ەلورداداعى كولىك كەپتەلىسى – ءارى-بەرى جۇيتكىگەن ءجۇرگىنشىلەردىڭ جۇيكەسىن جۇقارتىپ جۇرگەن ماسەلەلەردىڭ ءبىرى ەدى. ونى وڭتايلى شەشۋگە بايلانىستى جىلدا ارنايى جوبا جاسالىپ, تانىستىرىلادى. بىراق, جەمە-جەمگە كەلگەندە جۇزەگە اسۋى كەيىنگە قالدىرىلا بەرەتىن. بۇل جولى ماماندار ناقتى جوبانى مىقتاپ قولعا العان سىڭايلى. استانادا وسى 28 مامىردان باستاپ بىرجاقتى جول قوزعالىسى جوباسىن ەنگىزۋدىڭ ءبىرىنشى كەزەڭى باستالماق. ال ەكىنشى كەزەڭ 10 ماۋسىمدا ىسكە قوسىلادى.
استانا قالاسى اكىمدىگىندە وتكەن ارنايى ءباسپاسوز ءماسليحاتىندا جولاۋشىلار كولىگى باسقارماسىنىڭ باسشىسى ەدىل سۇلەيمەنوۆ پەن «استانا LRT» جشس-ءنىڭ ترانسپورت جونىندەگى ديرەكتورى رۋستام حاليلەۆ بىرجاقتى جول قوزعالىسى مەن «Bus Lane» – ارنايى جولاۋشىلار اۆتوبۋسى جولاعى جونىندە جان-جاقتى اڭگىمەلەپ بەردى.
باسقارما باسشىسىنىڭ ايتۋىنشا, ءبىرىنشى كەزەڭدە, ياعني 28 مامىردان باستاپ م.اۋەزوۆ كوشەسىندە (رەسپۋبليكا داڭعىلىنان باستاپ ءا.مولداعۇلوۆا كوشەسىنە دەيىن), جەلتوقسان كوشەسىندە (ماسكەۋ كوشەسىنەن كەنەسارىعا دەيىنگى ارالىق) بىرجاقتى جول قوزعالىسى باستالادى. ال 10 ماۋسىمدا اباي داڭعىلىندا (سارىارقا داڭعىلىنان ا.پۋشكين كوشەسىنە دەيىن), كەنەسارى (ا.پۋشكيننەن باستاپ سارىارقا داڭعىلىنا دەيىن) مەن ا.يانۋشكەۆيچ (اباي داڭعىلىنان ا.يمانوۆ كوشەسىنە دەيىن) كوشەلەرىندە بىرجاقتى قوزعالىس ەنگىزىلەدى. بۇل كوشەلەردىڭ جالپى ۇزىندىعى 14,5 شاقىرىم شاماسىندا ەكەن.
–وسى كوشەلەرگە بىرجاقتى قوزعالىس ەنگىزىلگەندە كەپتەلىس ازايىپ, قيىلىستاردان ءوتۋ جىلدامدىعى ارتادى. وسىلايشا, كوشە قيىلىسىنداعى بوگەلىستەر 29 پايىزعا تومەندەپ, كەرىسىنشە كولىك اعىنىنىڭ جىلدامدىعى 33 پايىزعا ارتاتىن بولادى. جولدا ءجۇرۋ ۇزاقتىعى دا 20 پايىز شاماسىنا قىسقارادى. قازىرگى ۋاقىتتا جولدا ءجۇرۋ ۇزاقتىعى ءبىر ساعاتقا 12 شاقىرىمنان كەلىپ تۇر. بۇل وتە تومەن كورسەتكىش, – دەپ ءتۇسىندىردى «استانا LRT» جشس-ءنىڭ ترانسپورت جونىندەگى ديرەكتورى رۋستام حاليلەۆ. ونىڭ ايتۋىنشا, كوپ ۋاقىتتان بەرى الدىن الا جۇرگىزىلگەن زەرتتەۋلەر كورسەتكەندەي رەسپۋبليكا داڭعىلى, م.اۋەزوۆ جانە كەنەسارى مەن اباي كوشەلەرىنىڭ جۇكتەمەسى جوعارى. وسى اۋماقتارعا بىرجاقتى قوزعالىس ەنگىزىلگەندە كوشەلەردىڭ جۇكتەمەسى ەكى ەسەگە دەيىن ازايۋى ءتيىس. بىرجاقتى قوزعالىس كولىك جۇكتەمەسىن بىرنەشە كوشەگە تەڭ ءبولۋدى كوزدەيدى. بۇل ءوز كەزەگىندە باعدارشامدىق رەتتەۋدى دە جەتىلدىرىپ, جول-كولىك وقيعاسىن ازايتۋعا دا سەپتىگىن تيگىزەدى.
