تۇڭعىش پرەزيدەنت كۇنى اياسىندا ۇيىمداستىرىلعان باستى شارالاردىڭ ءبىرى – «سارىارقا» ۆەلوترەگىندە وتكەن «ءبىر وتان! ءبىر تاعدىر! ءبىر ەلباسى!» مەرەكەلىك كونتسەرتى. سالتاناتتى راسىمگە ەلباسى نۇرسۇلتان نازارباەۆ قاتىسىپ, ءسوز سويلەدى.
بۇل – سوڭعى جىلدارى داستۇرگە اينالعان پاتريوتتىق شارا. «ءبىر وتان! ءبىر تاعدىر! ءبىر ەلباسى!» ۇرانىنىڭ استارىندا تەرەڭ ماعىنا جاتىر. ەلباسى ايتقانداي: «ءبىر حالىق» – بۇل بارلىعىمىز ءۇشىن ورتاق ۇلتتىق مۇددەلەر, «ءبىر ەل» – بۇل بارلىعىمىز ءۇشىن ورتاق وتان. «ءبىر تاعدىر» – بۇل ءبىز بىرگە ءجۇرىپ وتكەن قيىندىقتار مەن جەڭىستەر! مىنە, قازاقستاندىق قوعامدىق كەلىسىمدى شايقالتپاي ۇستاپ تۇراتىن تابانى تاۋداي ءۇش تاعان بۇل». ارينە, جۇرتشىلىقتى ەلىن, جەرىن سۇيۋگە شاقىراتىن بۇل شارا, اسىرەسە, جاستاردىڭ بويىنا وتانسۇيگىشىك سەزىمىن ۇيالاتۋعا ايتارلىقتاي ۇلەس قوساتىنى انىق. سالتاناتتى جيىندا جاستاردىڭ قاراسى كوپ بولدى. ستاديون ءىشىن لىق تولتىرعان ولار قولدارىنداعى جالاۋشالارىمەن «ەلباسى», «استانا», «نۇرسۇلتان», «پرەزيدەنت» دەپ ۇرانداتىپ وتىردى.
جيىندا ءسوز سويلەگەن ەلباسى نۇرسۇلتان نازارباەۆ وسىدان 23 جىل بۇرىن 1991 جىلدىڭ ءبىرىنشى جەلتوقسانىندا قازاقستاننىڭ تۇڭعىش پرەزيدەنتى بولىپ سايلانعانىن, وسى تاريحي كۇننەن 15 كۇن وتكەن سوڭ قازاق حالقى ءوزىنىڭ تاريحىندا تۇڭعىش رەت تاۋەلسىز ەل بولىپ جاريالانعانىن اتاپ ءوتتى.
ءيا, 1991 جىلدىڭ 1 جەلتوقسانى – ەل تاريحىنداعى ەرەكشە كۇن. وسى كۇنى حالقىمىز ءوزدى-ءوزى بولىپ تۇڭعىش پرەزيدەنتىن سايلادى. قازاقستان رەسپۋبليكاسىنداعى العاشقى جالپىحالىقتىق سايلاۋدا نۇرسۇلتان نازارباەۆ 98,78 پايىز داۋىس جيناپ, جەڭىسكە جەتكەن بولاتىن.
–بۇكىلحالىقتىق داۋىس بەرۋ بارىسىنداعى ماعان كورسەتىلگەن جالپىحالىقتىق سەنىم ەرەكشە جىگەر, زور قۋات بەردى. مىنە, سودان بەرى 23 جىل بويى ءبىز ءوز ەلىمىزدىڭ تاۋەلسىز دامۋ داڭعىلىمەن ءجۇرىپ كەلەمىز, – دەدى مەملەكەت باسشىسى.
نۇرسۇلتان ءابىشۇلى قازاق ەلى قىسقا مەرزىمنىڭ ىشىندە تولاعاي تابىستارعا جەتكەنىن ايتتى. ەلىمىزدىڭ ەكونوميكاسى تۇزەلىپ, حالىقتىڭ ءال-اۋقاتى ارتقانىنا توقتالدى. تاۋەلسىزدىك جىلدارىندا كوپتەگەن بەلەستەردى باعىندىرعان قازاق ەلى الەمگە تانىلعانىن اتاپ ءوتتى.
