ازاتتىقتىڭ العاشقى جىلدارىنان-اق قازاقستان كوشباسشىسى نۇرسۇلتان نازارباەۆ جارقىن بولاشاق ىسىنە – ەلدىڭ ەرتەڭگى تىزگىنىن قولعا الار جاستاردى تاربيەلەۋ قاجەتتىگىنە دەن قويدى. قازاق ەلىنىڭ جاستارى شەت ەلدەرگە بارىپ, ءبىلىمىن شىڭداسىن, ءالەمدىك باسەكەگە قابىلەتتى بولۋىمىز ءۇشىن وركەنيەتتى ەلدەردىڭ وزىق جەتىستىكتەرىن مەڭگەرسىن دەگەن ماقساتپەن «بولاشاق» حالىقارالىق باعدارلاماسىن دايىنداتىپ, جاستاردى الىس-جاقىن شەت مەملەكەتتەرگە وقۋعا جىبەرۋدى قولعا العان ەدى. پرەزيدەنت وسى شارا ارقىلى ەل جاستارى قاي سالادا دا وركەندەۋگە ۇلەس قوسادى دەپ ۇمىتتەندى. بۇگىندە بۇل ءۇمىت ۇدەسىنەن شىقتى, اقتالدى دەۋگە تولىق نەگىز بار.
زاماناۋي جەتىستىكتەردى مەڭگەرگەن جاستار قازىر مەملەكەتتىك قىزمەتتىڭ قازانىندا قايناپ, تاجىريبەلەرىن شىڭداي تۇسۋدە. ارقايسىسى ءار سالانىڭ بىلىكتى مامانىنا اينالعان. سولاردىڭ ءبىرى – ماقسات جاباعين, ماسكەۋدەگى م.لومونوسوۆ اتىنداعى ۋنيۆەرسيتەتتەن ءبىلىم الىپ كەلگەن.
بالا كۇنىنەن جاراتىلىستانۋ پانىنە قىزىققان ول بۇگىندە العان ءبىلىمى مەن تاجىربيەسىن ءوز ەلىنىڭ وركەندەۋىنە جۇمساپ ءجۇر. بيوتەحنولوگيا ماماندىعىن مەڭگەرگەن ماقسات وقۋدى بىتىرگەن سوڭ بىردەن جۇمىسقا ورنالاستى. قازىر نازارباەۆ ۋنيۆەرسيتەتىنىڭ «ءومىر تۋرالى عىلىم» ورتالىعىندا ادام گەنەتيكاسىن زەرتتەۋمەن اينالىسۋدا.
جاس مامان دنك-نىڭ وزگەرىسكە ۇشىراۋ سەبەبىن انىقتاپ, داۋن سيندرومى سىندى اۋرۋلاردىڭ ەم جولدارىن قاراستىرعان. بۇگىندە قازاق حالقىنىڭ تولىق گەنومىن زەرتتەۋدە. ول «بولاشاق» باعدارلاماسى تۋرالى بىلاي دەيدى: «ەلباسىنىڭ باستاماسىمەن قولعا الىنعان باعدارلاما ارقىلى ءبىز ساپالى ءبىلىم الدىق. وتاندىق جانە شەتەلدىك عىلىمدى بايلانىستىرىپ, قالاي زەرتتەۋلەر جۇرگىزۋ قاجەت ەكەندىگىن بىلدىك. مەنىڭ ماقساتىم – ەلىمىزدەگى عىلىمدى دامىتۋعا ۇلەس قوسۋ, قازاق مەملەكەتىن الەمدىك ءوركەنيەتتى ەلدەر قاتارىنا ەنگىزۋ».
