قوعامدا بولىپ جاتقان كەلەلى ماسەلەلەردى سۋرەتشى تۋىندىسىنان باسقا ەشتەڭە اشىق ءارى بەينەلى ەتىپ جەتكىزە المايتىن سەكىلدى. بار قۇدىرەتىن قىلقالامعا سىيعىزعان ونەر يەلەرىنىڭ وسىناۋ قاسيەتى استانادا العاش رەت سۋرەتشىلەردىڭ حالىقارالىق بيەننالەسىن ۇيىمداستىرۋعا تۇرتكى بولىپ وتىر.
ەلوردا اكىمدىگى مەن سۋرەتشىلەر وداعىنىڭ باستاماسىمەن بۇگىن باستالاتىن بۇل شارانىڭ ۇرانى – ونەردى پلانەتامىزدى جاھاندىق جىلىنۋدان قۇتقارۋدىڭ پارمەندى تەتىگى رەتىندە كەڭىنەن تاراتۋ. ايتۋلى ۋاقيعا كەزىندە استانا ەلىمىزدىڭ وزگە وڭىرلەرىمەن قاتار يتاليا, فرانتسيا, شۆەيتساريا, گەرمانيا, رەسەي جانە ليۆاننان كەلەتىن قوناقتاردى قارسى الادى. ولار «بولاشاق ەنەرگياسى» تاقىرىبىندا جازعان ۇزدىك كارتينالارىن ەل نازارىنا ۇسىنادى. ياعني, ەكولوگيالىق پروبلەمالاردى كوتەرىپ, جاسىل تەحنولوگيانى قولدانۋ يدەياسىن ناسيحاتتايدى. ەلوردا تۇرعىندارى مەن مەيماندارى بىرنەشە كۇن بويى سۋرەتشىلەردىڭ شەبەرلىك سىنىپتارىنا دا قاتىسۋ مۇمكىندىگىنە يە بولادى. وسى ورايدا, اقش-تا PSA جانە ASOPA سىندى ءوزارا باسەكەلەس ەكى بەدەلدى كوركەمسۋرەت بايقاۋىندا ەڭ جوعارى ماراپاتتارعا يە بولعان الەمدەگى جالعىز سۋرەتشى نيكولاي بلوحينمەن جۇزبە-ءجۇز تانىسىپ, سۇحباتتاسۋ ءار ادام ءۇشىن ۇلكەن ابىروي بولماعى انىق.
بيەننالەنىڭ جابىلۋ سالتاناتى 6 شىلدە كۇنى تاۋەلسىزدىك سارايىندا وتەدى.
عازيزا توقتاربەكوۆا
