وڭتۇستىك كورەيانىڭ ينچحون قالاسىندا ءوتىپ جاتقان ءحۇىى جازعى ازيا ويىندارىندا قازاقستان سپورتشىلارى العا قويعان ماقساتتىڭ ۇدەسىنەن شىعىپ كەلەدى. ۇلتتىق قورجىنعا ازىرگە 2 التىن, 1 كۇمىس جانە 5 قولا مەدال ءتۇستى.
ينچحون تورىندە قازاقتىڭ كوك بايراعىن العاش اسپانداتقان اۋىر اتلەت مارگاريتا ەليسەەۆا بولدى. 49 كەلى سالماقتا سىنعا تۇسكەن قارشاداي قىزىمىز سەرپە كوتەرۋدە 106 كەلىنى, ال جۇلقا كوتەرۋدە 88 كەلىنى كوتەرىپ ازيا چەمپيونى اتاعىن جەڭىپ الدى. التىن تاققان چەمپيوندار قاتارىن دزيۋدوشى ەلدوس سمەتوۆ جالعاستىردى. ال, 60 كەلى سالماقتا سايىسقا تۇسكەن قازاق جىگىتى الدىمەن تاجىك بالۋانى اباتوللا امينوۆتى تازا جەڭسە, شيرەك فينالدا گونكونگتىك كين تينگتى تىزە بۇكتىردى. اقتىق بەلدەسۋگە جول اشاتىن شەشۋشى ايقاستا ەلدوس جاپونيا ءۇمىتى توري شيشيمەنىڭ جاۋىرىنىن جەر يىسكەتتى. ال التىن مەدال ءۇشىن بولعان فينالدىق جەكپە-جەكتە قازاق جىگىتىنىڭ ەكپىنىنە موڭعول بالۋانى ۆولتبااتور گانبات ەش قارسىلىق تانىتا المادى. وسىلايشا قازاقستان قۇراماسى قورجىنى ءبىرىنشى كۇنى-اق ەكىنشى التىنمەن تولىقتى.
لوندون وليمپياداسىنىڭ چەمپيونى ءزۇلفيا چينشانلو بۇل جارىستا ءبىرىنشى ورىننان كورىنەدى دەپ ۇمىتتەنگەنبىز. الايدا, قارسىلاستارى ءبىز ويلاعانداي وسال بولماي شىقتى. دەگەنمەن, ءبىزدىڭ قىز الەمدىك رەكورد جاساپ, ءدۇيىم جۇرتتى تاڭداي قاقتىرعان دا ەدى. بىراق تايلاند قىزى ارادا كوپ ۋاقىت وتكىزبەي-اق ءزۇلفيانىڭ رەكوردىن تاعى ءبىر جاڭارتىپ جىبەردى. ءسويتىپ, چينشانلو ەكىنشى رەت قاتارىنان ازيا ويىندارىنىڭ كۇمىس جۇلدەگەرى اتاندى.
اپالى-ءسىڭىلى الەكساندرا مەن ەكاتەرينا نەميچتەر سينحروندى جۇزۋدە, اندرەي موگيلەۆسكي ستەند اتۋدان, دزيۋدو كۇرەسىندە ماريا ورداباەۆا قولا مەدال تاعىندى.
بايراقتى جارىستىڭ ءۇشىنشى كۇنى دە قانجىعامىز مايلانباي قالعان جوق. الەم چەمپيونى ماكسيم راكوۆ فينالعا شىعىپ, بايىرعى قارسىلاسى موڭعوليالىق تۋشۆاياتور نايداننان جەڭىلىپ, كۇمىس جۇلدەگەر اتاندى.
ەرتەڭنەن باستاپ جۇلدەلەر ءۇشىن باسەكەگە بوكسشىلار مەن بالۋاندار كىرىسەتىن بولادى.