بالجان جارتىباەۆا دا «بولاشاقتىڭ» تۇلەگى. اقش-تاعى بەدەلدى وقۋ ورىندارىنىڭ ءبىرى تhe George Washington ۋنيۆەرسيتەتىنىڭ ماگيستراتۋراسىن ءتامامداپ كەلدى ەلگە. كەيىن ەكونوميكا جانە بيۋدجەتتى جوسپارلاۋ مينيسترلىگىندە ەڭبەك ەتتى. قازىر مەملەكەتتىك قىزمەت ىستەرى اگەنتتىگىندە جۇمىس ىستەپ ءجۇر. «مەن ءۇشىن, مەنىڭ وتانىم ءۇشىن «بولاشاق» باعدارلاماسىنىڭ بەرەرى وتە كوپ دەگەن سەنىمدەمىن. بۇل باعدارلاما جالىنداعان جاستارعا ءوز ماماندىعىن وزىق وقۋ ورىندارىندا جوعارى تەحنولوگيا مەن ەڭ ۇزدىك ادىستەمەلەر ارقىلى تەرەڭ مەڭگەرۋگە جول اشادى. ءاربىر ستۋدەنتتىڭ ءبىلىمىن جوعارىلاتىپ قانا قويماي, پاتريوتتىق سەزىمىن وياتىپ, ەلگە, جەرگە دەگەن ماحابباتىن ارتتىرا تۇسەدى. الەمنىڭ تۇكپىر-تۇكپىرىندەگى ءبىزدىڭ زامانداستارىمىز قازاقستان جاستارىنا شەتەلدىڭ جوعارى وقۋ ورىندارىندا ءدارىس الۋعا مۇمكىندىك بەرىپ, ايرىقشا جاعداي جاساپ وتىرعان ەل پرەزيدەنتى نۇرسۇلتان ءابىشۇلىنىڭ كورەگەندىگىنە قىزىعا قارايدى» دەيدى جاس مامان.
ال, ساكەن نۇرتازاەۆ ۇلىبريتانيادا وقىپ قايتقان. بىرنەشە جىل العان ءبىلىمىن اۋىلدىڭ وركەندەۋىنە جۇمساپ كەلەدى. ول شىعىس قازاقستان وبلىسىنىڭ شەمونايحا اۋدانى اكىمىنىڭ ورىنباسارى قىزمەتىن ابىرويمەن اتقارىپ ءجۇر. «بولاشاقتىق» جاستاردىڭ اۋىلدى جەرگە بارىپ قىزمەتكە ارالاسۋى – باعدارلامادا كورسەتىلگەن مىندەتتەردىڭ نەگىزگى باعىتىنىڭ ءبىرى. ونىڭ ۇستىنە جاستار مەن جەرگىلىكتى بيلىكتەگى اعا بۋىن وكىلدەرىنىڭ قارىم-قاتىناسى ەل يگىلىگى ءۇشىن اتقارىلاتىن جۇمىستاردىڭ جەمىستى بولۋىنا ىقپالىن تيگىزەدى» دەيدى ساكەن. ونىڭ پىكىرىنشە, ەلدىڭ وركەندەۋىنە, وسۋىنە اۋىلدىق ايماقتاردىڭ قوسار ۇلەسى شەكسىز. «ءبىز دامۋىمىزدى جالعاستىرامىز, تاسىمىزدى تاعى ورگە دومالاتا بەرەمىز دەسەك, اۋىلداردى, ەلدىمەكەندەردى قولداۋدى, دەمەۋدى ءالى دە بولسا جانداندىرۋىمىز قاجەت» دەگەن ويىن دا جەتكىزدى اۋدان اكىمىنىڭ ورىنباسارى.
بۇگىنگى تاڭدا مەملەكەتتىك قىزمەتتە ءجۇرىپ, كاسىبي بىلىكتىلىگىمەن كوزگە تۇسكەن «بولاشاقتىقتار» جەتىپ ارتىلادى. ولاردىڭ ءبىرازى جوعارى لاۋازىمدى قىزمەتتەردە ەڭبەك ەتۋدە. ماسەلەن, «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك گەرمان فەدەراتيۆتىك رەسپۋبليكاسىنىڭ ليۋبەندەگى جوعارى مەكتەبىن بىتىرگەن. ءۇش پەداگوگيكالىق, مۋزىكالىق جانە ەكونوميكالىق جوعارى ءبىلىمى بار. ماينداعى فرانكفۋرت قالاسىندا قازاقستاننىڭ باس كونسۋلدىعىندا اتتاشە, بەرلين قالاسىنداعى قازاقستان رەسپۋبليكاسىنىڭ ەلشىلىگى ەكونوميكالىق ءبولىمىنىڭ ءۇشىنشى حاتشىسى بولعان. پرەزيدەنت اكىمشىلىگىندە ءتۇرلى لاۋازىمداردى دا ابىرويمەن
اتقاردى. باۋىرجاننىڭ ەڭبەك جولى جۇيەلى زەرتتەۋ ورتالىعىنىڭ ەكسپەرتى, اقپارات جانە تالداۋ سەكتورىنىڭ مەڭگەرۋشىسى, پرەزيدەنت اكىمشىلىگى باسشىسىنىڭ ورىنباسارى بولىپ جالعاسا بەرەدى.