كوپتەن اڭگىمە بولىپ كەلە جاتقان جاڭا جوبانىڭ ءبىرى – «Bus Lane» ارنايى جولاۋشىلار اۆتوبۋسى جولاعى. ماماندار بۇل جوبانى ەنگىزۋدىڭ دە ناقتى مەرزىمىن ايقىنداعان. ونى ءۇش كەزەڭگە ءبولىپ ەنگىزۋدى جوسپارلاپ وتىر. ءبىرىنشى كەزەڭ بويىنشا الداعى ماۋسىم ايىنىڭ 5 جۇلدىزىندا ارنايى اۆتوبۋس جولاعى الاش جانە قورعالجىن تاس جولىندا ەنگىزىلەدى. ماسەلەن الاش تاس جولىنىڭ بويىنداعى جولاق «ماگنۋم» ساۋدا ۇيىنەن ش.ءۋاليحانوۆ كوشەسىنە دەيىنگى ارالىقتى قامتىسا, قورعالجىن تاس جولى بويىندا ش.بەيسەكوۆا مەن تۇران داڭعىلى ارالىعىندا بولادى. 10 ماۋسىمعا جوسپارلانىپ وتىرعان ەكىنشى كەزەڭدە اباي داڭعىلى مەن كەنەسارى كوشەسىنىڭ بويىندا ارنايى اۆتوبۋس جولاعى پايدا بولادى. ءۇشىنشى كەزەڭدە (15 ماۋسىم) جەڭىس داڭعىلىنىڭ بويىندا اۆتوبۋستار ءى.ەسەنبەرلين مەن كەنەسارى كوشەسىنە دەيىنگى ارالىقتا ەمىن-ەركىن قوزعالادى.
–ارنايى اۆتوبۋس جولاعى ەنگىزىلگەندە قالاداعى جولاۋشىلاردىڭ قاتىناسىنا قولايلى جاعداي تۋادى. جول قوزعالىسىندا قوعامدىق كولىكتەرگە باسىمدىق بەرىلگەننەن كەيىن مارشرۋتتاردىڭ ءجۇرۋ كەستەسى بارىنشا ساقتالادى. ويتكەنى ولار كولىك كەپتەلىسىنە ۇرىنبايدى. سايكەسىنشە جولاۋشىلاردىڭ ءجۇرىپ-تۇرۋ كەزىندەگى قاۋىپسىزدىگى بارىنشا جوعارىلايدى, – دەيدى جاڭا جوبا جونىندە استانا قالالىق جولاۋشىلار كولىگى باسقارماسىنىڭ باستىعى ەدىل سۇلەيمەنوۆ.
اۆتوبۋستارعا ارنايى جولاق اشىلعاندا وزگە كولىك جۇرگىزۋشىلەرى بۇل تارتىپكە باعىنا قويا ما؟ ءتارتىپتى ساقتاماي, ارنايى جولاققا ءتۇسىپ الىپ زۋلاي جونەلەتىن كولىك جۇرگىزۋشىلەرى بولماي قالماسى انىق. بۇل سۇراققا استانا قالالىق ءىىد اكىمشىلىك پوليتسيا باسقارماسى باستىعىنىڭ ورىنباسارى, پوليتسيا پولكوۆنيگى نۇرلان ۋۆاەۆ جاۋاپ بەردى.
–اۆتوبۋستارعا ارنايى جولاق اشىلعاننان كەيىن اكىمشىلىك پوليتسيا باسقارماسىنىڭ ماماندارى جەرگىلىكتى پوليتسيا قىزمەتىمەن بىرگە جاڭا جوبا ەنگىزىلگەن اۋماقتاردى ايرىقشا باقىلاۋعا الاتىن بولادى. العاشقى ءبىر اپتا بويى ءتارتىپ بۇزعان جۇرگىزىۋشىلەرگە ءتۇسىندىرۋ شارالارى قولدانىلادى. ال ءبىر اپتادان سوڭ ارنايى جول بەلگىسىن ەسكەرمەي ءتارتىپ بۇزعاندار اكىمشىلىك جازالارعا تارتىلادى. ءبىز ءسويتىپ قالاداعى كولىك يەلەرىن وسىنداي جاڭالىققا ۇيرەتەتىن بولامىز, – دەدى ول.
قازىرگى ۋاقىتتا ارنايى اۆتوبۋس جولاعى ەنگىزىلەتىن اۋماقتارعا ءتيىستى جول بەلگىلەرىن ورناتۋ جۇمىستارى قولعا الىنعان. جاڭا جوباعا جول قوزعالىسىنا قاتىسۋشىلاردىڭ بارلىعى ۇيرەنگەن كەزدە ول بىرتىندەپ باسقا كوشەلەرگە دە ەنگىزىلە باستايدى. سول كەزدە قوعامدىق كولىكتى پايدالانۋشىلار قاتارى دا ارتا تۇسپەك.
مەڭدوللا شامۇراتوۆ
