزىنشە استانالىق «حاباردى» قاپى قالدىرعان «الماتى» تەلەارناسىنىڭ ۇجىمى دا فينال جولداماسىن قالتاعا باستى. سونىمەن, ءۇشىنشى ورىنعا تالاس بارىسىندا وڭتۇستىك قازاقستان وبلىسىنىڭ وكىلدەرى قارسىلاستارىن 4:3 ەسەبىمەن ۇتسا, فينالدا «الماتى» تەلەارناسى ءوز جەرلەستەرى سانالاتىن «حاباردى» پەنالتيدەن ءسۇرىندىرىپ, ءتۋرنيردىڭ باس جۇلدەسىن جەڭىپ الدى. جەڭىمپازدارعا ۇيىمداستىرۋشىلار تاراپىنان مەدال, ديپلوم جانە ت.ب. باعالى سىيلىقتار تابىس ەتىلدى.
بۇل تۋرنير باستاپقىدا بايلانىس جانە اقپارات مينيسترلىگىنىڭ, كەيىن 2008 جىلدان باستاپ تۋريزم جانە سپورت مينيسترلىگىنىڭ ۇيىتقى بولۋىمەن جولىنان جاڭىلماي كەلە جاتىر. سونداي-اق, ول 2011 جىلى سپورت جانە دەنەشىنىقتىرۋ ىستەرى اگەنتتىگىنىڭ باستاماسىمەن شىمكەنت قالاسىندا سپورتتىڭ بەس تۇرىنەن العاش رەت باق اراسىندا س.بەردىقۇلوۆتى ەسكە الۋعا ارنالعان ءى سپارتاكيادانىڭ وتۋىنە تۇرتكى بولدى.