بۇگىنگى تاڭدا ەلباسى نۇرسۇلتان نازارباەۆ ءبىلىم سالاسىن ەرەكشە نازاردا ۇستاپ, ءوزىنىڭ تىكەلەي قامقورلىعىنا الىپ, ونى مەملەكەتتىك دامۋ ساياساتىنىڭ وزەگىنە بالاپ وتىر. بۇل باعىتتا استانالىق جالپى ءبىلىم بەرۋ مەكەمەلەرىمەن بىرگە, ورتا جانە جوعارى وقۋ ورىندارى دا اۋقىمدى ىستەر اتقارىپ كەلەدى.
«بىلىكسىز قالار جىراقتا, ءبىلىمدى جەتەر مۇراتقا». دانا حالقىمىز دۇنيەنىڭ كىلتى وقۋ-بىلىمدە ەكەنىن ەجەلدەن-اق ەسكەرىپ, پەرزەنتىنىڭ ءبىلىم الىپ, بىلىكتى مامان بولۋىنا بارلىق جاعدايدى جاساعان عوي. مەن دە پايعامبار جاسىنداعى سونداي انالاردىڭ ءبىرىمىن. ون ەكى نەمەرەنىڭ اجەسىمىن.
نەمەرەمنىڭ ۇلكەنى جاسۇلان ءجۇنىسوۆ استانا قالاسىنداعى د.قوناەۆ اتىنداعى ۋنيۆەرسيتەتتىڭ كوللەدجىن 2011 جىلى ءتامامداسا, ەكىنشى نەمەرەم ديلارا وسى وقۋ ورنىنىڭ قۇقىقتانۋ فاكۋلتەتىندە, ال ءۇشىنشى نەمەرەم امينا اۋدارماشى ماماندىعى بويىنشا ءبىلىم الۋدا.
تاۋەلسىز ەلىمىزدىڭ جارقىن بولاشاعى بولىپ تابىلاتىن جاستاردى تاربيەلەۋ جولىندا اتالمىش وقۋ ورنىنىڭ ۇستازدارى وقۋشىلارعا قازىرگى زامان تالابىنا ساي ءبىلىم مەن تاربيە بەرۋدە. ءبىلىم بەرۋ ءاربىر ادام مەن وتباسىعا قاتىستى ماسەلە ەكەنىن ەسكەرە وتىرىپ, ولار جاھاندانۋ جاعدايىندا باسەكەگە قابىلەتتى مامان دايارلاۋعا بارىنشا ۇلەس قوسىپ كەلەدى. سوندىقتان دا مەن ءوزىمنىڭ سۇيىكتى باسىلىمىم «استانا اقشامى» گازەتى ارقىلى نەمەرەلەرىمدى ءبىلىم نارىمەن سۋسىنداتقان ۇستازدارعا, د.قوناەۆ اتىنداعى ۋنيۆەرسيتەتتىڭ كوللەدجىندەگى بارلىق ۇجىمعا العىسىمدى بىلدىرگىم كەلەدى. اتاپ ايتقاندا, وسى كوللەدجدىڭ باس ديرەكتورى سەيىلحان مىرزابەكۇلى تولقىمبەكوۆ, كوللەدج ديرەكتورى گۇلميرا بەيسەنبەكقىزى مومبەكوۆا, ديرەكتوردىڭ وقۋ جانە عىلىمي-ادىستەمەلىك جۇمىستار جونىندەگى ورىنباسارى سۇلۋشاش ەلەۋسىزقىزى حاسەنوۆا, ديرەكتوردىڭ تاربيە ءىسى جونىندەگى ورىنباسارى جۇماگۇل نۇرحاتقىزى مۋسينا, كاسىپتىك ءبىلىم اياسىن كەڭەيتۋگە, ورتا بۋىن كادرلاردى دايىنداۋعا ءوز ۇلەستەرىن قوسۋدا.
جالپى, د.قوناەۆ اتىنداعى ۋنيۆەرسيتەت كوللەدجى 2002 جىلدان باستاپ «قۇقىقتانۋ», «ەكونوميكا جانە بۋحگالتەرلىك ەسەپ», «اۋدارما ءىسى», «باعدارلامامەن قامتاماسىز ەتۋ جانە ەسەپتەۋ تەحنيكاسى», «قوناق ءۇي شارۋاشىلىعىنا قىزمەت كورسەتۋ», «تۋريزم», «ەسەپ جانە اۋديت» سالالارى بويىنشا ورتا كاسىپتىك ماماندار دايارلاۋمەن اينالىسۋدا. كوللەدجدە وقۋ-تاربيە ىستەرى بويىنشا ءداستۇرلى ءىس-شارالار وتكىزىلىپ تۇرادى. ءبىلىم ورداسىنىڭ جانىندا كىتاپحانا, جاتاقحانا, ءراسىم زالى, اسحانا, سپورت كەشەنى بار. ياعني, وقىپ, ءبىلىم الام دەگەن جاستارعا مۇندا تولىق جاعداي جاسالعان. وقۋشىلار بولسا, قالالىق كوللەدجدەر اراسىندا ۇيىمداستىرىلاتىن كونكۋرستار مەن وليمپيادالارعا قاتىسىپ, جۇلدەلى ورىنداردى يەلەنىپ ءجۇر.
ساپاسى جوعارى ءبىلىمى بار ۇرپاق تاربيەلەۋ ارقىلى عانا ەلىمىز باسەكەگە قابىلەتتى مەملەكەت بولا الادى. بۇل رەتتە قازاق ءتىلى ءپانىنىڭ ءبىرىنشى ساناتتاعى وقىتۋشىسى ءشايزات زەينوللاۇلى الماعانبەتوۆ, قوعامدىق ءتارتىپ بولىمشەسىنىڭ مەڭگەرۋشىسى گۇلجان ەسەتقىزى اپاروۆا, ماتەماتيكا ءپانىنىڭ وقىتۋشىسى راشيد ارىستانبەكۇلى شاياحمەتوۆ, «قۇقىقتانۋ» بولىمشەسىنىڭ ۇستازدارى ءلاززات ايفقىزى يبراەۆا, ايجان جانبولاتقىزى جۇبانيازوۆا, «ەسەپ جانە اۋديت» بولىمشەسىنىڭ مەڭگەرۋشىسى گۇلسارا مۇتاشقىزى بەردەش, ورىس ءتىلى ءپانىنىڭ مۇعالىمى زارا عابباسقىزى ءماسىموۆا جانە ت.ب. ۇستازداردىڭ ەڭبەگىن ەرەكشە اتاپ وتۋگە بولادى. «جاقسىنىڭ جاقسىلىعىن ايت, نۇرى تاسىسىن» دەمەي مە؟ ولاردىڭ قاي-قايسىسى دا بالالاردىڭ دۇرىس ويلاپ, وڭ پايىم جاساۋىنا, ءومىر وتكەلدەرىندە كەزدەسەر قيىندىقتاردان قالاي شەشىم تاۋىپ شىعۋعا بولاتىنىنا باعىت بەرىپ, بىلگەندەرىن ۇيرەتۋدەن جالىققان ەمەس.
ورال توقجۇمانوۆا,
زەينەتكەر