پرەزيدەنتتىڭ ايتۋىنشا, قازاقستان وزگەلەرگە كوپۇلتتى ەلدەگى تولەرانتتىلىقتىڭ, تاتۋ ءارى باقۋاتتى ءومىردىڭ ۇلگىسىن كورسەتىپ وتىر. بۇل – كوزدىڭ قاراشىعىنداي ساقتاۋدى قاجەت ەتەتىن زور بايلىق.
ەندى ەلىمىز الەمدىك ەكونوميكالىق قيىندىقتارعا قاراماستان «نۇرلى جول» جاڭا ەكونوميكالىق ساياساتىن جۇزەگە اسىرۋدى باستاپ وتىر. بۇل باعدارلامالار جاستاردىڭ بولاشاعى ءۇشىن دە جاسالعان. ەلباسى ءوز سوزىندە وسكەلەڭ جاستارعا ۇلكەن سەنىم ارتىپ, ولاردى بىلىكتى ازامات بولىپ وسۋگە شاقىردى.
– سىزدەر – باقىتتى ۇرپاقسىزدار. سەبەبى, تاۋەلسىز وتاندارىڭىزدا ءومىر ءسۇرىپ جاتىرسىزدار. ءبىز – تاۋەلدىلىكتى كورگەن ۇرپاقپىز. سوندىقتان تاۋەلسىزدىكتىڭ قادىر-قاسيەتىن جاقسى بىلەمىز. ەلىمىزدىڭ تاۋەلسىزدىگىنىڭ ارقاسىندا جاڭا ۇرپاق تاربيەلەندى. ءبىلىمدى ۇرپاق تاربيەلەندى. وتانىن سۇيەتىن ۇرپاق تاربيەلەندى. بۇگىنگى ۇرپاق ەلىمىزدىڭ كوك تۋىن ءاردايىم جوعارى ۇستاپ, قازاقستاننىڭ تاۋەلسىزدىگىن قاسىق قانى قالعانشا قورعايدى دەگەن سەنىمدەمىز. بارىمىزدى باعالاپ, بىرلىگىمىزدى ساقتاۋ كەرەك. ءبىلىم الىڭىزدار, جۇمىس ىستەپ, وتباسىن قۇرىڭىزدار, – دەدى ن.نازارباەۆ.
سالتاناتتى جيىن بارىسىندا «ءبىر وتان! ءبىر تاعدىر! ءبىر ەلباسى!» اتتى تەاترلاندىرىلعان قويىلىم ساحنالاندى. مەرەكەلىك شاراعا قازاقستاننىڭ ەسترادا جۇلدىزدارى پاتريوتتىق اندەردەن شاشۋ شاشتى. ەلىمىزدىڭ تۇكپىر-تۇكپىرىنەن كەلگەن ونەرپازدار دا پرەزيدەنت كۇنىنە ءوز تارتۋلارىن الا كەلىپتى. كونتسەرت «جاس ۇلان» رەسپۋبليكالىق كادەت مەكتەبىنىڭ سالتاناتتى شەرۋىمەن جالعاسىپ, «قازاقستان – ءبىزدىڭ ورتاق ءۇيىمىز» فولكلورلىق باعدارلاماسى كورەرمەنگە ۇسىنىلدى.
شارانىڭ باستى قازىعىنىڭ ءبىرى – «مەنىڭ ەلىم – ماڭگىلىك ەل: كاسپيدەن التايعا دەيىن» دەپ اتالعان ەتنوگرافيالىق اۆتوەكسپەديتسيانىڭ قورىتىندىلانۋى بولدى. كىلەڭ جاستاردان قۇرالعان بۇل ەكسپەديتسيا ەلىمىزدىڭ شۇرايلى تابيعاتى مەن قۇندى ەسكەرتكىشتەرىن ناسيحاتتاۋ ماقساتىندا ەكى اي بويى رەسپۋبليكانى ارالاپ شىققان بولاتىن.
مەرەكەلىك باعدارلامانىڭ سوڭىندا كونتسەرتكە قاتىسۋشىلار تۇڭعىش پرەزيدەنت كۇنىنە ارنالعان ءانۇراندى قوسىلا شىرقادى.
قىمبات نۇرعالي
