كەشە استانادا وتكەن ۇلتتىق بىرىڭعاي تەستىلەۋدىڭ العاشقى كۇنىندە 2000-عا تارتا ەلوردالىق تالاپكەر سىناق تاپسىردى. كەلەسى تەستىلەۋ 5 جانە 7 ماۋسىم كۇندەرى وتەدى.
ءلاززات بولەباەۆا, قر ءبىلىم جانە عىلىم مينيسترلىگىنىڭ ءبىلىم جانە عىلىم سالاسىنداعى باقىلاۋ كوميتەتى توراعاسىنىڭ ورىنباسارى:
– بيىل ۇلتتىق بىرىڭعاي تەستىلەۋگە قانداي وزگەرىستەر ەنگىزىلدى؟
– اعىمداعى جىلى ۇلتتىق بىرىڭعاي تەستىلەۋدى وتكىزۋ فورماتى وزگەرمەيدى. 155 ۇلتتىق بىرىڭعاي تەستىلەۋدى وتكىزۋ پۋنكتەرىندە 100 مىڭداي ءبىتىرۋشى, ياعني, جالپى مەكتەپ ءبىتىرۋشى تۇلەكتەردىڭ 70 پايىزى قاتىسادى.
ءبىرىنشى كۇنى ۇلتتىق بىرىڭعاي تەستىلەۋ 56 پۋنكتتە وتەدى جانە وعان 25 756 ءبىتىرۋشى قاتىسادى.
قازاقستان رەسپۋبليكاسى ءبىلىم جانە عىلىم مينيسترلىگى باق-تىڭ, سونداي-اق, 100 مىڭنان استام مەكتەپ تۇلەكتەرىنىڭ, پەداگوگتەر مەن اتا-انالار قوعامداستىقتارىنىڭ, ونىڭ ىشىندە ينتەراكتيۆتىك رەجيمدە 63 مىڭ مەكتەپ تۇلەكتەرىنىڭ قاتىسۋىمەن كەڭ كولەمدە اقپاراتتىق-ءتۇسىندىرۋ جۇمىستارىن جۇرگىزدى.
رەسپۋبليكاداعى مەكتەپ تۇلەكتەرىن پسيحولوگيالىق بەيىمدەۋ ماقساتىندا سىناق تەستىلەۋ جۇرگىزىلدى. 878 مىڭ سۇراق كىتاپشاسى مەن ۇلتتىق بىرىڭعاي تەستىلەۋدىڭ پاندەرى بويىنشا 210 مىڭ وقۋ قۇرالى جارىق كوردى.
2020 جىلعا دەيىن ءبىلىم بەرۋدى دامىتۋدىڭ مەملەكەتتىك باعدارلاماسىنا جانە جىل سايىن تەستىلەۋ بارىسىن جەتىلدىرۋدىڭ تاجىريبەسىنە سايكەس اعىمداعى جىلى 20 900 تەست تاپسىرماسى قۇرالدى. سونىمەن قاتار, بازادا ءار نۇسقاعا ءبىر تاپسىرمادان ەنگىزىلەتىن ماتەماتيكا ءپانى بويىنشا قۇراستىرىلعان 3000 لوگيكالىق سيپاتتاعى تاپسىرما بار. ۇلتتىق بىرىڭعاي تەستىلەۋدى وتكىزۋ پۋنكتتەرىنە ارناۋلى دايىندىقتان وتكەن قازاقستان رەسپۋبليكاسى ءبىلىم جانە عىلىم مينيسترلىگىنىڭ 1500 وكىلى ءبولىنىپ وتىر. قازاقستان رەسپۋبليكاسى ءبىلىم جانە عىلىم مينيسترلىگى مەن جەرگىلىكتى اتقارۋشى ورگاندار بارلىق پۋنكتتە ۇلتتىق بىرىڭعاي تەستىلەۋدى تابىستى ءارى قالىپتى وتكىزۋ ءۇشىن قاجەتتى جاعدايلار جاساۋدا.
– جوعارى وقۋ ورنىنا ءتۇسۋ ءۇشىن قانشا بالل جيناسا جەتكىلىكتى؟
– «ءبىلىم بەرۋ», «اۋىل شارۋاشىلىق عىلىمدارى» جانە «ۆەتەريناريا» ماماندىقتارى بويىنشا اقىلى بولىمگە وقۋعا ءتۇسۋ ءۇشىن ۇبت-دان 60 بالل جيناسا جەتكىلىكتى. ۇلتتىق جوعارى وقۋ ورىندارىنا ءتۇسۋدىڭ ەڭ تومەنگى شەكتى بالى 70 بولسا, وزگە جوو-لاردا بۇنىڭ دەڭگەيى – 50 بالل. ال, «جالپى مەديتسينا» ماماندىعى بويىنشا كەم دەگەندە 55 بالل جيناۋ كەرەك. 3 ماۋسىمنان 15 ماۋسىم ارالىعىندا رەسپۋبليكادا ۇلتتىق بىرىڭعاي تەستىلەۋ وتەدى. جالپى, ەلىمىزدە ۇبت ونىنشى رەت وتكەلى وتىر. ۇلتتىق ءبىرىڭعاي تەستىلەۋگە 9 جىل ىشىندە 1 ميلليون 240 مىڭ ادام قاتىستى, ياعني, مەكتەپ تۇلەكتەرىنىڭ جالپى سانىنان 80%-دى قۇرايدى.
