نۇر-سۇلتان قالاسى اكىمدىگىنىڭ قۇرىلىس-تەحنيكالىق كوللەدجى بازاسىندا «جاس مامان» جوباسى اياسىندا قۇزىرەتتىلىك ورتالىقتىڭ اشىلۋ سالتاناتى ءوتتى.
ورتالىقتىڭ اشىلۋى ناتيجەسىندە جۇمىس بەرۋشىلەر تاراپىنان تۇلەكتەرگە سۇرانىس ارتىپ, بىلىكتى كادرلار دايارلانادى. سونداي-اق WorldSkills حالىقارالىق قوزعالىسىنا كاسىبي شەبەرلىك كونكۋرستارىنا قاتىسۋشىلاردى جوعارى دەڭگەيدە دايىنداۋعا مۇمكىندىك بەرەدى. قر پارلامەنتى ءماجىلىسىنىڭ دەپۋتاتى ءامىرحان راحىمجانوۆتىڭ سوزىنشە, مۇنداي ورتالىق ءبىلىم الۋشىلاردى كاسىبي تۇرعىدان شىڭدايدى.
«وسىدان 20 جىل بۇرىن وسىنداي ورتالىقتار اشۋ تۇسىمىزگە كىرمەدى. كەزىندە مۇنى شەتەلدىك مەكتەپتەردەن دە كورگەن جوقپىز. تاۋەلسىزدىك العان جىلدارى ەلباسى نۇرسۇلتان نازارباەۆ ءبىلىم سالاسىنا, ونىڭ ىشىندە كاسىبي دايىندىققا كوبىرەك كوڭىل ءبولۋ قاجەت ەكەندىگىن ايتتى. اسىرەسە, جۇمىسشى ماماندىقتارىن كوبەيتۋدى تاپسىردى. الەمدىك تاجىريبەگە ءسۇيەنسەك, گەرمانيادا كوپشىلىك جوعارى وقۋ ورنىنا جۇگىرمەيدى, كەرىسىنشە, ولارداعى ەڭ ۇلكەن ءبىلىم – كاسىپتىك ءبىلىم الۋ. بۇگىندە قازاقستاندا وسى كاسىپتىك بىلىمگە قاتتى كوڭىل ءبولىنىپ جاتىر. ورتالىق ارقىلى وقۋشىلار تەحنيكالىق ءبىلىمىن شىڭدايدى, ياعني قۇرىلعىلاردى ءوز قولدارىمەن كورىپ, ۇيرەنەدى. وسىلايشا ەرتەڭگى كۇنى جۇمىسقا بارعاندا دايىن كادر بولىپ بارادى» دەدى ءا.راحىمجانوۆ.
ال بايقوڭىر اۋدانىنىڭ اكىمى نۇربول نۇرساعاتوۆتىڭ ايتۋىنشا, قازىرگى ۋاقىتتا قۇرىلىسشى ماماندار سۇرانىسقا يە. سوندىقتان اتالعان كوللەدجدىڭ ماماندار دايارلاۋدا ورنى ەرەكشە.
«بارشاڭىزدى تاۋەلسىزدىگىمىزدىڭ 30 جىلدىق مەرەيتويىمەن قۇتتىقتايمىن! وسى ۋاقىت ارالىعىندا ءبىز كوپتەگەن جەتىستىكتەرگە جەتتىك. ءبىلىم مەن عىلىم سالاسىن كوتەرسەك, ۇلكەن جەتىستىكتەرگە جەتەمىز. وسى كوللەدج – تەك قانا بايقوڭىر اۋدانىنا عانا ەمەس, نۇر-سۇلتان قالاسى بويىنشا بەتكە ۇستار كوللەدجدەردىڭ ءبىرى. بۇل جەردەن ۇلكەن جۇمىسشىلار شىعىپ جاتىر. مەن ءوزىم قۇرىلىسشى بولعاننان كەيىن وسى سالانى بىلەمىن. قازىر نۇر-سۇلتان قالاسىندا 10 مىڭنان استام ارەندالىق تۇرعىن ءۇيدى تاپسىرىپ جاتىر. بۇگىنگى تاڭدا ەڭ كەرەك ماماندىق وسى كوللەدجدەن شىعادى. اشىلىپ جاتقان ورتالىق قۇتتى بولسىن!» دەدى ن.نۇرساعاتوۆ.
ايتا كەتۋ كەرەك, «جاس مامان» جوباسىنىڭ نەگىزگى ماقساتى – كوللەدجدەردىڭ ماتەريالدىق بازاسىن جاڭارتۋ جانە بىلىكتى مامانداردى دايارلاۋدىڭ حالىقارالىق تاجىريبەسىن ەنگىزۋ. سونداي-اق حالىقارالىق ءبىلىم بەرۋ باعدارلامالارىن ەنگىزۋ, شەتەلدىك سەرىكتەستەرمەن بىرلەسە وتىرىپ, وقىتۋشىلار مەن وندىرىستىك وقىتۋ شەبەرلەرىنىڭ بىلىكتىلىگىن ارتتىرۋ.