«بولاشاقتىڭ» تاعى ءبىر تۇلەگى – قۋاندىق بيشىمبەۆ بۇگىندە «ءبايتەرەك» ۇلتتىق ءال-اۋقات قورى باسقارما توراعاسىنىڭ ورىنباسارى. ول
اقش-تا ءبىلىم العان. بيشىمباەۆتىڭ ءبىلىم جولى مۇنىمەن توقتامايدى. قازاق مەملەكەتتىك باسقارۋ اكادەمياسىندا «حالىقارالىق ەكونوميكالىق قاتىناستار» ماماندىعى بويىنشا ءبىلىمىن ۇستەپ, م.دۋلاتي اتىنداعى تاراز مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا, دج. ۆاشينگتون اتىنداعى ۋنيۆەرسيتەتتىڭ جانىنداعى مەنەدجمەنت جانە بيزنەس مەكتەبىن اياقتادى. بيزنەستى باسقارۋ ماگيسترى دارەجەسىنە يە, ەكونوميكا عىلىمدارىنىڭ كانديداتى.
ارىن ورساريەۆ تە ءوزىنىڭ ناعىز «بولاشاقتىق» ەكەنىن دالەلدەۋدە. ورىس, فرانتسۋز, اعىلشىن, يسپان تىلدەرىندە ەركىن سويلەيتىن ارىن قوعامدىق جۇمىستاردىڭ بەل ورتاسىندا جۇرگەندى ءجون كورەدى. جاستارعا ەسىمى قازاقستاندىق كوڭىلدى تاپقىرلار كلۋبىنىڭ العاشقى نەگىزىن سالۋشىلاردىڭ ءبىرى رەتىندە تانىس. بۇگىندە ول پاۆلودار قالاسى اكىمىنىڭ ورىنباسارى بولىپ قىزمەت ەتەدى. «بولاشاق» باعدارلاماسىنىڭ العاشقى تۇلەكتەرىنىڭ ءبىرى ارىن ورساريەۆ ءار جىلداردا پرەزيدەنت اكىمشىلىگىندە, سىرتقى ىستەر مينيسترلىگىندە, مادەنيەت جانە اقپارات مينيسترلىگىندە, استانا اكىمدىگىندە ەڭبەك ەتكەن. وسىدان-اق, «بولاشاقتىقتار» الەۋەتى زور ۇلكەن كادرلىق رەزەرۆ ەكەنىن بايقاۋ قيىن ەمەس. بۇلار – ەلباسىنىڭ «بولاشاق» باعدارلاماسىنىڭ جەمىسى ءھام جەڭىسى.
بۇگىندە «بولاشاق» حالىقارالىق باعدارلاماسى بويىنشا شەتەلدە ءبىلىم العان 6 مىڭنان استام تۇلەك ەلىمىزدە ءار سالادا ەڭبەك ەتىپ ءجۇر. ولار فيزيكا, اقپاراتتىق تەحنولوگيا, ماركەتولوگيا باعىتىنداعى تىڭ ماماندىقتاردى يگەرگەن. بيىل بۇل اۋقىمدى جوباعا جيىرما جىل تولدى. بۇگىندە بۇل باعدارلاما بويىنشا, 10 مىڭ ستۋدەنت وزىق ءبىلىم الدى. ولاردىڭ 25 پايىزى استانا قالاسىنىڭ تۇرعىندارى بولسا, 32 پايىزى – الماتىلىقتار. ال 43 پايىزى – ەلىمىزدىڭ ءار ايماعىنان.
قورىتا ايتقاندا, «بولاشاق» – ءبىزدىڭ مەملەكەتىمىزدىڭ بولاشاعى. «بولاشاقتان» ءبىلىم العان زيالى جاستار ەل ەرتەڭى ءۇشىن ايانباي تەر توگە بەرەتىنى انىق. بۇل جاستار قازىردىڭ وزىندە ءتۇرلى ءوندىرىس ورىندارىندا, الەۋمەتتىك نىسانداردا ەڭبەك ەتىپ, جاڭا تەحنولوگيالاردى ەنگىزۋگە مۇرىندىق بولا باستادى. شەتەلدەن ۇيرەنىپ كەلگەن تاجىريبەلەرىمەن, بىلىمدەرىمەن ءبولىسىپ, ارىپتەستەرىنە ۇلگى بولۋدا. سوندىقتان قازاقستان وزىق دامىعان وتىز ەلدىڭ قاتارىنا قوسىلاتىن كۇن دە الىس ەمەس سەكىلدى.
ەركەجان ساتىمبەك